Kermanotak te ya acholik te Wentainel yuʼun te Diose:

Jnop kaʼiytik te joʼotik te jpuk-kʼopotik sok te ayotik ta wits yuʼun Olivoetik. Te Jesús chiknaj ta jtojoltik sok te kʼalal mato xmo bael ta chʼulchan-ae, jich la yalbotik: «Yame awichʼ awuʼelik te kʼalal ya xjul ta atojolik te chʼul espiritue. Testigo ya xkʼoex kuʼun ta Jerusalén, ta spamal skʼinal Judea sok ta Samaria, sok kʼalalto ta stiʼil te balumilale» (Hech. 1:8). ¿Binwan yaʼiyel la kaʼiy jbatik te jichuke?

Yaniwan xiwotik yuʼun te mukʼul aʼtelil la kichʼtik akʼbeyel sok yaniwan jojkʼoybey jbatik: «Te bitʼil maba bayalotike, ¿bin-utʼil ya xjuʼ ya jcholtik skʼop Dios ‹kʼalalto ta stiʼil te balumilale›?». Sok yaniwan xjul ta koʼtantik te bin la yal Jesús te kʼalal junxanix ajkʼabal ya skʼan ya xlaj-ae: «Te j-abate ma jaʼuk toyolxan ta stojol te yajwale. Teme la skontrainonike, jaʼnix jich ya skontrainex-euk; teme la schʼuunbonik te jkʼope, jaʼnix jich ya schʼuunbeyex-euk te akʼopike. Ta swenta te jbiile, jichme ya spasbeyex spisil ini, melel ma snaʼbeyik sba te machʼa la stikunon tale» (Juan 15:20, 21). Ta swenta te bin la yal te Jesús, yaniwan xjuʼ ya kaltik: «¿Bin-utʼil ya xjuʼ ya jcholtik te skʼop Dios te bitʼil bayal jkontrataktik?».

Ta kʼajkʼal ini, te testigootik yuʼun Jehová jaʼnix jich ay ta jwentatik scholel te skʼop Dios «kʼalalto ta stiʼil te balumilale» sok «ta spisil nacionetik» (Mat. 28:19, 20). Pero, ¿bin-utʼil ya xjuʼ kuʼuntik spasel teme ya kichʼtik kontrainel jich bitʼil yaloj te Bibliae?

Te libro yuʼun Hechos ya scholbotik kaʼiytik bin-utʼil te jpuk-kʼopetik sok te yantik jchʼuunjeletik ta sbabial siglo la spasik te aʼtelil ini ta swenta te koltayel yuʼun Jehová. Te libro ini la yichʼ pasel swenta ya skoltayotik ta snopbeyel skʼoplal sok yuʼun ya kiltik kʼoem te bintik kʼot ta pasele. Ya kilbeytik skʼoplal bin-utʼil pajal kʼoemik te jchʼuunjeletik ta sbabial siglo sok te jchʼuunjeletik ta kʼajkʼal ini. Ma jaʼuknax ya yalbey skʼoplal te scholel skʼop Dios, jaʼnix jich ya yalbey skʼoplal bin-utʼil chajpanbil te aʼtelil-abi. Kʼalal ya kiltik bin-utʼil pajal kʼoemotik sok te jchʼuunjeletik, yame jchʼuuntikxan te jaʼ yak ta stojobtesel te Jehová te organización yuʼun ta Balumilal.

Ya jkʼopontik Dios ta atojolik swenta jich te kʼalal ya anopik te libro yuʼun Hechos ya xmukʼubxan te smukʼul awoʼtanik ta stojol te Jehová te jaʼ ya yakʼbeyex yip awoʼtanik sok ya skoltayex ta swenta te schʼul espíritu. Jnaʼojtik te ya stijbeyex awoʼtanik ta scholel «ta tsʼakal» te lek yachʼil kʼop yuʼun te Wentainel yuʼun Dios sok te ya akoltayik te ants winiketik yuʼun ya sta skuxlejalik (Hech. 28:23; 1 Tim. 4:16).