Mo ita, so mo yeke wafango tënë:

Bâ so mo yeke mbeni bazengele na ndö ti Hoto ti akeke ti olive; mo ye ti bâ, Jésus asi. So lo ye ti monté na yayu, lo tene na mo na amba ti mo, lo tene: “Ala yeke wara ande ngangu tongana yingo vulu aga na ndö ti ala, ala yeke duti atémoin ti mbi na Jérusalem, na yâ ti Judée kue nga na Samarie, nga juska na ambage ti sese so ayeke tâ yongoro.” (Kus. 1:8). Nyen la mo yeke sara?

Peut-être mo bâ so kua ni ahon ngangu ti mo. Mo lingbi ti hunda terê ti mo, mo tene: ‘So e yeke mingi ape so, e yeke sara tongana nyen ti fa tënë “juska na ambage ti sese so ayeke tâ yongoro”?’ Peut-être mo dabe ti mo na wango so Jésus amû na bï so si na ndade ni lo kui: “Mbeni ngbâa ayeke kota ahon wa ti lo pëpe. So azo ni asara ye ti ngangu na mbi, ala yeke sara ande ye ti ngangu na ala nga. So ala bata tënë ti mbi, ala yeke bata ande tënë ti ala nga. Me ala yeke sara ande aye so kue na ala ndali ti iri ti mbi, ngbanga ti so ala hinga pëpe Lo so atokua mbi.” (Jean 15:20, 21). Na ngoi so mo yeke gbu li ti mo na ndö ti atënë so, mo peut ti hunda terê ti mo, mo tene: ‘Mbi peut ti ngbâ ti fa tënë tongana nyen tongana a yeke gi ti kanga lege na mbi wala a yeke sara ye ti ngangu na mbi?’

A yeke mara ti atënë so la e yeke hunda na terê ti e laso. Kua so a mû na e aTémoin ti Jéhovah ayeke ti tene e fa tënë “juska na ambage ti sese so ayeke tâ yongoro” si “azo na popo ti amara kue” amä ni (Mat. 28:19, 20). Me so e hinga so a yeke sara ye ti ngangu na e, e lingbi ti sara kua so tongana nyen?

Mbeti ti Kusala ti aBazengele afa na e tongana nyen la na ngoi ni so, Jéhovah amû maboko na abazengele nga na ambeni Chrétien ti sara kua so. Buku so mo yeke diko so ayeke aidé mo ti hinga mingi ti aye so asi na aChrétien so nga ti bâ tongana nyen la terê ti ala anzere lani ti bâ kua ti fango tënë so ayeke gue na li ni hio hio. Li ti mo ayeke kpe ti bâ so gbâ ti aye ayeke oko na popo ti awakua ti Jéhovah ti ândö na e laso. Mo yeke bâ so kua so e na ala e sara ayeke oko nga lege so a leke na yâ ti kua ti e ni ayeke oko. Ti gbu li na ndö ti aye so atingbi e na ala ayeke sara si mo yeke hinga nzoni ahon ti kozo so Jéhovah Nzapa ayeke ngbâ ti fa lege nzoni na mbage ti bungbi ti lo so ayeke na sese ge.

E yeke na beku nga e sambela ti tene mandango Mbeti ti Kusala ti aBazengele so asara si mo yeke na confiance mingi so Jéhovah ayeke aidé mo nga so yingo vulu ti lo ayeke mû ngangu na mo ti gbu ngangu. Ti sara ye alingbi na aye ti manda ti yâ ti buku so ayeke aidé mo ti ngbâ ti ‘fa nda ti tënë ni kue’ na ndö ti Royaume ti Nzapa nga ti aidé ambeni zo ti mû lege ti fini.—Kus. 28:23; 1 Tim. 4:16.