LANGA ten bifo Gado meki libisma, a ben meki furu yeye libisani, noso engel. Na ini Eden, wan engel ben opo ensrefi teige Gado, èn a tron Satan Didibri. Na wan triki fasi a ben pruberi fu kori Eva fu nyan a froktu fu a wan-enkri bon di Gado ben taigi den fu no nyan.

Satan gebroiki wan sneki fu taki nanga na uma èn a sori en taki Gado ben e hori wan tumusi moi sani na baka gi na uma nanga en masra. Na engel ben taigi Eva taki en nanga en masra no ben o dede, efu den nyan a froktu di Gado ben taigi den fu no nyan. Na so fasi Satan ben taki dati Gado e lei gi den pikin fu en na grontapu. Satan ben sori taki te libisma ben o trangayesi Gado, dan den ben o kisi spesrutu koni èn den ben o kon de fri. Ma a sani disi ben de wan lei, fu taki en leti, disi ben de a fosi lei di taki na grontapu. Na aksi di opo kon abi fu du nanga a tiri fu Gado leki a moro hei tiriman. Na aksi dati na efu Gado abi a reti fu tiri, efu a e du dati na wan reti fasi, èn efu a abi a tanbun fu den futuboi fu en na prakseri.

Eva ben bribi a lei fu Satan. A ben bigin angri fu nyan a froktu èn te fu kaba a nyan wan pisi fu en. Bakaten, a gi en masra pikinso èn ensrefi nyan tu. Na so fasi den tron sondusma. A gersi leki a sani di den du na wan pikin sani nomo, ma fu taki en leti na a fasi dati den sori taki den opo densrefi teige Gado. Fu di Adam nanga Eva trangayesi a komando fu Gado fu espresi, meki den weigri fu teki a tiri fu a Mekiman di ben gi den ala sani. A ben gi den sosrefi wan libi di ben bun dorodoro, iya, wan libi sondro sondu.

Gado ben kari den sma di ben opo densrefi teige en fu gi frantwortu fu san den ben du. A ben pramisi taki wan Pikin, noso Frulusuman, ben o kon di ben o pori Satan, a wan di e prenki a sneki. Gado ben gi Adam nanga Eva dedestrafu, ma a no kiri den wantewante. Na so fasi Gado sori sari-ati gi den pikin fu den di ben musu gebore ete. Den pikin dati ben o abi wan howpu, fu di a Sma di Gado ben o seni kon ben o puru den takru bakapisi fu na opo di sma opo densrefi teige Gado na ini Eden. Gado ben abi na prakseri fu tyari wan Frulusuman kon, èn a ben o tyari kon na krin suma na a Sma dati. Safrisafri a tyari dati kon na krin sensi di Bijbel bigin skrifi.

Gado yagi Adam nanga Eva komoto na ini Paradijs. Na dorosei fu a dyari fu Eden, den ben o abi fu wroko a gron bun tranga fu man sorgu gi densrefi. Bakaten Eva kon de nanga bere, èn a meki Kain, a fosi pikin fu Adam nanga Eva. Den ben kisi tra manpikin nanga umapikin tu, soleki Abel nanga Set, na afo fu Noa.

—Den tori disi teki puru fu Genesis kapitel 3 te go miti 5; Openbaring 12:9.