ເປັນຫຍັງຕ້ອງພິຈາລະນາຄຳພີໄບເບິນ?
ເຈົ້າລຶ້ງເຄີຍກັບຄຳພີໄບເບິນບໍ? ໜັງສືນີ້ໄດ້ແຈກຢາຍໄປກວ້າງຂວາງທີ່ສຸດໃນປະຫວັດສາດ. ຜູ້ຄົນຈາກທຸກວັດທະນະທຳພົບວ່າຂ່າວສານຈາກໜັງສືນີ້ໃຫ້ການຊູໃຈແລະຄວາມຫວັງ ຄຳແນະນຳກໍໃຊ້ໃນຊີວິດປະຈຳວັນໄດ້. ຢ່າງໃດກໍຕາມ ທຸກມື້ນີ້ຄົນສ່ວນຫຼາຍບໍ່ຄ່ອຍຮູ້ເລື່ອງຄຳພີໄບເບິນ. ບໍ່ວ່າເຈົ້າເປັນຄົນເຫຼື້ອມໃສໃນສາສະໜາຫຼືບໍ ເຈົ້າຄົງຈະຢາກຮູ້ເລື່ອງພະຄຳພີ. ວາລະສານນີ້ຈຶ່ງໄດ້ພິມອອກເພື່ອໃຫ້ເຈົ້າໄດ້ຮັບຄວາມຮູ້ແບບລວມໆຈາກຄຳພີໄບເບິນ.
ກ່ອນເຈົ້າຈັບເອົາຄຳພີໄບເບິນຂຶ້ນມາອ່ານ ຄົງຈະໄດ້ປະໂຫຍດຫາກຮູ້ວ່າໜັງສືນີ້ຮຽບຮຽງຂຶ້ນມາຢ່າງໃດ. ຕາມທີ່ຮູ້ກັນແລ້ວພະຄຳພີບໍລິສຸດກໍຄືຄຳພີໄບເບິນ ທີ່ຈິງແລ້ວເປັນໜັງສືທີ່ປະກອບດ້ວຍ 66 ພະທຳ ເລີ່ມກັບພະທຳຕົ້ນເດີມແລະຄຳປາກົດເປັນພະທຳສຸດທ້າຍ.
ໃຜເປັນຜູ້ປະພັນຄຳພີໄບເບິນ? ຄຳຖາມນັ້ນໜ້າສົນໃຈ. ທີ່ຈິງ ມີຜູ້ຂຽນພະຄຳພີປະມານ 40 ຄົນ ການຂຽນນັ້ນກວມເອົາເວລາເຖິງ 1.600 ປີ. ເປັນທີ່ໜ້າສັງເກດວ່າ ບຸກຄົນເຫຼົ່ານັ້ນບໍ່ໄດ້ອ້າງວ່າຕົນເປັນຜູ້ປະພັນຄຳພີໄບເບິນ. ຜູ້ຂຽນຄົນໜຶ່ງກ່າວວ່າ: “ພະຄຳພີໝົດສິ້ນເປັນດ້ວຍພະວິນຍານຂອງພະເຈົ້າ.” (2 ຕີໂມເຕ 3:16) ຜູ້ຂຽນອີກຄົນໜຶ່ງຂຽນໄວ້ວ່າ: “ພະວິນຍານຂອງພະເຢໂຫວາໄດ້ປາກໃນຂ້ອຍ ແລະພະຄຳຂອງພະອົງໄດ້ຢູ່ໃນລີ້ນຂ້ອຍ.” (2 ຊາເໝືອນ 23:2) ດັ່ງນັ້ນ ຜູ້ຂຽນເຫຼົ່ານັ້ນກ່າວວ່າພະເຈົ້າເຢໂຫວາຜູ້ປົກຄອງສູງສຸດແຫ່ງເອກະພົບເປັນຜູ້ປະພັນຄຳພີໄບເບິນ. ພະເຈົ້າຜູ້ປະພັນພະຄຳພີຕ້ອງການໃຫ້ມະນຸດຮູ້ຈັກພະອົງ.
ເພື່ອໃຫ້ເຂົ້າໃຈຄຳພີໄບເບິນ ຍັງມີສິ່ງທີ່ສຳຄັນອີກ. ໂດຍລວມແລ້ວພະຄຳພີມີເນື້ອໃນດຽວ: ຄືການເຊີດຊູສິດທິອັນຖືກຕ້ອງຂອງພະເຈົ້າໃນການປົກຄອງມະນຸດຊາດໂດຍທາງລາຊະອານາຈັກຝ່າຍສະຫວັນຂອງພະອົງ. ໜ້າຕໍ່ໄປເຈົ້າຈະເຫັນເນື້ອໃນນີ້ແຫຼະຢູ່ໃນສ່ວນຕ່າງໆຂອງຄຳພີໄບເບິນ ຕັ້ງແຕ່ພະທຳຕົ້ນເດີມເຖິງພະທຳຄຳປາກົດ.
ໂດຍສຳນຶກເຖິງສິ່ງທີ່ໄດ້ກ່າວມາຂ້າງເທິງ ບັດນີ້ ລອງພິຈາລະນາເບິ່ງຂ່າວສານທີ່ຢູ່ໃນຄຳພີໄບເບິນໜັງສືເຊິ່ງເປັນທີ່ຮູ້ຈັກຂອງຄົນທົ່ວໂລກ.
^ ຂໍ້ 9 ມີຫຼາຍວິທີເພື່ອເວົ້າເຖິງວັນເດືອນປີ. ໃນຈຸນລະສານເຫຼັ້ມນີ້ ສ.ສ. ໝາຍເຖິງ “ສາກົນສັກກະຫຼາດ” ແລະ ກ.ສ.ສ. ໝາຍເຖິງ “ກ່ອນສາກົນສັກກະຫຼາດ.” ເຈົ້າຈະເຫັນເສັ້ນສະແດງເຖິງວັນເດືອນປີຢູ່ກ້ອງໜ້າ.
ເລື່ອງທີ່ເຈົ້າອາດຈະມັກ
ກ່ຽວກັບເຮົາ
ເປັນຫຍັງຈຶ່ງສຶກສາຄຳພີໄບເບິນ?
ຄຳພີໄບເບິນໄດ້ຊ່ວຍຫຼາຍລ້ານຄົນທົ່ວໂລກໃຫ້ໄດ້ຮັບຄຳຕອບທີ່ສຳຄັນໃນຊີວິດ. ທ່ານຢາກເປັນຜູ້ໜຶ່ງໃນນັ້ນບໍ?
