MARITO lama landzelaka ma vuriwa marito lama dumeke swinene lama tshameke ma tsariwa. Ma ri: “Eku sunguleni Xikwembu xi tumbuluxe matilo ni misava.” (Genesa 1:1) Hi marito wolawo yo olova kambe lama nga ni matimba, Bibele yi vulavula hi Munhu loyi a nga wa nkoka eMatsalweni yo Kwetsima, ku nga Yehovha Xikwembu xa matimba hinkwawo. Ndzimana yo sungula ya Bibele yi hi komba leswaku Xikwembu xi tumbuluxe swilo hinkwaswo ematilweni ni laha misaveni ku katsa ni pulanete ya hina. Tindzimana leti landzelaka ti hlamusela leswaku ku hundze nkarhi wo leha, lowu fanekiseriwaka hi masiku, Xikwembu xi ri karhi xi lunghisa misava leswaku hi ta hanya eka yona, xi endla swilo hinkwaswo swo hlamarisa leswi nga kona emisaveni.

Nchumu wo hlamarisa lowu Xikwembu xi nga wu tumbuluxa emisaveni i munhu. Munhu u endliwe hi xifaniso xa Xikwembu—u kota ku kombisa timfanelo leti Yehovha a nga na tona, to fana ni rirhandzu ni vutlhari. Xikwembu xi tumbuluxe munhu hi ntshuri wa misava. Hiloko xi n’wi thya vito ra Adamu kutani xi n’wi veka eparadeyisini, ku nga ntanga wa le Edeni. Xikwembu xi lo tiendlela hi xoxe ntanga wolowo, xi endla leswaku wu va ni mirhi yo xonga ni leyi vekaka mihandzu.

Xikwembu xi swi vonile leswaku wanuna u fanele a va ni munghana. Xi tirhise rimbambu rin’we ra Adamu leswaku xi endla wansati loyi hi ku famba ka nkarhi a nga thyiwa vito ra Evha, hiloko xi n’wi yisa eka Adamu a va nsati wakwe. Tanihi leswi Adamu a a tsakile swinene, u tlhokovetsele a ku: “Eku heteleleni leri i rhambu ra marhambu ya mina ni nyama ya nyama ya mina.” Hiloko Xikwembu xi ku: “Hikokwalaho wanuna u ta siya tata wakwe ni mana wakwe naswona u fanele ku namarhela nsati wakwe, kutani va fanele va va nyama yin’we.”—Genesa 2:22-24; 3:20.

Xikwembu xi nyike Adamu na Evha swileriso swimbirhi. Xo sungula, Xikwembu xi va byele leswaku va rima ni ku khathalela misava leyi a yi ri kaya ra vona nileswaku hi ku famba ka nkarhi va fanele va tata misava hi vana va vona. Xa vumbirhi, xi va byele leswaku va nga dyi mihandzu ya murhi wun’we ntsena eka yo tala leyi a yi ri kona entangeni wolowo lowukulu, ku nga “murhi wa ku tiva leswinene ni leswo biha.” (Genesa 2:17) A va ta fa loko va nga xi yingisi Xikwembu. Hi ku tirhisa swileriso sweswo, Xikwembu xi nyike vanhu volavo nkarhi wo kombisa leswaku va tsakela leswaku Xikwembu xi va Mufumi wa vona. Loko va yingisa, a va ta komba leswaku va ni rirhandzu nileswaku va nkhensa. A va ri ni swivangelo swo tala swa ku pfumela ku fumiwa hi ndlela yoleyo ya musa. Vanhu volavo a va hetisekile naswona a va nga ri na xidyoho. Bibele yi ri: “Xikwembu xi vona hinkwaswo leswi xi swi endleke, kutani waswivo, a swi ri swinene ngopfu.”—Genesa 1:31.

—Xi sekeriwe eka Genesa ndzima 1 na 2.