YEJUIN tlajtojli melak miyekej kixmatstokej: “Ijkuak xtlaj onkatka toTajtsin okinchijchiuj iluikamej niman tlaltikpaktli.” (Génesis 1:1.) Ika kualtsitsintin niman xouijtika tlajtoltin, Biblia peua tlajtoua itech akin nochipa kiteneua: Jehová, toTajtsin akin nochi ueli kichiua, akin okichijchiuj tlaltikpaktli niman nochi tlen onka. Opanok miyek xiujtin tlen Biblia kitokayotia tonaltin, toTajtsin okiyektlalijtia tlaltikpaktli niman nochi tlen kualtsin kipiya.

Itech nochi tlen okichijchiuj Jehová ipan tlaltikpaktli, xtlaj okse ijkon okichijchiuj ken tlaltikpakchane. Jehová okichijchiuj kachtopa tlakatl ika tlalpoktli. Okichijchiuj ijkon ken Yejua, kijtosneki ika yejon tlakatl ueliskia kixkopinas itlasojtlalis, itlamachilis niman noijki okseki tlen kikualnextiaj toTajtsin. Okitokayoti Adán niman okitlali ipan se xochitlalpan, tlen okitokayoti Edén. Tlajli kampa tlakualtsinkan tlen toTajtsin okitlali niman kipiaya miyek kojtin tlen kitemakayaj uelik intlakilyo.

Oajsik tonajli ijkuak toTajtsin okijto ika nonekiya tlakatl makipiya se akin iuan nemis. Kuakon toTajtsin, ika Adán iyelchikiuj okichijchiuj Eva —kachtopa siuatl— niman okimakak kentla isiuauj. Adán opak niman okikuikatlalili, yejuin san seki tlen okijto: “Aman kema yejuin noijki omitl tlen ouajkis ipan noomiuan niman noijki nakatl tlen ouajkis itech nonakayo”. Ika yejon Biblia kijtoua: “Yejua ika tlakatl kikauas itaj niman inan, niman ijkon nosentlalis iuan isiuauj, niman nochiuaskej san se tlalnakayotl” (Génesis 2:22-24; 3:20).

Adán iuan Eva kipiayaj ika kitlakamatiskiaj ome itlanauatiluan toTajtsin. Kachtopa, nonekiya kimaluiskiaj tlaltikpaktli, tokaskiaj niman kimpiyaskiaj miyek inkoneuan. Ika ome, onkatka se kojtli tlen xkipiayaj ika kikuaskiaj itlakilyo —san se itech nochi xochitlalpan—: “kojtli tlen tetlalnamiktia, ika san nejua [toTajtsin] nechnamiki nikijtos tlen kuajli niman tlen xkuajli” (Génesis 2:17). ¿Tlenon panoskia tla xtetlakamatiskiaj? Mikiskiaj. Tla tetlakamatiskiaj ueliskiaj kititiskej toTajtsin ika kiseliayaj makiminauati, ika kitlasojtlayaj niman ika melak kitlasojkamachiliayaj. Yejuamej nochi kipiayaj, niman ijkon ueliskiaj kitlakamatiskiaj inTajtsin akin melak kuajli okinchijchiuj. Xtlaj kipiayaj tlen xkuajli, pampa Biblia kijtoua: “ToTajtsin okitak nochi tlen okichijchiuj niman, ¡xkita!, melak kuajli katka” (Génesis 1:31).

(Onokixti itech Génesis itlaxeloluan uejueyimej 1 niman 2.)