Taano ta Dapat na Siyasaton an Biblia?
Pamilyar daw kamo sa Biblia? An daing kaagid na librong ini iyo nanggad an may pinakamahiwas na sirkulasyon sa kasaysayan. Napatunayan nin mga tawo sa gabos na kultura na an mensahe kaiyan nagtatao nin karangahan asin paglaom saka an sadol kaiyan praktikal para sa aroaldaw na pamumuhay. Pero, dakol ngonyan an dikit an aram manongod sa Biblia. Baga man kamo relihioso o bako, tibaad gusto nindong siyasaton iyan. An brosyur na ini dinisenyo tanganing itao sa saindo an sumaryo kan Biblia.
BAGO nindo ponan na basahon an Biblia, makakatabang na maaraman an pirang bagay manongod sa pagkaareglar kan librong ini. An Biblia, na inaapod man na Banal na Kasuratan, sa katunayan koleksion nin 66 na libro, o seksion, na nagpopoon sa Genesis asin nagtatapos sa Kapahayagan, o Apocalipsis.
Siisay an autor kan Biblia? Interesante an hapot na iyan. An totoo, an Kasuratan isinurat nin mga 40 lalaki sa laog nin mga 1,600 na taon. Pambihira nanggad, dai sinabi kan mga lalaking iyan na sinda an autor kan Biblia. An saro sa mga kagsurat nagsabi: “An gabos na Kasuratan ipinasabong nin Dios.” (2 Timoteo 3:16) An saro pa sa mga kagsurat nagsabi: “An espiritu ni Jehova iyo an nagtaram paagi sa sako, asin an saiyang tataramon yaon sa sakong dila.” (2 Samuel 23:2) Sa siring, sinabi kan mga kagsurat na si Jehova Dios, an Supremong Namamahala sa uniberso, iyo an Autor kan Biblia. Ihinayag kan mga kagsurat na gusto nin Dios na magin harani sa mga tawo.
May saro pang bagay na mahalagang marhay tanganing masabotan an Biblia. An Kasuratan igwa nin sarong pinakatema: an pagbindikar kan deretso nin Dios na pamahalaan an katawohan paagi sa saiyang Kahadean sa langit. Sa sunod na mga pahina, maheheling nindo kun paanong an temang ini yaon sa Genesis sagkod sa Kapahayagan.
Mantang nasa isip an mga nasambitan sa enotan, estudyare ngonyan an mensahe na yaon sa pinakapopular na libro sa kinaban, an Biblia.
^ par. 9 Igwa nin manlaenlaen na paagi nin pagtao nin mga petsa. Sa brosyur na ini, an C.E. nangangahulogan nin “Common Era” (“Komun na Kapanahonan”) asin an B.C.E. nangangahulogan nin “Before the Common Era” (“Bago an Komun na Kapanahonan”). Maheheling nindo ini sa linyang nagrerepresentar sa pag-agi nin panahon na yaon sa ibaba kan mga pahina.
Puwede Mo Man Magustuhan
MANUNGOD SAMO
Ta’no ta Kaipuhan Mag-adal nin Bibliya?
Sinisimbag kan Bibliya an importanteng mga hapot sa buhay kan minilyon na tawo sa bilog na kinaban. Gusto mo daw magin saro sa sainda?
