DONGO 1
Muwekedi a mabola moto Paradisi
Loba a maweka misipo na bewekedi be̱se̱ be o wase; na mo̱ a weka mome na muto be ná ke̱nge̱nge̱, a jese̱ babo̱ o mudo̱led’a mōnda a bola pe̱ babo̱ mbenda o bupe̱
“O BEBOTEDI Loba a weki mo̱ń na wase.” Ben byala be belabe̱ ná byingedi b’ekwali be biane̱ buka be̱se̱ be mátilabe̱ (Bebotedi 1:1) Na yen eye̱me̱k’a mulō̱ṅ ma byala b’edube nde Bibe̱l e mabolano̱ biso̱ bia Nu ńena ńe mutonga ma nje ye oteten a Betiledi ba Bosangi be̱se̱ ńe nde Yehova, Loba la ngum. Epas’a Bibe̱l yaboso e mabīse̱ ná Loba nde e Muweked’a misipo lata na wase wuma di majano̱. Myemba mi mabupē̱ mi mateleye̱ ná o pambo a pónd’a bwaba ni belabe̱ ná mińa, Loba a boṅsane̱ wase ná e be̱ wum’asu ya boja, a weka pe̱ mambo me̱se̱ ma betańsedi me oten.
Eweked’a Loba yāsam buka be̱se̱ o wase ye nde moto. A wekabe̱ o bowan ba Loba, o ńai eno̱ ná a lee̱le̱ bede̱mo ba tobotobo ba Yehova, kana ndolo na dibie̱. Loba a weki moto na mińangadu. A bele̱ mo̱ na Adam, na mo̱ a jese̱ mo̱ o paradisi ńe nde mōnda ma Ede̱n. Loba mo̱me̱ne̱ nde a po̱ngi mu mōnda, a londe̱ mo̱ na myele ma bwam mi londi na bepuma.
Loba e̱n ná e mapula ná moto a be̱ne̱ mōngwanedi. Na mo̱ a bolane̱ mbanj’a Adam po̱ o weka muto a wanea mo̱ mome ka munj’ao nu timbi belabe̱ ná Eva. Wá nde Adam a pukume̱ye̱no̱ na muńe̱nge̱, a bwemse̱ ben byala ná: “Nun so̱ nde e ewes’a bewese bam n’eyobo a eyobo am.” Loba a kwala ná: “Ońola nika moto a me̱nde̱ dia sango na ńango, a tingame̱ na munj’ao; nde ba me̱nde̱ nde be̱ eyobo ewo̱.”—Bebotedi 2:22-24; 3:20.
Loba a bola Adam na Eva mambenda mabā. Ńaboso, a langwea babo̱ ná ba se, ba tate wum’abu ya boja ba londe̱ pe̱ mo̱ na mbot’abu. Ni londe̱ iba, a langwea babo̱ ná ba si dá epum’a bwele bō̱ buka te̱ oteten a myele ma mōnda mwe̱se̱, “bwele ba dibie̱ la bwam na la bobe.” (Bebotedi 2:17) Ba si sengane̱ te̱ mo̱ ba mawo̱. Tongwea na man mambenda, Loba a tele̱ye̱ mome na muto ngea ná ba lee̱le̱ ná bemedi mo̱ ka Mudied’abu. Sengane̱ labu di wusa pe̱ lee̱le̱ ndolo na bia labu la bola masoma. To̱ lambo di si ta leka babo̱ o kasa bediedi bao ba muyao. Ba ta ná ke̱nge̱nge̱ esibe̱ babo̱ be̱ne̱ dipe̱ń to̱ diwo̱. Bibe̱l e makwala ná: “Na Loba ombwa mambo me̱se̱ a wekino̱, nde ombwa ma ta bwam bwambi.”—Bebotedi 1:31.
—Nika e se̱medi o Bebotedi epasi 1 na 2.
