Upʼéel libro unaj u xoʼokol
Le Bibliaoʼ letiʼe libro tiʼ maas yaʼab máakoʼob yanoʼ. Techeʼ, ¿a xokmaj wa le libroaʼ? Tiʼ le yaʼabach jaʼaboʼob tsʼoʼok u máanoʼ u jejeláasil máakoʼob tsʼoʼok u líiʼsaʼal u yóoloʼob yoʼolal baʼaxoʼob ku yaʼalik yéetel tsʼoʼok u jóoʼskoʼob utsil tiʼ le tsolnuʼukoʼob ku tsʼáaikoʼ. Baʼaleʼ láayliʼ yaʼab máaxoʼob maʼ u xokoʼobeʼ, yanoʼob xaneʼ, kex yaan u religión wa minaʼaneʼ, u kʼáat u maas ojéeltoʼob baʼax ku kaʼansik. Wa teech a kʼáat xan a wojéelt baʼax ku yaʼalikeʼ, le folletoaʼ jeʼel u yáantkech utiaʼal a káajsik a xokikeʼ.
TÁANIL tiʼ u káajal a xokikeʼ, maʼalob ka a wojéelt jujumpʼéel baʼaloʼob tu yoʼolal le libroaʼ. Le Bibliaoʼ kʼaj óolaʼan xan bey Kiliʼich Tsʼíibeʼ, ichileʼ yaan 66 mejen libroʼobiʼ. Le yáax librooʼ Génesis, yéetel le u tsʼook librooʼ Apocalipsis wa Revelación.
¿Tiʼ máax túun u taal le baʼax ku yaʼalik le Bibliaoʼ? Lelaʼ upʼéel kʼáatchiʼ jach maʼalob ka k-ojéelt u núukil. Le 66 libroʼob yanoʼob ichil le Bibliaoʼ tsʼíibtaʼab tumen kex cuarenta máakoʼob tu yáamil mil seiscientos jaʼaboʼob. Baʼaleʼ, mix utúul tiʼ letiʼob aʼal wa tu tuukul u taal le baʼax tu tsʼíibtoʼ. Utúul tiʼ letiʼobeʼ tu yaʼalaj: «Tuláakal Kiliʼich Tsʼíibeʼ Jajal Dios tsʼáa tiʼ tuukul utiaʼal ka tsʼíibtaʼak» (2 Timoteo 3:16). Uláakʼ utúuleʼ tu yaʼalaj xan: «U [kiliʼich muukʼ] Yuumtsileʼ ku tʼaan tin chiʼ; u tʼaaneʼ, tiʼ yaan tin waakʼeʼ» (2 Samuel 23:2). K-ilik túuneʼ, le máaxoʼob tsʼíibt le Bibliaoʼ tu yaʼaloʼobeʼ Jéeoba Dios, u Yuumil tuláakal baʼal, beet u tsʼíibtaʼal. Le Bibliaoʼ ku yaʼalikeʼ Dios tsʼáatoʼon utiaʼal ka k-maas kʼaj óolte.
Tsʼoʼoleʼ, maʼalob xan ka k-ojéelteʼ ichil tuláakal le Bibliaoʼ ku yúuchul tʼaan tiʼ le Reino ken u tsʼáa Dios teʼ kaʼan utiaʼal u yeʼesik chéen tiʼ letiʼ yaan u derechoi u gobernartik wíinikoʼ. Teʼ tuláakʼ xookoʼoboʼ yaan a wilik tiʼ le Reino ku tʼaan tuláakal u mejen libroi le Bibliaoʼ, desde Génesis tak Apocalipsis.
Le baʼaxoʼob tsʼoʼok k-aʼalikaʼ maʼalob ka a chʼaʼa en cuentai ken joʼopʼok a kanik baʼax ku yaʼalik le maas maʼalob libro tsʼoʼok u tsʼíibtaʼaloʼ.
^ xóot’ol 9 Jejeláas bix u yaʼalaʼal le fechaʼoboʼ. Teʼ folletoaʼ yaan u meyajtoʼon táanil tiʼ u taal Jesús (t.t.J.) yéetel tsʼoʼokok u taal Jesús (tsʼ.t.J.). Teʼ línea yaan kabal tiʼ cada táan juʼunoʼ le fechaʼoboʼ yaan u chíikpajal chéen jeʼex yanil ich parentesisoʼ.
Maʼ xaaneʼ jeʼel u yutstal xan ta wicheʼ
KʼAJ ÓOLTOʼONIʼ
¿Baʼaxten unaj a xokik le Bibliaoʼ?
Teʼ Bibliaoʼ u millonesil máakoʼob tiʼ tuláakal tuʼux táan u kankoʼob u núukil le kʼáatchiʼob maas kʼaʼanaʼantakoʼ. ¿Kux túun teech?
