SECCIÓN 2
Juanintari Kä Bä Nuäre bäre mento
Ángel iti bikaka kri käkwe Adán aune Eva töi mikani ñaka Ngöbö mike täte. Ye köböite ngite aune gata namani
NGÖBÖ jämi ni nire sribere ye känenkri, angeletre nitre üaire ñaka tuin ye sribebare kwe. Ángel iti kädekani Satana aune Diablu, ye bikabare kri aune Eva ngökani kwe, ne kwe kri dati ñäkäibare Ngöbökwe ye Evakwe ngokwä kwetadre.
Satana käkwe kulebra mikani blite Eva ben aune Adán bätä Eva nämene jondron kwin juen jabäre Ngöbö köböite niebare kwe ie. Kri ngokwä ñäkäibare ye niaratre kwetadi angwane ñaka krütai niebare kwe arato; Ngöbö nämene niaratre ngökö mikani gare kwe ietre kukwe yebiti. Diablukwe kukwe ye bämikani kwin krubäte niaratre okwäte, niaratre ñaka Ngöbö mikai täte angwane kukwe ütiäte rabai gare ietre aune tö rabai dre dre nuain ye erere nuaindi kwetre niebare kwe. Akwa Diablu nämene niaratre ngökö. Erametre, ni ja bämikaka jerekäbe ye nämene kukwe ne niere: ¿Ngöbö ai rabadre gobrane kä jökräbiti tibien? ¿Kukwe nieta kwe ye kwin? ¿Ni rabadre mike täte?
Eva nakani kö okwäte. Tö namani krubäte kri ngokwä yei, aune mrä kwetani kwe. Biti biani kwe muko kwe ie aune muko yekwe kwetani arato. Kukwe ye ñaka raba tuin era, akwa kukwe yebiti ja mikani kwetre Ngöbö rüere, ja mikani ngite kwetre. Niaratre nämene dre nuainne ye nämene gare kwin ietre: Ngöbö niaratre Sribekä töi metre aune jondron jökrä bianka ietre käkwe kukwe ükaninte ye mikani ngwarbe kwetre.
“Niarakwe mä dokwä trekaite aune mäkwe niara mikai bren ngoto üebätä.” (Génesis 3:15)
Ngöbökwe kukwe ükaninte nitre bikaka kri yebe kukwe nuainbare kwetre yebätä. Käne niebare kwe, ja känenkäre Monso käbämikani ye käkwe kulebra o Satana gaite. Biti niebare kwe, Adán aune Eva ye krütai, akwa niaratre monsoi rabai ye mikai tuin bobre kwe jai, yebätä ñaka Adán aune Eva ganinte bengwairebe kwe. ¿Adán aune Eva monsoitre yekwe dre kwin rabadi? Nitre ja mikani ngite Edén köböite kukwe tare namani bare ye ni juain Jehovakwe käkwe mikai krüte käbämikani kwe. Akwa, ¿Ni ni Mikaka Kwäre ye abokän nire, aune Ngöbökwe juandi kukwe nuainne ye mikai nemen bare ño kwe? Biblia tika jatani ye ngwane kukwe ye jatani nemen gare bäri kwin.
Mrä mada, Ngöbökwe Adán aune Eva juanintari Kä Bä Nuäre bäre mento. Kä bä nuäre ye bäre mento niaratre rabadre sribire ja dibiti ja bukakäre. Ye ngwane Eva ngobo mubai Caín därebare. Ye bitikäre, Adán aune Eva ngäbriäntre namani bäri kwati, merire aune brare, iti kädekani Abel, mada kädekani Set, ni ye abokän Noé mräkä käne.
(Dianinkä Génesis kapitulo 3 nemen 5 aune Apocalipsis 12:9 yebätä.)
