Munasqa willajkuna:

Jesusqa apostolesnin Olivos orqopi kashajtinku paykunaman rikhurerqa. Niraj cieloman ripushaspataj paykunaman nerqa: “Espíritu santo qankunaman jamojtin atiyta japʼinkichej, noqamantataj testigos jina willankichej Jerusalenpi, tukuy Judeapi, Samariapi, jinallataj kay jallpʼaj tukuy kʼuchusnintinpi”, nispa (Hech. 1:8). Sichus Jesuspa apostolesninmanta ujnin kasunman karqa chay, ¿imaynataj kashasunman karqa chayta uyarispa?

Chay ruway may jatun kasqanrayku ichapis mancharikuspa kayta tapukusunman karqa: “Uj chhikitalla kaykoqa, ¿imaynatataj chanta ‘kay jallpʼaj tukuy kʼuchusnintinpi’ willasqaykuri?”, nispa. Chantá ichapis chay kutipi yuyarikusunman karqa Jesús wañuchisqa kananpaj uj chʼisi faltashajtin imatachus nisqanta. Pay nerqa: “Kamacheqa mana patronninmanta aswan kurajchu. Paykunachus noqata qhatiykachawarqanku chayqa, qankunatapis qhatiykachallasonqachejtaj, nisqaytachus kasorqanku chayqa, nisqaykichejtapis kasullanqankutaj. Chay tukuy imastaqa sutiyrayku contraykichejpi ruwanqanku, kachamuwajniyta mana rejsisqankurayku”, nispa (Juan 15:20, 21). Jesuspa chay nisqanta yuyarikuspaqa ichapis nisunman karqa: “¿Imaynatataj allinta sutʼinchasqayku noqaykuman enemigosniyku churanakuwajtiykuri?”, nispa.

Kay tiemponchejmantañataj parlarina. Jehovaj testigosninpis ajinallapitaj rikukushanchej. Noqanchejpis Diospa Gobiernonmanta allinta sutʼinchananchej tiyan “tukuy nacionesmanta” runasman “kay jallpʼaj tukuy kʼuchusnintinpi” (Mat. 28:19, 20). Sichus Biblia nin qhatiykachasqa kananchejta chay, ¿imaynatataj chay ruwayta juntʼasunchej?

Hechos libroqa willawanchej imaynatachus ñaupa tiempopi apostoleswan waj cristianoswan ima Jehovaj yanapayninwan willasqankuta. Kay librotaj wakichisqa kashan imasmantachus Hechos libro parlan chay imasta estudianapaj, imaynachus chaykuna kasqanpitaj tʼukurinapaj. Chantá ñaupa cristianoswan kay tiempomanta cristianoswan kikin kasqanchejta yachakuspa mayta tʼukusunchej. Ñaupa cristianosmanqa mana willasqallanchejpichu rijchʼakunchej, manaqa imayna wakichisqachus kasqanchejpipis. Chay tukuy imaspi rijchʼakusqanchejta yachakoyqa Jehovapuni kay jallpʼapi kaj llajtanta ñaupajman apashasqanpi creeyninchejta astawan sinchʼiyachenqa.

Jehovaqa kallpachawasun, atiytataj qowasun aguantanapaj. Chayrayku Tatanchej Jehovamanta mañakuyku pay chayta ruwananpi astawan atienekunaykichejpaj. Chantapis suyayku kay libromanta yachakuy ‘Diospa Gobiernonmanta allinta sutʼinchanallaykichejpajpuni’ yanapasunaykichejta. Wajkunatapis wiñay kausayman pusaj ñanninta rinankupaj wajyarinaykichejpaj yanapasunaykichejta (Hech. 28:23; 1 Tim. 4:16).