¿Dîa muni Baibil ba laki kaikaia sa?
Baibil ba buk nani sut tila wina kau ulbi sakan sa. ¿Man naha bukka painkira ba pat aisi kaikram? Patitara piua wina, upla nisan sâtka bani wina naha bukka ra maisa nihkanka bara bîla kaikanka lâka sakisa. Baku sin, ai smalkanka nani wina yamnika sakan. Sakuna, upla manis naha bukka kau aisi kaikras, bara upla wala nani —kristian kum apia kaka kristian apia kabia sin— kau pain kakaira takaia want sa. Man baha sât uplika kum sma kaka, naha wauhkataya ba hilp mai munbia tâ krikaia dukiara.
BAIBIL ba kau aisi kaikras kainara, diara tânka kum kum pliki kaikaia sa. Baibil ba Ulbanka Holikira nani nina mâkisa bara buk 66 brisa. Pas bukka ba Blasi Sturka bara lâs bukka ba Param Marikanka.
¿Baibil ba ya wina sa? Naha ba makabi walanka pain kum sa. Mani 1.600 bilara, waitna 40 naha bukka 66 ba ulban. Sakuna, aîulbra kum sin wiras kan silp ai lukanka wina saki ulban. Kau ni, aîulbra kum win: “Ulbanka aiska ba Gâd wingka puhbra mita sika” (2 Timoti 3:16). Bara wala sin aisan: “Jehova Spiritka ba yang bîli bâk aisisa; ai bîla aisinka ba yang twisi ra sa” (2 Samuil 23:2). Yawan kaikan baku, Baibil aîulbra nani ba win Jehova Gâd, wan Papaskra ba, Ulbanka Holikira nani ba paskan. Baibil ra wan marikisa Gâd baha bukka ba wankan Witin ra kau pain kakaira takaia dukiara.
Baku sin, Baibil ba dîa dukiara aisi ba tânka briaia sa: Gâd ba king lâka kum heven ra bri ba wal daukbia Witin king aimakaia raitka bri ba upla sut kulkbia. Aisi kaiki wama ba ra nu takma Blasi Sturka bukka wina Param Marikanka ba kat naha dukiara aisisa.
Mai paiwisa Baibil tânka painkira laki kaiki wama taim baha dukiara lukma.
^ baiki.s 9 Naha wauhkataya ra manka nani dukiara aisabia taim, Yawan Piua Ninara (y.p.n.) apia kaka Yawan Piua ra (y.p.) yus munbia. Wahia mina ra mani nani ba nina prahni ra ulbia.
Baha sin laik kaikma
WAN WARKKA
¿Dîa muni Baibil stadi takaia sa?
Tasba aiska ra Baibil ba upla milian milian ra hilp munisa makabi walanka tara nani ba ansika briaia. ¿Baha uplika nani tilara kaia want sma ki?
