ঙসি ফাওবদা ইখিবা অহৌবা ৱারোলশিংগী মরক্তা মখাগী ৱাহৈশিং হায়বদি “অহানবদা ঈশ্বরনা অতিয়া নোংদোন অমসুং মালেম শেম্বিরম্মী।” (মৈহৌরোন ১:১) হায়বসিনা খ্বাইদগী মমিং চৎপা ৱাহৈশিংনি হায়দুনা কৌনৈ। অশেংবা শাস্ত্র অসিগী অহৌবদগীনা অরোইবা ফাওবদা মরু ওইবা শক্তম ওইরিবা খ্বাইদগী ৱাংথোইরবা ঈশ্বর যেহোবাবু ঐখোয়দা শক্তাকই। বাইবলগী অহান্বা ৱাহৈ পরেংনা ঈশ্বর অসি মপান নাইদ্রবা বিশ্ব অমদি ঐখোয়না লৈরিবা গ্রহ অসিবু শেম্বিবা মপুনি ফোংদোকই। মখা তাবা ৱাহৈ পরেংশিংদা ঈশ্বরনা মতম য়াম্না শাংনা চংনা ঐখোয়না লৈরিবা পৃথিবী অমদি প্রকিতিগী ওইবা পোৎলম কয়া শেম্বীরম্মী হায়দুনা তাকপি।

ঈশ্বরনা শেমখিবা তাইবংপান্বগী খুৎশেমশিংগী মনুংদা খ্বাইদগী থোইদোক হেন্দোকপদি মীওইবনি। ঈশ্বরগী মমিদা শেমখিবা জীব ওইবগী মরমনা যেহোবাগী মগুনশিং হায়বদি নুংশিবা অমদি লৌশিং উৎথোকপা ঙম্লম্মী। ঈশ্বরনা মীওইববু উফুলদগী শেমখি। ঈশ্বরনা মহাকপু আদম হায়না মীংথোল্লম্মী অদুদগী মহাকপু ইদেনগী লৈকোন—পারাদাইসদা থম্বিরম্মী। ঈশ্বর মশামক্না লৈকোন অদু য়েংবদা ফজরবা অমদি মহৈ য়াল্লবা উপালশিংনা থলহনলম্মী।

ঈশ্বরনা নুপা অদুগী মপাং অমা লৈবগী তঙাইফদবা অদু উবিরম্মী। আদমগী থবাক্কী শরু হুমদাং অমা শিজিন্নরগা ঈশ্বরনা নুপী অমা শেমলম্মী অমসুং নুপা অদুদা মহাক্কী লোয়নবী ওইনা পীবিরম্মী। তুংদা মহাকপু হৱা হায়না মীংথোন্বিরম্মী। মদুদা হরাওরদুনা আদম্না শৈরেংগী মওংদা অশুম্না হায়রম্মী: “মসি ঐগী শরূশিংগী শরূনি, ঐগী হকচাংগী হকচাংনি।” ঈশ্বরনা হায়রম্মী: “মরম অসিনা নিপানা মহাক্কী মমা মপা থাদোক্তুনা মহাক্কী নুপীদা নপশিনগনি, অদুগা মখোয় অনী হকচাং অমতা ওইগনি।”—মৈহৌরোন ২:২২-২৪; ৩:২০.

ঈশ্বরনা আদম অমসুং হৱাদা য়াথং অনিখক পীবিরম্মী। পৃথিবী অসিবু ফজনা য়েংশিন্নবা অমসুং মচা-মশুশিংনা পিক থলহন্নবা য়াথং পীবিরম্মী। অনিশুবদা, পাক চাওখ্রবা লৈকোল অদুগী মনুংদগী “অফ-ফত্ত খঙনবা উপালগী” উহৈ অদুখক্তমক মখোয়না চারোইদবনি হায়দুনা হায়রম্মী। (মৈহৌরোন ২:১৭) মখোয়না হায়বা ইন্দ্রবদি মখোয় শিগনি। য়াথং অসিগা লোয়ননা ঈশ্বরনা নুপা অমসুং নুপী অদুদা মখোয়না মহাকপু মখোয়গী লৈঙাকপনি হায়বদু য়াজৈ হায়না উৎনবগী তাঞ্জা পীরম্মী। মখোয়না হায়বা ইঞ্জবনা মখোয়গী নুংশিবা অমসুং তৌবিমল খংবা অদুবু উৎকনি। মখোয়না মহাক্কী নুংশিহৈবা শাসন অদুদা য়াজনা চৎচবা হায়বসি মরম চাই। অদুগুম্বা মপুং ফারবা মীওইবশিং অদুদা অশোইবা অমত্তা লৈরমদে। বাইবলনা ঐখোয়দা হায়: “ঈশ্বরনা শেম্বিখ্রবা খুদিংমকপূ মহাক্না য়েংলম্মী, অদুগা য়েংউ, মদু য়াম্না ফরম্মী।”—মৈহৌরোন ১:৩১.

​—মৈহৌরোনগী পন্দুপ ১ অমসুং ২দা য়ুম্ফম ওইবা।