Ke ka Baka La’ng o Swanetše go Hlahloba Beibele?
Na o tlwaelane le Beibele? Go fihla ga bjale, puku ye ya moswana-noši e abilwe kudu go feta dipuku tše dingwe ka moka historing. Batho ba tšwago ditšong ka moka ba hweditše gore molaetša wa yona ke mothopo wa khomotšo le wa kholofelo le gore keletšo ya yona e a šoma bophelong bja letšatši le letšatši. Lega go le bjalo, batho ba bantši lehono ga ba tsebe mo gontši ka Beibele. Go sa šetšwe gore o motho wa bodumedi goba go se bjalo, mohlomongwe o rata go tseba ka yona. Poroutšha ye e hlametšwe go go nea tsebo ya motheo ya Beibele.
PELE o thoma go bala Beibele, ke gabohlokwa gore o tsebe dilo tše itšego ka tsela yeo e rulagantšwego ka yona. Beibele, yeo gape e tsebjago e le Mangwalo a Makgethwa, ge e le gabotse e dirilwe ka dipuku tše 66 goba dikarolo tšeo di thomago ka Genesi gomme di felela ka Kutollo.
Mongwadi wa Beibele ke mang? Ye ke potšišo e kgahlišago. Therešo ke gore Beibele e ngwadilwe ke banna ba itšego ba 40 ka nywaga e ka bago 1 600. Seo se makatšago ke gore banna bao ga ba bolele gore ke bona bangwadi ba Beibele. Yo mongwe wa bangwadi bao o re: “Lengwalo ka moka le buduletšwe ke Modimo.” (2 Tim. 3:16) Mongwadi yo mongwe yena o itše: “Môya wa Morêna ó bolêla ka nna, Leleme la-ka le n’e ’fokô la’xwe.” (2 Sam. 23:2) Ka gona, bangwadi ba bolela gore Jehofa Modimo, Mmuši yo a Phagamego wa legohle, ke yena Mongwadi wa Beibele. Bangwadi ba utolla gore Modimo o nyaka gore batho ba mo tsebe.
Go na le selo se sengwe gape sa bohlokwa seo se nyakegago e le gore o kwešiše Beibele. Mangwalo a na le sehlogo se tee e lego: go lwela go swanelega ga Modimo go buša batho a diriša Mmušo wa gagwe wa legodimong. Matlakaleng a latelago o tla bona kamoo sehlogo se se tšwelelago ka gona ka Beibeleng ka moka, go tloga go Genesi go fihla go Kutollo.
O sa dutše o nagana ka ditaba tšeo re sa tšwago go di bolela ka mo godimo, anke ga bjale o ahla-ahle molaetša o hwetšwago ka pukung e tsebjago kudu lefaseng, e lego Beibele.
^ ser. 9 Go na le ditsela tše fapa-fapanego tša go ngwala matšatši-kgwedi. Ka poroutšheng ye, C.E. e bolela “Mehla e Tlwaelegilego” gomme B.C.E. e bolela “Pele ga Mehla e Tlwaelegilego.” Botlaseng bja matlakala a poroutšha ye, o tla bona tšhate ya dinako yeo e hlalosago ditiragalo.
You May Also Like
MABAPI LE RENA
Ke ka Baka la Eng o Swanetše go Ithuta Beibele?
Beibele e nea dikarabo tša dipotšišo tša bohlokwa go batho ba dimillione lefaseng ka bophara. Na o ka rata go ba yo mongwe wa bona?
