Jun uʼj tbʼanelxix tuʼn qxnaqʼtzan tiʼj
Toj tkyaqil ambʼil, a Tuʼjil Tyol Dios mas in xi sipet twitz alkyexku juntl uʼj. ¿O kubʼ tuʼjinxi teya aju tbʼanelxix uʼj lu? Toj tkyaqil ambʼil o tzikʼ, aju tbʼanel tqanil tkuʼx toj uʼj lu o tzaj tqʼuqbʼaʼn kykʼuʼj xjal te alkyexku tnam ex aʼyeju tbʼanel kawbʼil ateʼkux toj o tzʼonin kyiʼj. Naqtzen tuʼnj, at nim xjal mitiʼxi o kubʼ kyuʼjin, ex at junjuntl —qa okslalqe moqa nya okslalqe— kyaj tuʼn tok kyojtzqiʼnxix. Qa ax ikx teya taja tuʼn tok tojtzqiʼna, aju uʼj lu jaku tzʼonin tiʼja tuʼn t-xi tzyet tuʼn tok tojtzqiʼna Tuʼjil Tyol Dios.
NAʼMXTAQ t-xi tzyet tuʼn tkubʼ tuʼjina, moqa tuʼn tkubʼ t-ẍchʼiʼna, tbʼanelxix qa ma tzʼok tbʼiʼna tnejel junjun tqanil tiʼj uʼj lu. Aju Tuʼjil Tyol Dios, ax ikx in nok qʼoʼn tbʼi te Xjan Uʼj, o che bʼaj mojbʼaʼn 66 uʼj toj. Aju tnejel uʼj Génesis tbʼi, ex aju bʼajsbʼil uʼj Apocalipsis, moqa Revelación tbʼi.
¿Al qximbʼetz tkuʼx toj Xjan Uʼj? Jun tbʼanelxix xjelbʼitz jlu. Xi tiʼn jun mil tukʼe waqaq syent abʼqʼi tuʼn tbʼaj tzʼibʼet, ex e ajbʼen junlo 40 xinaq, moqa ichan, tuʼn tkubʼ kytzʼibʼen qeju 66 uʼj atqeʼkux toj. Naqtzun tuʼnj, mi aʼl jun qʼamante qa t-ximbʼetz aju kubʼ ttzʼibʼen. Quʼn axpe ikx jun kyxol qeju ajtzʼibʼelte tqʼama jlu: «Tkyaqil aju tzʼibʼan tuj Tuʼjil, a Dios o qʼmante» (2 Timoteo 3:16). Ax ikx tqʼama juntl jlu: «Aju T-xew Qman in yolin wukʼile ex aju tyol at tuj ntziʼye» (2 Samuel 23:2). Ik tzeʼn ma tzaj qʼamaʼn, aʼyeju e kubʼ tzʼibʼente Xjan Uʼj kyqʼama qa t-ximbʼetz Jehová, aju Nimxix Toklen tibʼaj tkyaqil, kubʼ kytzʼibʼen. In tzaj qʼamaʼn kyoj t-xaq Xjan Uʼj lu qa taj Jehová tuʼn tok qojtzqiʼn, tuʼntzunju o tzaj tqʼoʼn qe.
Ax ikx ilxix tiʼj tuʼn tok qojtzqiʼn alkye xnaqʼtzbʼil nimxix toklen tkuʼx toj Xjan Uʼj: aju qa kbʼel tqʼoʼn qMan Dios jun kawbʼil toj kyaʼj tuʼntzen tel nikʼ tiʼj ex tuʼn t-xi nimen aju toklen at tuʼn tkawin kyibʼaj xjal. Toj uʼj lu ok kʼelel tnikʼa tiʼj qa aju xnaqʼtzbʼil lu tkuʼx toj tkyaqil Tuʼjil Tyol Dios, in tzaj tzyet tiʼj Génesis ex in pon bʼaj tiʼj Apocalipsis.
Qaje tuʼn t-ximana tiʼj jlu akux in nel tnikʼa tiʼj tqanil tkuʼx toj uʼj nimxix toklen twitz alkyexku juntl uʼj o kubʼ tzʼibʼen.
^ taqik' 9 At nim tten tuʼn t-xi qʼamet junjun tajlal ambʼil. Toj uʼj lu, ok che ajbʼel qe txol yol lu quʼn: tjaqʼxi ambʼil iqʼen quʼn jaʼlo (t.a.j.), ex tiʼj ambʼil iqʼen quʼn jaʼlo (a.j.). Toj junjun tajlal ambʼil tkuʼx t-xeyele t-xaq uʼj lu ok che ajbʼel qe abreviatura lu quʼn: t.a.j. ex a.j.
Bʼalo ax ikx tgana jlu
TQANIL KYIʼJ TESTIGOS DE JEHOVÁ
¿Tiquʼn bʼaʼn tuʼn t-xnaqʼtzana tiʼj Tyol Dios?—Video matij tqan
O tzʼonin Tyol Dios kyiʼj nimxix xjal tuʼn kykanet tzaqʼwebʼil nimxix kyoklen kyuʼn. In qo txokine tiʼja tuʼn t-xnaqʼtzana tiʼj Tyol Dios.
