Pinabli min Managpulong na Panarian:

Imadyin yo pan sakey kayod saray apostol ya akaalagey ed Palandey na Saray Olibo. Insan nampanengneng si Jesus ed sikayo. Nen asingger lan onlad tawen oniay kuan to: “Makaawat kayo na pakayari sano onsabi ed sikayo so masanton espiritu, tan mantasi kayo nipaakar ed siak diad Jerusalem, diad interon Judea tan Samaria, tan diad sankaarawian a pasen na dalin.” (Gawa 1:8) Anto kasi reaksion yo?

Ompan nabigla kayo ed kabaleg na kimey ya ipapagawa to. Ompan isipen yo, ‘Panon kamin makapanpulong anggad “sankaarawian a pasen na dalin” anta datdaiset kami labat?’ Seguro nanonotan yo may imbaga nen Jesus ed samay labi antis ya ompatey: “Say aripen et aliwan mas baleg nen say katawan to. No pinasegsegang da ak, pasegsegangen da kayo met; no inunor day imbagak, unoren da met so imbaga yo. Balet gawaen da irayan amin sumpad sikayo lapud ngaran ko, ta agda kabat imay angibaki ed siak.” (Juan 15:20, 21) No isipen yo iraman ya imbaga to, ompan say tepet yo, ‘Panon ak ya mamasyan manpulong no wala ray isusumpa tan panamasegsegang?’

Ontan met so situasyon tayo natan. Bilang Tasi nen Jehova kaukolan tayo met so mamasyan manpulong diad “sankaarawian a pasen na dalin” pian nasabi tayo ray “totoo ed amin a nasyon.” (Mat. 28:19, 20) Panon tayon nagawaan iyan kimey anta impasakbay la ya wala ray onsumpa?

Say libro ya Saray Gawa na Saray Apostol et sakey ya mabilabilay ya salaysay no panon ya asarag ya sumpalen na saray apostol tan saray kapara dan Kristiano nen unonan siglo C.E. so asainmin da diad tulong nen Jehova. Ginawa iyan publikasyon ya babasaen yo natan pian naaralan yo iray agawa nensaman tan nalikna yo so liket na saraman ya Kristiano lapud mapmaples ya inmaligwas so panagpulong a kimey. Seguro nasurprisa kayo ta dakdakel manayay piparaan na saray lingkor na Dios nen unonan siglo tan saray totoo to natan. Nanengneng yo ya aliwan say kimey tayo labat so parehas noagta parehas met no panon ya naoorganisa so kimey tayo. No isipen yo irayan pamparehoan, seguradon ombiskeg so pananisia yo ya anggad natan et igigiya ni nen Jehova so kabiangan na organisasyon to ed dalin.

Iilaloan mi tan ipipikasi mi ya no aralen yo so libro na Gawa, ombiskeg so tiwala yo ya tulongan kayo nen Jehova tan iter toy masanton espiritu to pian makapan-anos kayo. Komon ta napaseseg kayon tuloytuloy ya mamasya ed pangipulong na Panarian na Dios tan tulongan so arum pian niliktar ira.​—Gawa 28:23; 1 Tim. 4:16.