“QALLARIYPIN Diosqa hanaq pachata kay pachatawan kamarqan.” (Génesis 1:1.) Yaqa llapa runakunan yachanku chay simikunawan Biblia qallarisqanta. Chhaynata qallarispan Biblia willan ancha atiyniyoq tukuy imaymana kamaq Diosmanta. Chay qhepamanmi willan kay pachata chaypi kaqkunatapas soqta tiempopi kamasqanta, sapanka tiempotataq sutichan “p’unchay”, nispa.

Llapa kamasqanmantapas runata kamasqanmi aswan sumaqqa karqan. Runataqa ñut’u hallp’amantan ruwarqan paypa rikch’ayninman hina, pay hina munakuq, yachayniyoq, sumaq sonqoyoq kananpaq. Chay runatan suticharqan Adán nispa, Edén huertamantaq churarqan. Chay huertataqa Jehová Dios kikinmi ruwarqan chaypitaqmi sumaq ruruq sach’akuna karqan.

Huk p’unchaymi Jehová Dios Adanta sapanta rikuspa huk warmita ruwapunanpaq decidirqan. Chaymi Adanpa waktanmanta huk warmita ruwaspa esposan kananpaq qorqan. Anchata kusikuspan Adanqa nirqan: “¡Kaymá! Tulluy tulluyoqqa, aychay aychayoqqa”, nispa. Bibliapunin nin: “Chayrayku, runaqa taytantapas mamantapas saqepunqa, hinaspan warminman hukllachaykakapunqa, huk aychallataq kapunqaku”, nispa (Génesis 2:22-24; 3:20).

Paykunaqa iskay kamachikuytan chaskirqanku. Ñawpaqtaqa Hallp’atan cuidananku karqan, llank’ananku karqan, wawakunayoqtaqmi kananku karqan. Chaymantataq ‘allinkaqta mana allinkaqta reqsichiq sach’a ruruta’ mana mikhunankuchu karqan (Génesis 2:17). Diosta kasukuspaqa pay munakusqankuta, agradecido kasqankuta, kamachiqninku kasqantawanmi rikuchinkuman karqan. Mana kasukuspataq wañunanku karqan. Paykunapaqqa manan sasachu karqan Diospa kamachisqanta kasukuyqa. Edén huertapiqa tukuy imaymanayoqmi karqanku ch’uya kawsaniyoqmi karqankupas, Bibliapunin willan Diospa ‘llapa ruwasqankuna ancha allin kasqanta’ (Génesis 1:31).

(Génesis 1, 2.)