বাইবেলখন পঢ়াৰ আগতে ইয়াক কেনেকৈ তৈয়াৰ কৰা হৈছে, তাৰ বিষয়ে কিছু কথা জানিলে আপোনাক ইয়াৰ বিষয়ে বুজিবলৈ সহজ হ’ব। মন কৰক যে এই পবিত্ৰ শাস্ত্ৰ অৰ্থাৎ বাইবেলখন আদিপুস্তকৰপৰা প্ৰকাশিত বাক্যলৈকে ৬৬ খন কিতাপ বা ভাগত বিভক্ত কৰা হৈছে।

এতিয়া এক গুৰুত্বপূৰ্ণ প্ৰশ্ন হ’ল যে বাইবেলৰ লেখক কোন? প্ৰকৃততে বাইবেলখন ৪০ জন লোকে লিখিছিল আৰু ইয়াক সম্পূৰ্ণ কৰিবলৈ প্ৰায় ১,৬০০ বছৰ লাগিছিল। কিন্তু মন কৰিবলগীয়া বিষয় যে এই লেখকসকলে নিজকে কেতিয়াও বাইবেলৰ ৰচক বুলি দাবী কৰা নাই। ইয়াৰ বিষয়ে বাইবেলৰ এজন লেখকে কি কৈছে, তালৈ লক্ষ্য কৰক: “গোটেই শাস্ত্ৰ ঈশ্বৰ-নিশ্বাসিত।” (২ তীমথিয় ৩:১৬) বাইবেলৰ আন এজন লেখকে এইদৰে বৰ্ণনা কৰিছে: “মোৰ দ্বাৰাই যিহোৱাৰ আত্মাই কথা কলে, তেওঁৰ বাক্য মোৰ জিবাত আছিল।” (২ চমূৱেল ২৩:২) গতিকে ইয়াৰপৰা আমি ক’ব পাৰোঁ যে বাইবেলৰ লেখকসকলে, বিশ্বব্ৰহ্মাণ্ডৰ সৃষ্টিকৰ্ত্তা যিহোৱা ঈশ্বৰকহে বাইবেলৰ প্ৰকৃত ৰচক বুলি উল্লেখ কৰিছে। বাইবেলৰ লেখকসকলে ইয়াকো প্ৰকাশ কৰে যে যিহোৱা ঈশ্বৰে মানৱ জাতিৰ লগত এক গভীৰ সম্পৰ্ক গঢ়ি তুলিবলৈ অতি আগ্ৰহী।

বাইবেলখন ভালদৰে বুজিবলৈ হ’লে ইয়াৰ মুখ্য বিষয় কি, তাক জনাৰ অতি প্ৰয়োজন। বাইবেলৰ মুখ্য বিষয় হৈছে: স্বৰ্গীয় ৰাজ্যৰ দ্বাৰা, মানৱ জাতিৰ ওপৰত যিহোৱাৰ শাসন কৰাৰ অধিকাৰক উত্তম বুলি প্ৰমাণ কৰা। পৰৱৰ্তী অধ্যায়বোৰত আপুনি লক্ষ্য কৰিব যে বাইবেলৰ মুখ্য বিষয় কেনেকৈ আদিপুস্তকৰপৰা প্ৰকাশিত বাক্যলৈকে উল্লেখ কৰা হৈছে।

ওপৰত উল্লেখিত এই বিষয়বোৰ মনত ৰাখি, গোটেই বিশ্বজোৰি ব্যাপকৰূপে প্ৰচলিত এই কিতাপখন অৰ্থাৎ বাইবেলত দিয়া বাৰ্ত্তালৈ লক্ষ্য কৰক।