«DZÚ gosaló, Dios bisaʼ guibá né gudxlio.» (Génesis 1:1). Xidal buñ raniʼ que ndeʼ nac chop tzón diitz ni más rimbu buñ. Né diitz sacróyen reʼ la Biblia rasetlaa a toib buñ ni más rareʼ loguiaʼ: Jehová, Dios ni nap Xiroʼgolu galnadip né ni Bisaʼ guibá né Gudxlio. Láaca rabexani que nigolú xidzú tiemp bunytzaaybu Gudxlio né guiráca cós móz ni noʼ loni.

Jehová bisaʼbu buñgudxlio. Biquiimbu yoo par bisaʼbu primer buñguieeu. Jehová bisaʼbu buñguieeu mod nacbu, ndeʼ raslooy que Adán gop galnadxiʼ né galnann. Goleʼbu laa buñguieeu reʼ Adán né goloʼbu Adán lainy toib lagary móz ni góc laa Edén. Lagary móz reʼ Jehová bisaʼ láani né goyoʼ xidal yac cuánnax ni nigolú naníx.

Toibtica dzú Jehová goniʼ que tzoʼ toib ni gac xcompañer Adán. Cuaʼbu toib xcoxtil Adán par bisaʼbu Eva —primer buñgonaʼ ni goyoʼ— né bunycuentbu buñgonaʼ reʼ par gac tzeelbu. Láabu nigolú bibaladxbu né dada goniʼbu diitz sacróyen reʼ: «Ndeʼ dxit ladi de dxit ladi né beʼel ladi de beʼel ladi». Scú láani, la Biblia rabexa: «Por ngú buñguieeu guisian bixios né xinaʼ né napbu xí de gacbu toibsi né tzeelbu, né sadxin sacyibu toibsi beʼel» (Génesis 2:22-24; 3:20).

Adán né Eva non nasobyibu chop cós ni Jehová buny mandary layibu. Primer, ñanyibu Gudxlio, nasagaʼyibu yac cuánnax loni né nadalyibu ló Gudxlio. Ni rarop, diti non ñooyibu xcaa toibguielot yac cuánnax ni goyoʼ lainy lagary móz, «yac ni rony que buñ gan xí ngú cós tzaay né cós mal» (Génesis 2:17). ¿Xí ñac pal diti nasobyibu? Ñaityibu. Ndeʼ góc toib mod par naslooybu que nadxiʼyibu Dios, que rasaguelbu gony mandary Dios layibu né que raduidyibu guixquix Dios por guirá ndeʼ. Adán né Eva diti gopyibu galkié por ngú diti ñac nagan nasobyibu ni Bisaʼ layibu. Diti gopyibu ni toib cós mal o galkié, por ngú la Biblia ná: «Bibiʼ Dios guirá ni bisaʼ, né ¡colguibiʼ! nigolú sacróyen gocni» (Génesis 1:31).

(Bireʼni ló Génesis capítulos 1 né 2.)