“ATATA’A Zambe a nga té yôp a si.” (Metata’a 1:1) Éfuse te é nga loenebane na, beta ayiñeli bifia a ngenane teke tame tiliban. Mejô ya éfuse te me a liti bia Môt a ne ntene ya Mimfufup Mintilan—Yéhova, Zambe ya ngul ése. Éfuse Kalate Zambe te j’akate na Zambe nye a ne Nté yôp a si bi to nyi. Bifuse bi a toñe valé bi a zu kate bia na Zambe a nga nyoñ ayabe biyoñ, nge na môs, na a mane kôme si a biôme bise bi ne été.

Bitétéa bise Zambe a nga té, môte nye a nga dañ édima. Yéhova a nga kôme môt éve’ela’a jé, a ve nye ngule ya liti mefulu mé émien, bébé aval ane nye’an a fek. Zambe a nga kôme môt a metek, ane a nga yôlé nye na Adam, ane fe a nga toé nye paradis—afup Éden. Zambe émiene nye a nga bé afube te, a bé abeñe bilé été bi wumu bibuma bi mbe zam.

Zambe a nga yene na môt a yiane bi mvolô. Ane a nga nyoñ ébaé mvaé Adam a kôme minga; mvuse ya été, ane Zambe a nga zu ve nye Adam, a yôlé nye na Ève. Ane Adam a nga bôlane mevak a yia nye jia, a jô na: “Jôme ji é nto évese ya bivese biam, a nsône ya minsône miam.” Ane Zambe a nga timine na: “Ajô te fam j’aye li’ ésa ba nyia, ba ngale b’aye tabe nlatan: a b’aye bo nsône wua.”—Metata’a 2:22-24; 3:20.

Zambe a nga ve Adam ba Ève metiñe mebaé. Atiñ ôsu, a nga kate be na be bé mefup, a ba’ale si, a biaé bon. Di baa, a nga kate be na be bo teke di ébuma ya élé jia ya afup ése “élé ya yeme mame me ne mvaé a abé.” (Metata’a 2:17) Nge be bo melo, b’ aye wu. Metiñe mete me nga volô na Zambe a yeme nge fam ba minga b’aye kañese na nye a ne Njôô. Be nga ye liti na b’anye’e nye nge be nga tabe mewôk. Be mbe be bili beamu bese ya kañese mbamba éjôé Zambe. Mbamba be bôte bete be mbe teke abé éziñ. Kalate Zambe a jô bia na: “Zambe a nga yene biôm bise a nga té, a lô na, bi nga dañ mvaé.”—Metata’a 1:31.

​—Nkañete ôte wo so kalate Metata’a kabetôlô 1 a 2.