Ighwoghwota Eghanghanre:

Vwẹ ẹwẹn roro nẹ owẹ ọvo usun rẹ iyinkọn ri mudia enu rẹ Ugbenu rẹ Oliv. Jesu vwomaphia vwẹ obaro wẹ. Jẹ, tavwen ro ki kpo odjuvwu, ọ da ta: “Ovwan che vwo ogangan ọke rẹ ẹwẹn ọfuanfon na de bru ovwan rhe, kẹ ovwan cha dia iseri mẹ vwẹ Jerusalẹm, vwẹ Judia kugbe Sameria ejobi, rhirin re te asan ro me sheri vwẹ akpọ na.” (Iru 1:⁠8) Mavọ yen oma che ru we?

Ọkiọvo, oshọ se mu we fikirẹ oborẹ iruo na rho te. Wo se roro, ‘Mavọ yen avwanre re dia ẹmẹko rẹ idibo nana se vwo soseri “re te asan ro me sheri vwẹ akpọ na”?’ Wọ sa karophiyọ orhọesio ri Jesu vwọphia vwẹ ason rọ koba tavwen o ki ghwu: “Odibo rho nọ onini rọye-en. Ọ da dianẹ ayen mukpahen ovwẹ, ayen ji che mukpahen ovwan; ọ da dianẹ ayen ru nene ota mẹ, ayen ji che ru nene e rẹ ovwan. Ẹkẹvuọvo ayen che ru erọnvwọn nana eje vwọso ovwan fikirẹ odẹ mẹ, kidie ayen riẹn Ohwo ro ji vwe rhe na-a.” (Jọ 15:​20, 21) Ọke wo de roro kpahan eta yena, wọ sa nọ oma wẹn, ‘Mavọ yen mi se vwo soseri ro fiotọ siẹrẹ mi de hirharoku ẹvwọsuọ vẹ omukpahen tiọyena?’

Avwanre ji hirarokuẹ enọ tiọyen nonẹna. Iruo ro te avwanre kerẹ Iseri ri Jihova yen, avwanre ji vwo soseri ro fiotọ vwọ kẹ “ihwo rẹ ẹgborho na eje” “re te asan ro me sheri vwẹ akpọ na.” (Mt 28:​19, 20) Mavọ yen e se vwo ruiruo nana gba, ma rho ọ vwọ dianẹ e rhẹro rẹ ẹvwọsuọ ra mraro rọyen phiyotọ jovwo na?

Ọbe rẹ Iruo rẹ Iyinkọn Na gbikuegbe rọ vwerhen oma kpahen oborẹ iyinkọn na vẹ Inenikristi efa vwẹ ẹgbukpe ujorin rẹsosuọ se vwo ruiruo rayen gba womarẹ ukẹcha ri Jihova. A rhuẹrẹ ọbe nana ru wo se na phiyọ rere ọ sa chọn wẹ uko vwọ fuẹrẹn ikuegbe yena je mrẹ oma wẹn vwẹ ẹdia rẹ ihwo re gbikun rayen na. O che gbevwunu wọ vwọ riẹn nẹ idibo rẹ Ọghẹnẹ re herọ nonẹna je họhọ idibo rẹ Ọghẹne ri yerin vwẹ ẹgbukpe ujorin rẹsosuọ vwẹ idjerhe buebun. Wọ cha mrẹvughe nẹ ọ dia iruo rẹ avwanre ruẹ na ọvo yen avwanre vwọ họhọ ohwohwo-o, ẹkẹvuọvo ji te oborẹ avwanre ruiruo nana wan. Wo vwo roro kpahen ọnana na, aphro herọ-ọ nẹ imuẹro ru wo vwori nẹ Jihova Ọghẹnẹ yen je vwẹ odjekẹ vwọ kẹ ẹbẹre ukoko rọyen rọhẹ otọrakpọ na cha ganphiyọ.

Ọyen ọdavwẹ rẹ avwanre nẹ ẹfuẹrẹn rẹ ọbe rẹ Iruo rẹ Iyinkọn Na cha nẹrhẹ imuẹro wẹn ganphiyọ nẹ Jihova cha chọn wẹ uko ji bicha wẹ womarẹ ẹwẹn ọfuanfon rọyen. E jẹ udu wẹn gan ọkieje wo vwo “soseri ro fiotọ” kpahan Uvie rẹ Ọghẹnẹ je chọn ihwo efa uko vwo vwo usivwin na.​—⁠Iru 28:23; 1Ti 4:⁠16.