Nkanda Kuidi Minsamuni mi Kintinu:

Yindula ti ngie widi wumueka mu bapostolo widi wutelama mu mongo wu minti mi Olive. Yesu wuba monikina ayi ava kenda ku diyilu wuba kamba: “Bo phevi yinlongo yala kulumuka mu benu, luala tambula mangolo ayi luala ba zimbangi ziami ku Yelusalemi, ku Yuda, ku Samalia ayi nati kusukila nza.” (Mava. 1:8) Mambu mbi bawu bavanga?

Ḿba wulenda ba mu boma mu kuyindula kisalu kiwombo tuidi muingi kuvanga. Ayi wulenda kuyikuvusa: ‘Buidi befu mu kuba dingumba diluelu, tulenda nunga kuvana kimbangi “nati kusukila nza”?’ Tulenda tebuka moyo ndubu Yesu kavana va builu ava kafua: “Mvika kasa lutila ko mfumu’andi. Boti bathovula, buna benu mvinu bala lutovula ayi boti batumukina mambu mami, buna bala tumukina mvandi mambu minu. Vayi bala luvangila mambu moso amomo, mu kibila ki dizina diama, kibila bawu basa zaba ko no wuthuma.” (Yoa. 15:20, 21) Mu kuyindula mambu amomo, ngie wulenda kuyikuvusa: ‘Buidi tulenda vanina kimbangi kioso mu kutadila zikhuamusu tumviokilanga?’

Bubu, befu tumviokilanga mu momawu mambu. Mu kuba Zimbangi zi Yave, kiyeku kitu mvandi kidi kuvana kimbangi kioso “nati kusukila nza” kuidi “batu ba zitsi zioso.” (Matai 28:19, 20) Buidi tulenda dukisa kiyeku akiokio, kheti mu zikhuamusu tumviokilanga?

Buku yi Mavanga yitusadisa kumona buidi bapostolo ayi baklistu bankaka mu sekulu yitheti mu lusalusu lu Yave banunga kudukisa kiyeku kiawu. Bakubika buku ayiyi muingi yikusadisa kufiongunina bifuani bi kukuitukila bantubila mu buku beni. Wunkuiza yituka beni kumona kithuadi kidi mu baklistu mu sekulu yitheti ayi baklistu bubu. Wunkuiza mona ti tuisi ko to kithuadi mu kisalu tumvanganga vayi mvandi mu phila tuidi balulama muingi kuvanga kisalu ki kusamuna. Bukiedika kuyindula mu mambu amomo, kunkuiza kindisa lufiatu luaku ti Yave Nzambi wuntatamana kutuadisa kimvuka kiandi va ntoto.

Tuntomba ti bo wumfiongunina buku yi Mavanga yikindisa lufiatu luaku mu lusalusu lu Yave ayi mangolo ma phevi yinlongo muingi ku kukindisa. Mu phila ayoyo, wuala kindusu muingi wutatamana “kuvana kimbangi kioso” matedi kintinu ki Nzambi ayi kusadisa bankaka babakula nzila yi luvukusu.—Mava. 28:23; 1 Timo. 4:16