TLAXELOLI 2
Kinkixtijkej tlen Xochimili
Se iluikaejketl kichijki Adán uan Eva ma amo kineltokakaj toTeotsij. Yeka, pejki tlajtlakoli uan mikilistli
KEMA ayamo itstoyaj maseualmej, toTeotsij kinchijki iluikaeuanij tlen amo tiuelij tikinitaj. Se iluikaejketl —katli teipa motokaxtik Satanás o Diablo— kiijixnamijki toTeotsij uan kikajkayajki Eva kema kiiljuik ma kikua nopa kuauitl itlajka katli toTeotsij kiniljuijtoya ma amo kikuakaj.
Satanás kitekiuik se kouatl tlen ika kinojnotski Eva uan kichijki ma moiljui iuaya iueue kinpolouayaya se tlamantli tlen kuali pampa toTeotsij amo kinmakatoya. Nojkia kiiljuik tlaj kikuaskiaj nopa kuauitl itlajka amo mikiskiaj; ika ni kiijtok toTeotsij kinkajkayajtoya. Diablo kuajkualtsi kinnojnotski, pampa kiniljuiyaya tlaj ayokmo kineltokaskiaj toTeotsij kipiaskiaj miak tlaixmatili uan ueliskiaj kichiuasej tlen kinekiskiaj. Ni san se ueyi istlakatili: tlen amo kema aka kiijtojtoya. Nopa istlakatiketl kinekiyaya ma moiljuikaj: ¿Kinamiki toTeotsij kinauatis Tlaltipaktli uan iluikaktli? ¿Xitlauak itlanauatiljuaj? ¿Techpaleuis tlaj tijneltokasej?
Eva kineltokak nopa istlakatiketl. Pejki kinejki kikuas nopa kuauitl itlajka uan teipa kiyekok. Kimakak iueue uan ya nojkia kikuajki. Maske nesiyaya amo kenijki, ika tlen kichijkej tlaixpanokej. Inijuantij kuali kimatiyayaj tlen kichiuayayaj: amo kinejkej ma kinnauati katli Kinchijki, maske kinchijtoya amo tlajtlakolejkej uan kinmakatoya nochi tlen kipixtoyaj.
“Ikone mitstsonxamanis uan ta tijikxitsakanis” (Génesis 3:15, TNM).
ToTeotsij kiniljuik tlen kinpanoskia pampa kiixpanotoyaj. Achtoui kiijtok se katli ya kititlaniskia teipa —se Temakixtijketl— kitsontlamiltiskia Satanás katli kiixnextia nopa kouatl. Teipa kiniljuik Adán uan Eva mikiskiaj, uan maske kiijtok nopa, toTeotsij kinextik kintlapojpoljuiskia ininkoneuaj katli kinpiaskiaj yeka kichijki ma amo nima mikikaj. ¿Tlake monekiyaya ma kichiakaj? Jehová kiijtok katli kititlaniskia kiixpoloskia nochi tlen amo kuali katli pejki ne Edén. ¿Ajkia eliskia nopa Temakixtijketl, uan kenijkatsa kichiuaskia tlen toTeotsij kinekiyaya? Ni nestiajki kej panotiajki tonali, kema moijkuilojtiajki Biblia.
Yeka teipa toTeotsij kinkixtik Adán uan Eva tlen nopa Xochimili. Kema ayokmo itstoyaj ipan xochimili, monejki tekitisej miak uan kej nopa kipiaskiaj ika tlen mopanoltijtiasej. Teipa Eva kipixki Caín, katli achtouiejketl. Teipa Adán uan Eva kinpixkej sekinok okichpilmej uan siuapilmej, kej Abel, uan nojkia Set, katli elki se tlen Noé iueyitatauaj.
(Mokixtijtok ipan Génesis capítulo 3 uan tlami ipan 5 uan Apocalipsis 12:9.)
