Amu jé bia yiane yé’é Kalate Zambe?
Ye ô wô’ô lañe Kalate Zambe? Kalate ate a miasebaneya a lôté bekalate bese bôte be tiliya. Bôte ya meyoñe mese ya si be yeneya na, fôé jé j’asulu bôte minleme si a ve be ndi nlem; a melebe mé me ne fe mfi asu ényiñe ya môs ôse. Ve, den, abui bôte be nji dañe yeme jé Kalate Zambe a ye’ele. Ja’a ô ne nyebe éziñ, ja’a ô nji bo, ô ne yene mvaé ya yeme minye’elane mite. Nsoé kalate wu wo ye volô wo na ô yeme minlô mejô ya Kalate Zambe.
ÔSUSUA na wo taté nlañane Kalate Zambe, é ne mfi na ô yem aval avé a ne nta’an été wé. Kalate Zambe a loenebane fe na Mimfufup Mintilan. A bili bone bekalate 66, nge ke bifas; kalate ôsu a ne Metata’a, nyô a su’ulane a ne Nlitan.
Za ane nlô ya Kalate Zambe? Nsili ôte ô nji bo tyi’i bi. Nya ajô a ne na, bôte bebé 40 be nga tili Mintilane tañe mimbu 1 600. Ve jame ya semé é ne na, bôte bete be nji tametane na be nga tili mimfasane miap. Wua ya be be a nga tili na: “Ntilan ôse ô ne nsôane be Zambe.” (2 Timothée 3:16) Nyô mbok a nga jô na: “Nsisime Jehova ô nga kobô a ma, a ôyeme viam ô nga kobô mejô mé.” (2 Samuel 23:2) Betili Kalate Zambe bese be nga kañese na Yéhova Zambe, Njôô ya si se, nye a ne nlô ya été. Be nga liti na Zambe a kômbô na bi yeme nye.
Wo yiane yeme jam afe é ne Kalate Zambe. Mintilan mi bili nlô éfia, ñwô ôte ô ne na: nyemetane ngule Zambe a bili na a jôé bôte bese ya si a zene ya Éjôé jé é tele yôp été. Mefebe m’atoñe dina me a ye liti wo aval avé nlô éfia ôte wo yené ataté Metata’a akekui Nlitan.
Avale bi ndeme mane yene le, tame ñhe yé’é éyoñe ji mame m’aso kalate a wum abui nyi, Kalate Zambe.
^ É.N. 9 Be a tili ajô ya melu me ngone mevale meva. Nsoé kalate wu, É.J. a tinane na “Éyone Jangan” a Ô.É.J. a tinane na “Ôsusua Éyoñe Jangan.” Wo ye fe yen avale ntilane ôte mefebe méziñe si ya nsoé kalate wu.
You May Also Like
BI NE BEZA?
Amu jé bia yiane yé’é Kalate Zambe?
Kalate Zambe a ve bemilion be bôt ya si se biyalane ya beta minsili ya ényiñe. Ye wo fe wo kômbô bo môte wua ya été?
