«ARETAQ xchapletaj ubʼanik ronojel ri kʼolik, ri Dios xubʼan ri kajulew.» (Génesis 1:1.) Kbʼixik che ri nabʼe taq tzij riʼ qas kchʼobʼ uwach kumal ri winaq. Rukʼ ri tzij riʼ che kʼax ta uchʼobʼik xuqujeʼ e jeʼlik, ri Utzij ri Dios kubʼij chirij ri qas xbʼanowik: ri Jehová, ri kakun che ubʼanik ronojel, ri xbʼanow ronojel ri kʼo pa ri kaj, xuqujeʼ xubʼan ri kʼo pa ri uwach Ulew. Xuqujeʼ ri Utzij ri Dios xubʼij che ri Dios xubʼan pa kʼi junabʼ —che kbʼix qʼij che— ri uwach Ulew xuqujeʼ ri jeʼlalaj jastaq kʼo chuwach.

Ri sibʼalaj nim ubʼanik che Jehová xubʼan cho ri uwach Ulew are ri winaq. Ri nabʼe achi xubʼan rukʼ puqlaj rech ri ulew. Xubʼano junam rukʼ areʼ, kraj kubʼij, che ri achi kkunik kloqʼoqʼenik junam rukʼ ri Ajawaxel, kkʼojiʼ retaʼmabʼal xuqujeʼ kkunik kubʼan ri nikʼaj chik ubʼantajik. Xukoj Adán che ubʼiʼ xuya pa jun jeʼlalaj ulew, che xubʼij Edén che. Are jun utzalaj kʼolbʼal che are ri Dios xbʼanowik xuqujeʼ chupam e kʼo kʼi cheʼ che kuya jeʼlikalaj uwach.

Pa jun qʼij, ri Dios xrilo che ri Adán rajawaxik jun rachiʼl. Rumal laʼ, xukoj jun chike ri ukʼalkʼax rech xubʼan ri Eva —ri nabʼe ixoq— tekʼuriʼ xuya che rech kux rixoqil. Ri Adán sibʼalaj xkikotik rumal laʼ xubʼij wariʼ: «¡Are qas utzʼaqatil ri nutiʼjal waʼ xuqujeʼ utzʼaqatil ri nubʼaqil!». Xuqujeʼ, ri Utzij ri Dios kubʼij: «Rumal kʼu riʼ ri achi keʼuya kan ri utat unan rech katuniʼ rukʼ ri rixoqil, ri e kebʼ keʼux na xa jun winaq» (Génesis 2:22-24; 3:20).

Ri Adán xuqujeʼ ri Eva rajawaxik kkinimaj kebʼ utaqanik ri Ajawaxel. Ri nabʼe, rajawaxik kkichajij uwach ri Ulew, kkitik uwach xuqujeʼ kekʼojiʼ kʼi kalkʼwal. Ri ukabʼ, kʼo jun cheʼ che kekun taj kkitij ri uwach —xa jun pa ri tikonijibʼal—: «Ri cheʼ ri kuya retaʼmaxik ri utz xuqujeʼ ri nam utz taj» (Génesis 2:16, 17). ¿Jas kkʼulmataijk we keniman taj? Kekamik. Ri qastzij, rukʼ wariʼ kkikʼut chuwach ri Dios che kkaj che areʼ kuqʼat tzij pa kiwiʼ, kkiloqʼoqʼej xuqujeʼ che sibʼalaj kekikotik che xuya ri kikʼaslemal. Qastzij wi, wajun kʼulaj riʼ qas kekunik kkinimaj ri Utzalaj Bʼanal ke rukʼ tzʼaqatalaj sukʼilal. Kʼot jun jastaq chike che kubʼano che kemakunik, rumal che ri Utzij ri Dios kubʼij: «Xril kʼu ri Dios chi ronojel ri ubʼanom sibʼalaj utz xelik» (Génesis 1:31).

(Esam chupam ri capítulo 1 xuqujeʼ 2 rech Génesis.)