Dear Pablisa:

Tingim sapos iu wanfala long olketa aposol wea standap long Maunt Olive Tree and Jesus kam long iufala. Bifor hem go ap long heven hem sei: “Taem iufala kasem holy spirit datwan bae strongim iufala, and iufala bae talem pipol abaotem mi long Jerusalem, long evri ples long Judea and long Samaria, and long evri farawe ples long earth.” (Acts 1:8) Hao nao bae iu feel?

Maet iu tingse datwan hem big waka tumas and ting olsem: ‘Mifala no staka disaepol nomoa ia, so hao nao bae mifala preach “long evri farawe ples long earth”?’ Maet iu warim tu samting wea Jesus talem long naet bifor hem dae. Hem sei: “Wakaman hem no winim boss bilong hem. Sapos olketa spoelem mi, bae olketa spoelem iufala tu. Sapos olketa herem toktok bilong mi, bae olketa herem toktok bilong iufala tu. Olketa bae duim olketa samting hia againstim iufala bikos iufala olketa disaepol bilong mi and olketa no savve long man wea sendem mi kam.” (John 15:20, 21) Maet toktok hia mekem iu for ting olsem: ‘Hao nao bae mi storyim gud Kingdom bilong God sapos pipol bae againstim and spoelem mi?’

Iumi tu savve tingim olketa kwestin olsem. Waka bilong iumi Olketa Jehovah’s Witness hem for preach “long evri farawe ples long earth” and long “pipol long evri kantri.” (Matt. 28:19, 20) Hao nao bae iumi duim datwan sapos pipol againstim iumi?

Buk bilong Acts storyim olketa interesting samting abaotem wanem Jehovah duim for helpem olketa aposol and olketa Christian long first century C.E. for preach long pipol long evri farawe ples. Disfala buk bae helpem iu for ting raonem samting wea olketa aposol duim and mekem iu feel olsem iu tu stap taem olketa bigfala samting happen. Bae iu sapraes tu hao staka samting wea pipol bilong God long first century duim hem semsem tu witim iumi distaem. Bae iu luksavve iumi duim sem waka and organize long sem wei. Taem iu ting raonem olketa samting hia, datwan bae strongim faith bilong iu hao Jehovah God gohed for leadim organization bilong hem long earth.

Taem iu studyim buk bilong Acts, mifala prea hem bae strongim faith bilong iu hao Jehovah bae helpem iu and givim holy spirit for strongim iu. Mifala hope disfala buk bae encouragem iu for “barava storyim gud Kingdom bilong God” and helpem pipol for kasem laef olowe.​—Acts 28:23; 1 Tim. 4:16.