TLAXELOLI 1
Tlachijchijketl kinmakak maseualmej se xochimili
ToTeotsij kichijki nochi tlen onka iluikak uan ipan Tlaltipaktli; kichijki se tlakatl uan se siuatl katli amo tlajtlakolejkej, kintlalik ipan se xochimili uan kinnauatik tlen monekiyaya kichiuasej
“KEMA pejki nochi tlen onka, toTeko Dios kichijki iluikaktli uan Tlaltipaktli.” (Génesis 1:1.) Ni tlajkuiloli tlen ika peua, tlauel miakej kiixmatij. Ika ni amo ouij uan kuajkualtsi tlajtoli, Biblia kinextia Jehová tlauel pankisa. ¿Kenke? Pampa ya kipia nochi tetikayotl uan Kichijki nochi tlen onka iluikak uan ipan Tlaltipaktli. Teipa kiijtoua, toTeotsij kikualchijchijtiajki Tlaltipaktli uan kichijtiajki nochi kuajkualtsitsij tlamantli. Ni panotiajki ipan miak xiuitl, tlen toTeotsij kitokaxtia kejuak tonali.
Nochi tlen kichijki Jehová ipan Tlaltipaktli, san maseualmej tlauel kipiaj miak ininpati. Nopa achtoui tlakatl kichijki ika tlali. Kichijki kej ya Itlachialis, yeka nojkia kinextiskia tlaiknelili, tlalnamikilistli uan sekinok tlamantli. Kitokaxtik Adán uan kitlalik ipan xochimili Edén. Ni xochimili toTeotsij kichijchijki kampa onkayaya miak kuajkualtsitsij kuauitl tlen tlakiyayaj.
Se tonali, toTeotsij moiljuik Adán monekiyaya kipias se akajya katli itstoskia iuaya. Yeka, ika se ielchikiomiyo, kichijki Eva —achtoui siuatl— uan kichijki ma eli isiua. Uajka Adán tlauel yolpajki uan yeka kiijtok se ome yejyektsitsij tlajtoli: “¡Ama kena! Ya ni san se ika na, pampa inakayo kiski nonakayotipa, uan iomiyo kiski noomiyotipa”. Uan yeka Biblia kiixtoma: “Se tlakatl kikauas itata uan inana para mosejkotilis iuaya isiua uan nopa omej mochiuasej san se inintlakayo” (Génesis 2:22-24; 3:20).
ToTeotsij kinnauatik Adán uan Eva ma kichiuakaj ome tlamantli. Se, monekiyaya kimokuitlauiskiaj Tlaltipaktli, tlatojtokaskiaj uan kinpiaskiaj miakej ininkoneuaj. Uan ome, onkayaya se kuauitl tlen monekiyaya amo kikuaskiaj itlajka —san setsi kuauitl ipan nochi xochimili—: se “kuauitl tlen temachiltia tlen kuali uan tlen axkuali” (Génesis 2:17). ¿Tlake kinpanoskia tlaj amo tlaneltokaskiaj? Mikiskiaj. Inijuantij ueliyayaj kinextisej kiikneliaj toTeotsij, tlauel kitlaskamatiliaj uan kiseliaj kej inintlanauatijka. Amo tleno kintsakuiliyaya, yeka ueliyayaj nochipa kuali kineltokasej katli Kinchijki ika tlaiknelili. Amo eliyayaj tlajtlakolejkej, pampa Biblia kiijtoua: “Uan toTeko Dios kitlachilik nochi tlen kichijtoya uan eltoya kuali” (Génesis 1:31).
(Mokixtijtok ipan Génesis capítulos 1 uan 2.)
