Kala hermanoʼik cholumanik sbʼaja sGobyerno ja Dyosi:

La jpensaraʼuktik ke keʼntik june ja bʼa jekabʼanumiki sok teyotik ja bʼa wits Olivo. Ja Jesús wantoxa chʼak sjeʼ sbʼaj jmoktik, sok bʼajtanto oj kumxuk ja bʼa satkʼinali, wa xyala kabʼtik: «Ojni ajukawilex ipal yajni xkoʼ abʼajex ja yip ja Dyosi. Sok oj kʼotanik jtestigoʼik ja bʼa Jerusalén, bʼa yibʼanal ja Judea sok ja Samaria, sok bʼa yibʼanal ja luʼumi» (Hech. 1:8). ¿Jastal maʼ oj kabʼtik?

Bʼobʼta wani xyaʼa xiwel yuja niwan aʼtel it sok wa xjobʼo jbʼajtik: «Pe yuja jel tʼusanotiki, ¿jastal oj lajxuk bʼa oj choltik ‹bʼa yibʼanal ja luʼumi›?». Bʼobʼta wani xjul jkʼujoltik ja jas yala ja Jesús ja akwal bʼajtanto oj chamuki: «Ja mosoʼali mi mas ekʼxel yuja yajwali. Ta ja yeʼnle yiʼajeta jpatik, ojni cha yiʼ apatikex ja weʼnlexi; ta ja yeʼnleʼi skʼuʼaneta ja jas kaluneji, ojni cha skʼuʼuke jawa bʼajexi. Yuja jbʼiʼili, ja yeʼnleʼi oj skʼulukawilex yibʼanal ja jastik iti, yujni mi snaʼawe sbʼaj ja Maʼ sjekawoni» (Juan 15:20, 21). Ta jpensaraʼantik ja bʼa yaljelik it, bʼobʼta ojni kaltik: «¿Jastal oj bʼobʼ jcholtik tsʼikan lek ta oj ajyuk jkontratik bʼa oj yiʼe jpatiktik?».

Ja wego la waj jkʼujoltik ja bʼa tyempo ayotiki. Ja testigoʼotik bʼa Jyoba jachtik wala taxtik. Ja keʼntiki cha ay kiʼojtik ja cholal bʼa xcholjel tsʼikan lek «bʼa yibʼanal ja luʼumi» sok cha jachuk «ja kristyanoʼik bʼa spetsanil ja chonabʼiki» (Mat. 28:19, 20). Pe ta ja Biblia yalunejkan oj ijuk jpatiktik, ¿jastalxa oj lajxukujtik skʼulajel?

Ja libro bʼa Hechos wa xcholo kabʼtik jastal ja jekabʼanumik sok ja tuk snochumanik Kristo ja bʼa bʼajtan siglo skʼulane ja yaʼtele soka skoltanel ja Jyoba. Ja libro it chapubʼal bʼa oj skoltayotik spaklajel sok yajel ekʼ bʼa jpensartik ja jastik ekʼ bʼa jel cham yabʼjel. Chamtoni oj kabʼtik yajni xkilatik ja jastik jel jitsan slaja sbʼaj ja jas ekʼ sbʼaje ja bʼajtan snochumanik Kristo sok ja bʼa jtyempotiki. Ojni kiltik ke mi kechan wa staʼa tiʼal sbʼaja kaʼteltiki, cha tini chʼikan ja jastal modo chapan lek wa xkʼulaxi. Yajni xpaklaytik ja jastik wa slaja sbʼaji, ojni yijbʼuk ja skʼuʼajel kiʼojtik ke man wego ja Jyoba Dyos wan stojel ja parte bʼa yorganisasyon ja bʼa Luʼumi.

Wa xkatikonyi orasyon bʼa weʼnlex, bʼa jachuk ja spaklajel ja libro bʼa Hechos ja jastik skʼulane ja jekabʼanumiki oja jipa kʼujolex mas ke ja Jyoba oj yaʼ yijbʼanik mas sok oj skoltayex soka yipi. Sok wa xjipa jkʼujoltikon ke ojni stsatsankʼujolukex bʼa mi oja waʼexkan xcholjel «tsʼikan lek sbʼaja sGobyerno ja Dyosi» sok slokjel mas kristyanoʼik bʼa oj ajyuke ja bʼa sbʼejlalil ja sakʼanili (Hech. 28:23; 1 Tim. 4:16).