INI an inaapod na pinakabantog na pambukas na mga tataramon na isinurat kasuarin man: “Sa kapinonan linalang nin Dios an kalangitan asin an daga.” (Genesis 1:1) Paagi sa simple asin pambihirang mga tataramon na iyan, ipinapamidbid sa sato kan Biblia an Persona na iyo an pinakamahalaga sa bilog na Banal na Kasuratan​—an makakamhan sa gabos na Dios, si Jehova. Ihinahayag kan enot na bersikulo kan Biblia na an Dios an Kaglalang kan mahiwason na uniberso, pati kan planeta na iniistaran niato. Ipinapaliwanag kan nagsurunod na bersikulo na sa sunod-sunod na haralawig na peryodo nin panahon, na sa simbolikong paagi inaapod na mga aldaw, linalang nin Dios an satong istaran na daga asin ginibo an gabos na ngangalasan sa satong kinaban.

An pinakanangongorog sa mga linalang nin Dios sa daga iyo an tawo. An linalang na ini ginibo sa ladawan nin Dios​—na may kakayahan na ipaheling an personal na mga kualidad ni Jehova mismo, siring baga kan saiyang pagkamoot asin kadonongan. Ginibo nin Dios an tawo hale sa kabokabo kan daga. Adan an inginaran sa saiya nin Dios, dangan ibinugtak Nia sia sa paraiso​—an hardin nin Eden. An Dios mismo an nagtanom sa hardin na iyan, na pinano iyan nin magayon asin mabungang mga kahoy.

Naheling nin Dios na kaipuhan kan tawo na magkaigwa nin kapareha. Paagi sa paggamit kan saro sa mga gusok ni Adan, an Dios guminibo nin babae asin dinara sia sa lalaki bilang saiyang agom, na kan huri nginaranan na Eva. Huli sa pagkaogmang marhay, si Adan biglang napatula: “Ini sa katapustapusi tolang nin sakong mga tolang asin laman nin sakong laman.” An Dios nagpaliwanag: “Iyan an dahelan na babayaan nin lalaki an saiyang ama asin an saiyang ina asin sia dapat na magdanay sa saiyang agom na babae asin sinda dapat na magin sarong laman.”​—Genesis 2:22-24; 3:20.

An Dios nagtao ki Adan asin Eva nin duwang pagboot. Enot, sinabihan nia sinda na kultibaron asin atamanon an saindang istaran na daga, asin pag-abot nin panahon panoon iyan nin mga aki. Ikaduwa, sinabihan nia sinda na dai magkakan kan bunga kan saro sanang kahoy sa bilog na mahiwason na hardin na iyan, an “kahoy kan pakamidbid nin marahay asin maraot.” (Genesis 2:17) Kun dai sinda makuyog, magagadan sinda. Paagi sa mga pagboot na iyan, tinawan nin Dios an lalaki asin an babae nin oportunidad na ipaheling na inaako ninda sia bilang Namamahala sa sainda. An pagkuyog ninda mapaheling man kan saindang pagkamoot asin pagpasalamat. Igwa sinda kan gabos na dahelan na akoon an saiyang maboot na pamamahala. Mayo nin depekto an sangkap na mga tawong iyan. An Biblia nagsasabi sa sato: “Naheling nin Dios an gabos niang ginibo asin, uya! idto marahayon.”—Genesis 1:31.

​—Basado sa Genesis kapitulo 1 asin 2.