“NDA̱ míí saʼa̱ ni̱ ka̱va̱ʼa Ndio̱s indiví xíʼín nuu̱ ñúʼu̱.” (Génesis 1:1.) Kuaʼa̱ na̱yivi na̱ iníí ñuyíví xíni̱ na̱ tu̱ʼun yóʼo, jáchi̱ xíʼín tu̱ʼun yóʼo kasáʼá Tu̱ʼun Ndio̱s, ta kásí ta ñúchí káʼa̱n ña̱ saʼa̱ Jeová Ndio̱s, ta kúnu̱ú chááka̱ ta kúu kée nditáʼa̱n ña̱ʼa, Ta ni̱ ka̱va̱ʼa nditáʼa̱n ña̱ ió indiví xíʼín nuu̱ ñúʼu̱ yóʼo. Ta chááka̱ ni chínuu̱ nákanian ña̱ tá ni̱ ya̱ʼa kua̱ʼá kuia̱ ni̱ ka̱sáʼá sakute̱ʼe Ndio̱s Ñúʼu̱ ndéʼi̱ yóʼo ta ni̱ ka̱sáʼá káva̱ʼa si ndiʼi ña̱ ñúchí ió nuu̱án.

Na̱yivi kúú na̱ kúnu̱ú chááka̱ ni̱ ka̱va̱ʼa Jeová Ndio̱s nuu̱ Ñúʼu̱ yóʼo. Xíʼín ñúʼu̱ ya̱ká ni̱ ka̱va̱ʼa Ndio̱s ta̱a miíno̱ó. Tátu̱ʼun ki̱ʼa ió ini Mií sí ni̱ ka̱va̱ʼa si ta̱ yóʼo, ña̱ va̱ʼa ini si, ña̱ kíʼvi̱ ini si, ña̱ ndichí si. Adán ni̱ chi̱naní sí ra̱, ta ni̱ chi̱kaa̱ si ra̱ nuu̱ ñúʼu̱ ñúchí naní Edén. Yóʼo ni̱ si̱kuu ñúʼu̱ ñúchí ña̱ ni̱ ka̱va̱ʼa mií Ndio̱s, nu̱ú ni̱ si̱kaa kuaʼa̱ ndiva̱ʼo yitó kuiʼí si̱ si̱ʼa kui̱ʼi ndató.

Ni̱ si̱nde̱ʼé Ndio̱s ña̱ síniñúʼú ta̱ ta̱a iin ñá kaneʼe táʼan xíʼín rá, sa̱ʼá ña̱yóʼo ni̱ ka̱chúun si iin lásá yika̱ Adán já ni̱ ka̱va̱ʼa si ñá ñáʼa̱ xinañúʼú ni̱ si̱naní Evá ta ni̱ si̱ʼa si ñá yóʼo nuu̱ Adán já ná kukuuán ñajiʼí ra̱. Ni̱ kujii̱ ndiva̱ʼo ini Adán, sa̱ʼá ña̱yóʼo ñúchí ni̱ kaʼa̱n ra̱ tá ni̱ kachi ra: “Ñáʼa̱ yóʼo kúú lásá no̱ó ña̱ kúú lásái̱ ta ñáʼa̱ yóʼo kúú ko̱ño no̱ó ña̱ kúú ko̱ñoi̱”. Ta kachí Tu̱ʼun Ndio̱s ña̱: “Sa̱ʼá ña̱yóʼo dánákoo ta̱a tatá ra̱ xíʼín naná ra̱ dá nakiʼin táʼan ra xíʼín ñadiʼí ra̱ dá nduu na iin túʼún” (Génesis 2:22-24; 3:20).

Ni̱ saʼnda Ndio̱s uvi̱ chuun nuu̱ Adán xíʼín Evá ña̱ kánian kee na. Chuun xinañúʼú ña̱ kánian kee na kía̱n kachúun na nuu̱ Ñúʼu̱ yóʼo ta kandaa na ña̱, ta kandoyi kuaʼa̱ de̱ʼe na. Ta inga̱ chuun ña̱ kánian kee na kía̱n ña̱ ko̱ kánian kasí na kui̱ʼi iin yíto̱ —iin túʼún laá yitó kuiʼí nu̱ú ndijaá yíto̱ ni̱ si̱kaa nuu̱ ñúʼu̱ ñúchí ikáa—: “yíto̱ ña̱ xíʼo ña̱ kandaa̱ inon ndí ki̱án va̱ʼa ta ndí ki̱án ko̱ váʼa” (Génesis 2:17). Ta kivi̱ jaá ¿ndáki̱án ndoʼo na tá ná o̱kúnijo̱ʼo na chuun ña̱ ni̱ saʼnda Ndio̱s nuu̱ ná? Kivi va na. Yóʼo kúú nu̱ú kuu naʼa̱ na̱ ña̱ kúni̱ na̱ Ndio̱s ta nákuni na si ta kúni̱ na̱ ña̱ mií sí kaʼnda chuun nuu̱ ná. Kuu va kunijo̱ʼo na Ndio̱s tá ní kuni̱ na̱ jáchi̱ ni iin ña̱ʼa ko̱ ní síkúmani̱ nuu̱ ná, ko̱ó kua̱chi na ní síio jáchi̱ na̱yivi ni̱ si̱kee ña̱ ndaa̱ ni̱ si̱kuu na, ta kachí Tu̱ʼun Ndio̱s ña̱: “Ni̱ xini Ndio̱s ndidaá chuun ni̱ kee si ta va̱ʼa ndava̱ʼo ni̱ ka̱ndo̱an” (Génesis 1:31).

(Ña̱yóʼo va̱sian nuu̱ tutu Génesis capítulo 1 xíʼín 2.)