“NGA sʼa kitsʼia, Niná kisinda ngʼajmi kao sonʼnde.” (Génesis 1:1.) Tjínkʼa xi kʼoatso nga kui én jebi xi ngisasa ʼyale. Je bersíkulo jebi tojngo jao kjoan én síchjén nga kʼoatso ʼya tʼatsʼe tínchjani je Biblia: Tʼatsʼení Jeobá, je Niná xi ngisasa tse nganʼio tjínle, xi kisinda ngʼajmi kao Sonʼnde. Je bersíkulo xi fisani kui bakóyaná jotjín tse kisindachonni Niná je Sonʼnde kʼoa jotjín tse kisindani ngayeje xi tjín i̱ tʼanangi, kʼoa nichxin tsole.

Je xi ngisa nʼio chjíle xi kisinda Jeobá i̱ Sonʼnde, jéní chjota. Kʼianga kisinda je chjota xi títjon, xi Adán kitsole, chaole nangi kisindani. Sénle kisikʼa, xi tsonile, nga koa̱n skénngi je kjoatsjoachale Niná, kjoachjinele kʼoa kao kjoanda xi bakó. Kʼoa jngo ʼndenaxó kisikʼéjnajin jñani Edén kitsole. Je ʼndenaxó jebi jesoa Niná tsakʼéjna kʼoa nʼio nkjín yá kisʼe xi tsakale to xi nʼio nda chine.

Ñandia kʼianga je Niná chan kisindale Adán je xi tsakasenkao. Kui ninda ni̱si̱nle Adán kisichjén nga kisinda je chjoón, xi Eva tsakʼin. Kʼoa jé Adán kitsjoale chjoón jebi. Je Adán nʼio tsjoa kisʼele, saʼnda i̱ kitso: “Jebi ñaki nindalení nindana kʼoa ñaki yaolení yaona”. Je Niná kitso: “Kuinga je xʼin sikʼéjnasíni je nʼaile kʼoa kao na̱le kʼoa je chjoónle kʼoéjnakao kʼoa tojngo yao koa̱nni” (Génesis 2:22-24; 3:20).

Je Adán kao Eva jao kjoatéxoma tsakʼaile xi sitjoson. Xi títjon, kuinga sikuinda je Sonʼnde, nga kʼoentje tsojmi kʼoa nga nkjín xti sʼe̱le. Xi majaoni, nga tsín koa̱n ski̱ne tole jngo yá xi kisasenjna ya ʼndenaxóle Edén. Je “yá xi tsʼe kjoankjíntokon xi ndatjín kao xi chʼaotjín” (Génesis 2:17). Jmé xi koa̱nle tsa tsín sitjoson. Kuiyání. Je Niná kui xá kitsjoani kjoatéxoma jebi nga katabakó je Adán kao Eva nga bexkón kjoatéxomale, nga tsjoake kʼoa nga tsjoále kjoanda. Alikuijin ñʼai koanle nga kisitjosonle Niná. Alijña aonjon aontʼa koan yaole nga Biblia i̱ tso: “Je Niná kiskotsenle ngayeje jmeni xi tsakʼénda kʼoa, ¡koeni!, tsabe nga nʼio nda” (Génesis 1:31).

(Yaa yʼangini Génesis kapítulo 1 kao 2.)