Diesorọ A Vwọ Fuẹrẹn Baibol Na?
Wọ nabọ riẹn Baibol na? Ọbe oghẹresan nana yen ihwo me vwo vwọ vrẹ ẹbe efa vwẹ akpọ na. Ovuẹ rọhẹ evun rọyen kẹ koka koka rẹ ihwo onẹrhẹvwe vẹ iphiẹrophiyọ, a je reyọ uchebro rọyen vwọba akpọ yerẹn. Dedena, ihwo buebun ghwa riẹn Baibol na-a. Owenẹ wo kpo ẹga yẹrẹ wọ ra-a, ọkiọvo wọ guọnọ riẹn kpahen Baibol na. E ru ibroshọ nana rere ọ vwọ chọn wẹ uko vwọ riẹn kpahen Baibol na.
BẸSIẸ wọ ke ton ese ri Baibol na phiyọ, ofori nẹ wọ riẹn erọnvwọn evo kpahen ibroshọ nana. Baibol na, rọ dia Ọbe Ọfuanfon na, vwo ẹbe 66, ọ tonphiyọ vwẹ Jẹnẹsis, o de kuphiyọ vwẹ Ẹvwọphia.
Ono yen vwo Baibol na? Ọyena omamọ onọ. Omarẹ ihwo 40 yen si Baibol na, vwẹ omarẹ ẹgbukpe re vrẹ 1,600. Ihwo ri si Baibol na tare nẹ ayen yen vwo Baibol na-a. Ọvo usun rayen de si: “Ọbe ọfuanfon na ejobi rẹ Ọghẹnẹ mu ihwo vwo si.” (2 Timoti 3:16, NW) Ọfa de rhe si nẹ: “Erhi [ẹwẹn, NW] rẹ Ọrovwohwo wan oma mẹ ta ota, ota rọyen hẹ ẹrẹvwe mẹ.” (2 Samuẹl 23:2) Ihwo ri si Baibol na rhọnvwere nẹ Jihova Ọghẹnẹ, rọ dia Osun rẹ odjuvwu vẹ akpọ, ọyen vwo Baibol na. Ayen djere phephẹn nẹ Ọghẹnẹ guọnọre nẹ ihworakpọ sikẹrẹ.
O ji vwo emu ọfa rọ sa chọn avwanre uko vwo vwo ẹruọ rẹ Baibol na. Baibol na vwo uyovwinrota ọvo, ọyehẹ: revwo titi ogangan rẹ Ọghẹnẹ vwori ro vwo sun ihworakpọ eje womarẹ Uvie rọyen. Wo vwo se ibroshọ nana yanran na, wọ cha mrẹ oborẹ uyovwinrota na vwomaphia vwẹ Baibol na eje, vwo nẹ Jẹnẹsis re te Ẹvwọphia.
Vẹ ọnana vwẹ ẹwẹn, gba fuẹrẹn ovuẹ rọhẹ evunrẹ ọbe ro me titi kparobọ vwẹ akpọ na, Baibol na.
^ e?ko. 9 Idjerhe sansan ọyen e vwo kere ẹdẹ. Vwevunrẹ ibroshọ nana, C.E. mudiaphiyọ “Ọke ri Kristi,” B.C.E. de rhe mudiaphiyọ “A ke mrẹ ọke ri Kristi.” Wọ cha mrẹ udje rẹ obo re siro wan vwẹ urhiẹ rẹ ọke rọhẹ obotọ rẹ aruọbe ọvuọvo rẹ ibroshọ nana.
Wọ je sa Fuẹrẹn
KPAHEN AVWANRE
Diesorọ E Vwo Yono Baibol Na?
Baibol na chọn iduduru rihwo uko vwọ mrẹ ẹkpahọnphiyọ rẹ enọ ri kpokpo ayen ẹwẹn nonẹna. Wọ guọnọ die ọvo usun rayen?
