“NẸ OTỌ rhe, Ọghẹnẹ vwọ ma odjuvwu vẹ akpọ.” (Jẹnẹsis 1:1) E se eta nana eta ri me titi kparobọ, ravwọ ton ẹbe phiyọ. Baibol na vwẹ eta yena vwo dje Ohwo rọ ma ghanre vwẹ Ọbe Ọfuanfon na, ọyen Jihova Ọghẹnẹ, ro me vwo ẹgba. Owọ ẹsosuọ ri Baibol na djerephia nẹ Ọghẹnẹ yen ma odjuvwu vẹ otọrakpọ rẹ avwanre dia na. Awọreta revwọ kpahọn de rhe dje nẹ, ọke grongron revwo dje ẹdẹ, ọyen ọ reyọ Ọghẹnẹ vwọ ma akpọ na vẹ erọnvwọn rehẹ evun rọyen ejobi rere avwanre savwọ dia evun rọyen.

Ohworakpọ yen emama rọ ma rho rẹ Ọghẹnẹ mare vwẹ otọrakpọ na. Ọ ma rọ họhọ oma rọyen, ọtiọyena ko se dje iruemu rẹ Ọghẹnẹ kerẹ ẹguọnọ vẹ aghwanre phia. Ekpẹn rẹ otọ na yen Ọghẹnẹ vwọ ma ohworakpọ. Ọghẹnẹ de se, Adam, o de phio phiyọ iparadaisi, ogba rẹ Idẹn. Ọghẹnẹ yen rhuẹrẹ ogba na phiyọ, ọ da kọn irhe re mọ emamọ iyoyovwin phiyọ.

Ọghẹnẹ da mrẹ nẹ ofori nẹ ọshare na vwo ọrivẹ. Ọghẹnẹ da reyọ ubi-edada rẹ Adam vwọ ma aye, ọ da vwọkẹ ọshare na rere ọ dia aye rọyen, o de se Ivi. Vwọrẹ omavwerhovwẹn, Adam da ta, “Ọnana ubeku mẹ kugbe uvwo rẹ uvwo mẹ.” Ọghẹnẹ da ta: “Fiki rẹ ọtiọye na ọshare vwọ yan jẹ ọsẹ rọye vẹ oni rọye vwo kọ rhe gbanọ aye rọye, ayen ke dia oma ọvo.”—Jẹnẹsis 2:22-24; 3:20.

Ọghẹnẹ da vwẹ iji ivẹ vwọ kẹ Adam vẹ Ivi. Ẹsosuọ, ọ vuẹ ayen nẹ ayen vwẹrote otọrakpọ na rere ayen ji vwiẹ emọ vọn. Ọrivẹ, ọ da vuẹ ayen nẹ ayen ria emamọ rẹ urhe ọvo vwẹ usun rẹ irhe ejobi rehẹ ogba na-a, ọyehẹ “urhe rẹ erianriẹn rẹ erhuvwu vẹ umiovwo na.” (Jẹnẹsis 2:17) Ayen che ghwu siẹrẹ ayen da churhi na. Womarẹ iji yena, Ọghẹnẹ da vwẹ uphẹn kẹ ọshare vẹ aye na rere ayen vwo djephia nẹ ayen reyerọ kerẹ Osun rayen. Ayen che dje nẹ ayen vwo ẹguọnọ vẹ ọdavwaro kpahen oborẹ Ọghẹnẹ ru kẹ ayen siẹrẹ ayen de nyẹme rọyen. Ofori nẹ ayen rhiabọreyọ usuon rọyen. Ayen vwo upe ri jẹgba vwẹ oma-a. Baibol na vuẹ avwanre nẹ: “Ọghẹnẹ da mrẹ, emu kemu rọ mare na, nighe, oyovwirin gangan.”—Jẹnẹsis 1:31.

​—E muro kpahen Jẹnẹsis uyovwin 1 vẹ 2.