Belemgbunlililɛ Nolobɔlɛnli Kulovolɛ:

Fa ye kɛ ɛle ɛzoanvolɛma mɔɔ ɛnee gyi Ɔlivi Boka ne azo la anu ko. Gyisɛse ɛvinde ɛ nwo ɛkɛ ne. Akee mɔɔ ɔka ekyii ɔkɔ anwuma la, ɔka kɛ: “Saa sunsum nwuanzanwuanza ne ba bɛ nwo zo a, bɛbanyia tumi na bɛayɛ me alasevolɛ wɔ Gyɛlusalɛm nee Dwudiya nee Samɛlea amuala, bɛahɔdwu azɛlɛ ye azo ɛleka biala.” (Gyi. 1:8) Duzu a anrɛɛ ɛbayɛ a?

Bie a kɛzi gyima ne kpole de la bamaa ɛzulolɛ aha wɔ. Na bie a ɛbabiza kɛ, ‘Kɛ ɔkɛyɛ na yɛdayɛ ɛdoavolɛma ekyi ɛhye yɛahola yɛali daselɛ yɛahɔdwu “azɛlɛ ye azo ɛleka biala” ɛ?’ Bie a ɛkakye kɔkɔbɔlɛ mɔɔ Gyisɛse vale maanle wɔ nɔe ne mɔɔ aleɛ kye a ɔbawu la: “Akɛlɛ ɛnle kpole ɛndɛla ɔ menle. Saa bɛyɛle me kpɔdekpɔde a, ɛnee bɛbayɛ bɛdabɛ noko kpɔdekpɔde; saa bɛlile me edwɛkɛ zo a, ɛnee bɛbali bɛdabɛ noko bɛ edwɛkɛ zo. Noko me duma ne ati bɛbayɛ ɛhye mɔ amuala bɛatia bɛ, ɔluakɛ bɛnze Mɔɔ zoanle me la.” (Dwɔn 15:20, 21) Saa ɛdwenle zɔhane edwɛkɛ ne anwo a, ɛbahola wɔabiza ɛ nwo kɛ, ‘Kɛ ɔkɛyɛ na meahola meagyinla kpɔdekpɔdeyɛlɛ nee dwazotia zɛhae anloa meali daselɛ bɔkɔɔ ɛ?’

Ɛnɛ noko, kpuya zɔhane mɔ ala a yɛbiza yɛ nwo a. Yɛ gyima mɔɔ la yɛ nwo zo kɛ Gyihova Alasevolɛ la a le kɛ yɛbali daselɛ bɔkɔɔ yɛahɔdwu “azɛlɛ ye azo ɛleka biala” yɛahile “maanle maanle kɔsɔɔti anu menli.” (Mat. 28:19, 20) Ɔlua dwazotia titili ɛhye mɔɔ bɛha kɛ yɛbayia la ati, kɛ ɔkɛyɛ na yɛahola yɛayɛ gyima ɛhye ɛ?

Ɛzoanvolɛma Gyima ne maa yɛnwu kɛzi ɛzoanvolɛ ne mɔ nee bɛ gɔnwo mɔ Kilisienema luale Gyihova moalɛ zo holale yɛle bɛ gyima ne wɔ ɛvoya mɔɔ limoa Y.M. anu la anwo kɛlɛtokɛ kɛnlɛma. Bɛyɛ buluku ɛhye mɔɔ ɛlɛkenga la kɛ ɔboa wɔ ɔmaa ɛnleɛnlea zɔhane kɛlɛtokɛ ne anu na ɛ nye ɛlie edwɛkɛ mɔɔ yɛ anyelielɛ mɔɔ wɔ nu la anwo. Kɛzi ninyɛne dɔɔnwo mɔɔ Nyamenle azonvolɛ yɛle ye wɔ ɛvoya mɔɔ limoa la anu la nee mɔɔ ye menli yɛ ye ɛnɛ le ko la bazi ɛ nwo. Ɛbanwu kɛ tɛ gyima ne mɔɔ yɛyɛ la ala a le ko a, na emomu kɛzi bɛyɛ gyima zɔhane anwo ngyehyɛleɛ la noko le ko. Saa ɛsuzu kɛzi ninyɛne le ko la anwo a ɔbamaa diedi mɔɔ ɛlɛ kɛ Gyihova Nyamenle ɛlɛkɔ zo ahile ye ahyehyɛdeɛ ne mɔɔ wɔ azɛlɛ ye azo adenle la ayɛ kpole.

Yɛ nye la yɛɛ ɔle yɛ asɔneyɛlɛ kɛ ɛbanleɛnlea Gyima buluku ne anu amaa anwodozo mɔɔ ɛlɛ ye wɔ Gyihova anu kɛ ɔbaboa wɔ yɛɛ ye sunsum nwuanzanwuanza bamaa wɔ anwosesebɛ la ayɛ kpole. Ɔti maa ɛhye ɛboa wɔ na kɔ zo ‘di Nyamenle Belemgbunlililɛ ne anwo daselɛ bɔkɔɔ’ amaa wɔaboa awie mɔ wɔamaa bɛalua ngoane adenle ne azo.​—Gyi. 28:23; 1 Tim. 4:16.