Ikháanʼla a̱ngui̱nʼ bi̱ nutaráʼa ga̱jma̱a̱ numuu Xa̱bu̱ ñajunʼ ndrígóo Dios:

Gundxaʼwamíjna̱ dí ni̱ndxu̱lú mbáa apóstol, kuwáánʼlú náa kúbá Olivos, ikhí nakujmaa Jesús nákha xóó tsétsima̱a̱ mekhuíí, naʼthúlú: “Mundrígúla tsiakii índo̱ espíritu santo gáʼkha̱ náa ikháanʼla. Mu̱tala ga̱jma̱a̱ numuʼ náa Jerusalén, náa xúgíʼ Judea ga̱jma̱a̱ náa Samaria, ma̱ngaa asndu náa naguámbári̱go̱o̱ numbaaʼ” (Hech. 1:8). Dí gúʼni rá.

Mbáa namíñulú mu̱ʼni̱ ñajunʼ mba̱a̱ rígi̱ o asndu muraximíjna̱lú: “Xú káʼnii gándoo guʼgua̱ ku’yulú ajngáa rígi̱ “asndu náa naguámbári̱go̱o̱ numbaaʼ” á mu káaʼ nguajmáánʼ rá. Mbáa maʼni mundxaʼwamíjna̱ dí niʼthí Jesús nákha xóó tsékháñuu: “Ñumbáá na̱nguá gíʼdoo itháan numuu ki xóo patriúun. Á mu ikhiin nixkoʼ, mangáanʼ má muxkala; á mú ikhiin ninimbu̱ún rí ni̱tha̱ xúʼko̱ má ma̱ngaa munimbu̱ún dí muthu̱u̱n. Ga̱jma̱a̱ numuu mbiʼyuʼ, ikhiin muniala xúgíʼ rígi̱, numuu dí tséniʼniiʼ bi̱ nikungu̱u̱nʼ” (Juan 15:20, 21). Mbáa ajngáa rígi̱ maʼni dí muʼthálú, “xú gáʼngulú gúʼtaraʼa ajngáa rígi̱ á mu kúwá bi̱ tsíñún gudxawíín ga̱jma̱a̱ bi̱ muni̱ gínáán rá.”

Asndu dí mbiʼi xúgi̱ nuʼnimi̱jna̱lú ikha̱á má graxe̱ xóo rígi̱, numuu dí mangáánʼ ndayóoʼ mu̱ʼgua̱ kuʼyúlú ajngáa rígi̱ ‹asndu náa naguámbári̱go̱o̱ numbaaʼ› ma̱ngaa ndayóoʼ muʼsngúún “xa̱bu̱ bi̱ kúwá náa xúgíʼ xuajen” (Mat. 28:19, 20). Xú káʼnii guʼnimbáníí ñajunʼ rígi̱ á mu náa Biblia niʼtáriyaʼ dí muni gínáanʼ xá.

Náa libro Hechos dí nini̱ Apóstoles, ikhí na̱ʼkha̱ raʼthí xú káʼnii Jeobá nimbáñún mutaraʼa ikhiin ga̱jma̱a̱ eʼwíinʼ a̱ngiu̱lú bi̱ nikúwá nákha siglo timbá. I̱yi̱ʼ rígi̱ niguma májáánʼ mu mbuʼyáá ndiéjuunʼ ni̱ʼkha̱ rarígá. Mbuʼyáá xú káʼnii embríguíi xóo nikúwá a̱ngiu̱lú nákha timbá siglo ga̱jma̱a̱ bi̱ kúwá rí mbiʼi xúgi̱. Raʼkháa i̱ndó naʼthí ga̱jma̱a̱ numuu dí xóo muʼtáraʼa ma̱ngaa naʼthí ga̱jma̱a̱ numuu awan dí nagájnuu mu maguma ñajunʼ rígi̱. Índo̱ nduʼyáá xóo nirígá nákha ginii ga̱jma̱a̱ dí mbiʼi xúgi̱, naʼni dí fe ndrígulú maʼni gújkhúʼ xó má fe dí niguáʼdáá a̱ngiu̱lú nákha wajyúuʼ ma̱ngaa naʼni mbuʼyáá dí Jeobá naxná ikhoo xuajñuu dí mbiʼi xúgi̱.

Nutajkháanxu mu dí i̱yi̱ʼ rígi̱ mambáyulú makumulú kuʼyáá itháán Jeobá índo̱ gúʼnigajma̱a̱ ma̱ngaa dí maxnúlú espíritu ndrígóo mu ‹muʼtáraʼa kájxi̱› ga̱jma̱a̱ numuu Xa̱bu̱ ñajunʼ ndrígóo Dios ma̱ngaa dí mumbáñún xa̱bu̱ mu makáwíin (Hech. 28:23; 1 Tim. 4:16).