Ngak Reb e Tamachib:

Mu susunnag ni gur bagayad fapi apostal ni gab sak’iy u daken fare Burey ni Olives. Ngemu’ me yib i m’ug Jesus ngomed. Nap’an ni be n’en ni nge sul nga tharmiy, me gaar: “Bay yib gelngimed ko ngiyal’ ni bay yib fare Kan ni Thothup [“gelngin Got nib thothup,” NW] riy nga dakenmed, ma aram mi gimed weliy murung’ageg u lan yu Jerusalem, ngu lan yu Judea ni polo’, ngu lan yu Samaria, nge yan i mada’ ko yungi n’en ni yan i mus e fayleng ngay.” (Acts 1:8) Ere mang e ga ra rin’?

Sana ga ra lemnag ni n’en be yog Jesus ni ngam rin’ed e dabiyog romed. Ere rayog ni nge lungum u wan’um, ‘Uw rogon ni nggu machibgad nge yan i mada’ ko “yungi n’en ni yan i mus e fayleng ngay” ni yugu aram rogon ni gamad buchuuw?’ Sana ra yib ngan’um fare ginang ni pi’ Jesus ko fare nep’ u m’on ni nge yim’ ni gaar: “Dariy reb e sib ni ba ga’ ngak e masta rok. Faanra kar gafgowniged gag, ma bay kur gafgowniged gimed; ma faanra kar folgad ko thin rog, ma bay kur folgad ko thin romed. Machane urngin e pi n’ey ni bay rrin’ed ngomed ni bochan e gimed girdieg; ya dar nanged e en ni ir e ke l’ugeg ku gub.” (John 15:20, 21) Nap’an ni ga ra lemnag e pi thin ney, ma sana ga ra fithem ni nge lungum, ‘Uw rogon nrayog ni nggu machib nib fel’ rogon ni yugu aram rogon gelngin e togopuluw nge gafgow ni yibe tay ngog?’

Ku aram rogon e n’en gad be mada’nag e ngiyal’ ney. Bochan ni gadad e Pi Mich Rok Jehovah, ma thingar da machibgad nib fel’ rogon nge yan i mada’ ko “yungi n’en ni yan i mus e fayleng ngay,” ma gad machibnag “girdien e pi nam u gubin yang.” (Matt. 28:19, 20) Uw rogon nrayog ni ngad rin’ed e re maruwel ney ni yugu aram rogon ni ka nog u m’on riy ni yira togopuluw ngodad?

Fare babyor ni Acts e be weliy rogon ni yag rok e pi apostal nge pi Kristiano ko bin som’on e chibog C.E. ni ngar rin’ed e maruwel ni kan pi’ ngorad u daken e ayuw rok Jehovah. Re ke babyor ney ni ga be beeg e chiney e kan ngongliy ni nge ayuwegem ni ngam fil murung’agen e pi n’ey ni i buch, mag guy rogon e felfelan’ ni i tay e pi Kristiano ney u nap’an nra guyed rogon feni papey ni be mon’og fare maruwel ni machib. Ga ra ngat ngay ni boor ban’en ni i buch ko pi tapigpig rok Got ko bin som’on e chibog nib taareb rogon ko n’en be buch ko girdi’ rok e ngiyal’ ney. Ga ra guy ni gathi kemus ni taareb rogon e maruwel ni gad be rin’ ya ka ga ra guy ni taareb rogon ni yibe yarmiy. Nap’an ni ga ra fal’eg i lemnag e pi n’ey ma dariy e maruwar riy nra mich u wan’um ni be ulul Jehovah Got ni nge pow’iy e ulung rok u fayleng.

Gamad be athapeg maku gamad be yibilay ni n’en ni ga ra fil ko fare babyor ni Acts e ra ayuwegem ni ngari pagan’um nra ayuwegem Jehovah maku ra pi’ gelngin nib thothup gelngim ni ngam athamgil. Ere manga yigi pi’ e pi n’ey e athamgil nga lanin’um ni ngam ulul i “machibnag” murung’agen Gil’ilungun Got nib fel’ rogon, mag ayuweg yugu boch e girdi’ ni ngar leked fare pa’ i kanawo’ ni be sor i yan ko yafos ni manemus.​—Acts 28:23; 1 Tim. 4:16.