Talofa te Tino Talai o te Malo:

Ke fakaataata i tou mafaufau me i a koe se tokotasi o te kau apositolo telā e tu atu i te Mauga o Olive, kae ko fakasae mai a Iesu i otou mua. Kae mai mua malie o fanaka a ia ki te lagi, ne fai atu a ia, penei: “Ka maua ne koutou a te ‵mana māfai e oko atu te agaga tapu ki luga i a koutou, kae ka fai koutou mo molimau ki a au i Ielusalema, i Iuta kātoa mo Samalia, ke oko eiloa ki toe koga ‵mao i te lalolagi.” (Galu. 1:8) Ka saga atu koe pefea ki ei?

Kāti ka manavase koe ona ko te lasi o te galuega e ‵tau o fai. Kāti ka mafaufau koe penei, ‘E mafai pefea ne matou—te tamā potukau o soko—o molimau atu ki “toe koga ‵mao i te lalolagi”?’ Kāti e masaua ne koe a pati a Iesu ne fai mai mua o tena mate: “E se sili atu te pologa i tena matai. Kafai ne fakasaua mai latou ki a au, ka fakasaua atu foki ki a koutou; kafai ne faka‵logo latou ki aku muna, ka faka‵logo foki ki otou muna. Kae ka fai ne latou a mea katoa konei o ‵teke ki a koutou ona ko toku igoa, me e se iloa ne latou a te Atua telā ne uga mai ne ia au.” (Ioa. 15:20, 21) A te mafaufau ‵loto ki pati konā e mafai o fai ei ke fesili ifo koe, penei ‘E mafai pefea o molimau katoatoa atu au i taimi o ‵tekemaiga mo fakasauaga?’

Konā foki eiloa a fesili e ‵sae aka i ‵tou mafaufau i aso nei. A te ‵tou galuega e pelā me ne Molimau a Ieova e manakogina foki i ei ke molimau maea atu tatou ki “toe koga ‵mao i te lalolagi,” e pelā foki mo ‘tino mai fenua katoa.’ (Mata. 28:19, 20) E mafai pefea o fakataunu a te galuega tenei, maise i ei ko ‵tekemaiga kolā ka fe‵paki mo tatou?

E fakamatala mai i te Galuega a Apositolo a tala e uiga ki te auala ne mafai ei ne te kau apositolo fakatasi mo olotou taina Kelisiano o fakataunu ne latou te lotou galuega i te senitenali muamua T.A., i te fesoasoani o Ieova. A te tusi tenei e faitau koe ki ei ne fakatoka ke mafai o sukesuke koe ki te tala tenā kae ke iloa ne koe a mea fakaofoofogia kolā ne ‵tupu i ei. Ka ofo malosi koe i te uke o mea ne fai ne tavini i te senitenali muamua kolā e ‵pau mo mea e fai ne ana tino i aso nei. Ka lavea ne koe me e se ‵pau fua a te galuega telā e fai ne tatou, kae penā foki loa mo te auala e fakatoka ei ne tatou a te faiga o te galuega tenā. A te mafaufau ‵loto ki auala e tai ‵pau konā ka fakamalosi aka eiloa i ei a tou loto talitonu me koi takitaki eiloa ne Ieova te Atua a tena fakapotopotoga saukātoa i te lalolagi i aso nei.

E fakamoe‵moe kae ‵talo matou me i te sukesuke ki te tusi ko Galuega ka fakamalosi aka i ei te ‵tou loto talitonu me ka fesoasoani mai a Ieova ki a koe kae ka fakamalosi aka koe ne te ‵mana o tena agaga tapu. Tela la, ke na maua eiloa ne koe te malosi ke “molimau maea” atu e uiga ki te Malo o te Atua kae fesoasoani atu ki nisi tino ke sa‵sale i te auala ki te ola.—Galu. 28:23; 1 Timo. 4:16.