«БАШЛАНҒЫҸДА Аллаһ ҝөјү вә јери јаратды». Бу сөзләр индијә кими јазылан ҝириш сөзләриндән ән мәшһурудур (Јарадылыш 1:1). Бу садә, ејни заманда, мөһтәшәм ҹүмлә илә Мүгәддәс Китаб бизи Мүгәддәс Јазыларда диггәт мәркәзиндә олан Варлыгла — һәр шејә гадир Аллаһ Јеһова илә таныш едир. Мүгәддәс Китабын илк ајәси билдирир ки, Аллаһ бүтүн сонсуз каинатын, еләҹә дә јашадығымыз планетин Јараданыдыр. Нөвбәти ајәләрдә изаһ олунур ки, Аллаһ һәр бири символик мәнада ҝүн адландырылан узун дөврләр әрзиндә еҹазкар ҹанлы вә ҹансыз аләми хәлг едәрәк јер үзүнү јашамағымыз үчүн һазырлады.

Аллаһын јер үзүндә јаратдығы ән али варлыг инсан иди. Инсан Аллаһын сурәтиндә — Јеһоваја мәхсус олан мәһәббәт вә мүдриклик кими кејфијјәтләри әкс етдирмәк габилијјәти илә јарадылмышды. Аллаһ инсаны јерин торпағындан јаратды она Адәм адыны верди сонра ону ҹәннәтдә — Әдән бағында јерләшдирди. Бу бағы Аллаһ Өзү салмыш ону ҝөзәл бар ҝәтирән ағаҹларла долдурмушду.

Аллаһ ҝөрдү ки, инсанын јолдаша еһтијаҹы вар. О, Адәмин габырғасынын бириндән гадыны јаратды вә сонралар Һәвва адландырылан бу гадыны онун јанына ҝәтирди ки, арвады олсун. Бундан шад олан Адәм шеир гошду: «Нәһајәт, сүмүјү сүмүјүмдән, бәдәни бәдәнимдән олан бири». Аллаһ билдирди: «Буна ҝөрә дә киши өз ата-анасыны тәрк едиб арвадына бағланаҹаг вә онлар бир бәдән олаҹаг» (Јарадылыш 2:22—24; 3:20).

Аллаһ Адәмлә Һәвваја ики әмр верди. Биринҹиси, онлара јер үзүнү беҹәриб горумағы вә ораны нәсилләри илә долдурмағы тапшырды. Икинҹиси, онлара әмр етди ки, һәмин бөјүк бағдакы ағаҹлардан јалныз биринин «хејирлә шәри билмә ағаҹынын мејвәсиндән» јемәсинләр (Јарадылыш 2:17). Итаәтсиз олдуглары тәгдирдә онлары өлүм ҝөзләјирди. Бу әмрләрлә Аллаһ кишијә вә гадына Ону өзләринин Рәһбәри кими гәбул етдикләрини ҝөстәрмәк имканы верди. Онларын итаәткарлығы, һәмчинин Аллаһы севдикләрини вә Она миннәтдар олдугларыны ҝөстәрәҹәкди. Аллаһын хејирхаһ рәһбәрлијини гәбул етмәјә онларын һәр бир әсасы вар иди. Бу камил инсанларда һеч бир гүсур јох иди. Мүгәддәс Китабда дејилир: «Аллаһ јаратдыгларынын һамысына бахды вә ҝөрдү ки, һәр шеј чох јахшыдыр» (Јарадылыш 1:31).

Јарадылыш 1, 2-ҹи фәсилләринә әсасланыб.