Ońola nje jombwea Bibe̱l e?
O ko̱lo̱ngo̱ne̱ lánga Bibe̱l e? Mu mpo̱m ma kalati nde mu camane̱ o mundi ma wase mwe̱se̱ buka ye̱se̱. Bato ba matumba me̱se̱ ba so̱i ná mwe̱ndi mao mu mawana lo̱ko̱mea na dipita, malea mao pe̱ me muse̱ṅ ońol’a longe̱ la buńa te̱. Nde jita la bato we̱nge̱ ba si bi mweńa lambo jombwea Bibe̱l. Ebe̱ ná we mudúbedi to̱ ke̱m we ná o to̱ndo̱ bia nje e makwaleano̱. Nun muna kalati a boṅsane̱be̱le̱ nde o bola o wa ebongolo a nje ye o Bibe̱l.
OBIANA o mabotea lánga Bibe̱l, se̱le̱ la bia ngus’a mambo jombwea ne̱ni ni kalati e lóngedino̱ di me̱nde̱ jóngwane̱ o wa. Bibe̱l, ńena ni belabe̱ pe̱ ná Betiledi ba Bosangi, ńe nde nduta po̱ ńa 66 ma kalati ni maboteye̱ na kalat’a Bebotedi e sukan pe̱ na kalat’a Bebīsedi.
Nja ńe mbondo a Bibe̱l e? Mun muedi mu mabolise̱ bo̱ngo̱ ebolo. Mbale̱ ńe nde ná Betiledi be tilabe̱ nde na 40 ma bato o pambo a póndá ńa lambo ka 1 600 ba mbu. Kika ná ban bato ba si kai ná babo̱ nde be mbondo a Bibe̱l. Mō̱ ńa bu a kwali ná: “Betiledi be̱se̱ . . . be wu na . . . Loba.” (2 Timoteo 3:16) Nupe̱pe̱ mo̱ ná: “Yehova a mato̱po̱ o mudumbu mam, eyal’ao ye mba o bepopo.” (2 Samuel 23:2) Babo̱ be̱se̱ ba makwala so̱ nde ná, Yehova Loba, Mudiedi Ńāsam ńa misipo nde e Mbondo a Bibe̱l. Batiledi ba mabīse̱ ná Loba a mapula ná bona bato ba siseye mo̱ be̱be̱.
Lambo dipe̱pe̱ le lená le mweńa o so̱ṅtane̱ Bibe̱l. Betiledi be̱se̱ be be̱n nde tema po̱: lingea la bwam ba Loba o die̱le̱ mbel’a moto tongwea na Janea lao le o mo̱ń. O mapapa ma mabupē̱ o me̱nde̱ je̱ne̱ ne̱ni ni tema e nangano̱ o Bibe̱l ńe̱se̱, botea o kalat’a Bebotedi nate̱na o kalat’a Bebīsedi.
Ombusa nje di wuno̱ o kwalea, jombweye so̱ tatán mwe̱ndi mu maso̱bē̱ o Bibe̱l ńe nde kalati ni bian buka ye̱se̱ o wase.
^ par. 9 Mbad’a lánga la mińa ye jita. O nun muna kalati, P.A. e malangabe̱ nde ná “Pónd’ Asu” B.P.A. pe̱ ná “Biana Pónd’ Asu.” O me̱nde̱ je̱ne̱ ni mbad’a tila o mutila mu ma lee̱ póndá mwe o was’a mapapa.
We pe̠ ná o to̠ndo̠...
JOMBWEA BISO̱
Ońola nje jokwa Bibe̱l e?
Bibe̱l e mabola lodun la lokoli la bato malabe̱ ma mom ma myuedi ma longe̱ o wase ńe̱se̱. O to̱ndi be̱ mō̱ ńabu e?
