Yes Pablisa Bilong Kingdom:

Tingim olsem yu wanpela bilong ol aposel i sanap long maunten Oliv, na Jisas i kamap long ai bilong yu. Taim em i laik go antap long heven, em i tok: “Yupela bai kisim strong taim holi spirit i kam i stap long yupela. Na yupela bai stap witnes bilong mi long Jerusalem na long olgeta hap bilong Judia na Samaria, na i go inap long olgeta hap bilong graun.” (Apo. 1:8) Bai yu mekim wanem taim yu harim dispela tok?

Ating bai yu pilim olsem dispela wok i bikpela tumas. Yu inap tingting, ‘Olsem wanem mipela—liklik lain disaipel—inap autim tok “i go inap long olgeta hap bilong graun”?’ Ating yu tingim tok lukaut Jisas i bin mekim long nait paslain long em i dai, em i tok: “Wokboi i no winim bosman bilong em. Sapos ol i bin mekim nogut long mi, orait ol bai mekim nogut long yupela tu. Na sapos ol i bin bihainim tok bilong mi, orait ol bai bihainim tok bilong yupela tu. Nem bilong mi i stap long yupela, olsem na ol bai mekim ol dispela samting nogut long yupela. Ol i mekim olsem, long wanem, ol i no save long Man i bin salim mi i kam.” (Jon 15:20, 21) Taim yu tingim ol dispela tok, ating bai yu askim yu yet, ‘Olsem wanem mi inap autim gut tok taim ol man i mekim kain pasin birua long mi?’

Yumi inap mekim ol wankain askim long nau. Yumi ol Witnes Bilong Jehova, na yumi gat wok bilong autim gut tok “i go inap long olgeta hap bilong graun,” long “olgeta lain man.” (Mat. 28:19, 20) Tasol olsem wanem yumi ken inapim dispela wok, na moa yet sapos ol man i mekim nogut long yumi, olsem Baibel i tok profet long en?

Buk Aposel i stori gut tru long olsem wanem ol aposel na ol bratasista long bipo, i bin inapim wok bilong ol long rot bilong helpim Jehova i givim. Ol i wokim dispela buk nau yu ritim, bilong helpim yu long skelim gut stori bilong ol dispela Kristen long bipo na pilim tru ol samting i bin painim ol. Yu bai kirap nogut long lukim olsem planti samting bilong ol wokboi bilong God long bipo, i wankain long ol wokboi bilong em long nau. Bai yu lukim olsem ol wok yumi mekim na pasin bilong oganaisim ol dispela wok, i wankain. Taim yu skelim ol dispela samting, dispela bai strongim bilip bilong yu olsem God Jehova i wok yet long stiaim oganaisesen bilong em hia long graun.

Mipela i prea na i gat bikpela laik olsem taim yu stadi long Buk Aposel, dispela bai strongim yu long bilip olsem Jehova bai helpim yu na holi spirit bilong em bai strongim yu. Olsem na wok yet long “autim gut tru” tok bilong Kingdom Bilong God na helpim ol narapela man long wokabaut long rot i go long laip.​—Apo. 28:23; 1 Tim. 4:16.