BAGIAN 5
Debata mamasumasu si Abraham dohot Keluargana
Lam ganda ma pinompar ni si Abraham. Debata manggomgomi si Josep di tano Mesir
DIBOTO Jahowa do na laho marsitaonon anakNa jala mate. On tarida sian surirang di 1 Musa 3:15. Songon dia do panghilalaan ni Debata tingki mate anak haholonganNa? Bibel patuduhon tudosanna. Disuru Debata si Abraham mamelehon si Isak, anak haholonganna.
Togu do haporseaon ni si Abraham tu Debata. Nunga dijanjihon tu ibana taringot Sipalua, na ro sian pinompar ni si Isak. Ala porsea si Abraham na boi paheheon ni Debata si Ishak, dioloi ibana do laho mamelehon anakna i. Alai, ro ma surusuruan ni Debata mangambati si Abraham asa unang dipelehon si Isak. Las do roha ni Debata tu si Abraham ala rade ibana mamelehon anak haholonganna. Dung i, diulahi Debata ma janjiNa tu si Abraham.
Anak ni si Isak, si Esau dohot si Jakkob. Ndang songon si Esau, dapot pasupasu do si Jakkob ala diargai na ringkot di partondion. Diganti Debata ma goar ni si Jakkob gabe si Israel, 12 marga di Israel digoari do mangihuthon goar ni anak ni si Jakkob. Songon dia do keluarga ni si Jakkob gabe sada bangso?
Mulana, digadis hahana ma si Josep gabe hatoban tu Mesir. Alai, dipasupasu Debata do si Josep ala tongtong marsihohot. Nang pe godang hasusaan na masa tu ibana, dipillit si Firaun do si Josep gabe panggomgomi di Mesir, jala dilehon huaso na balga tu ibana. Tingki i, masa ma haleon di tano Kanaan, disuru si Jakkob ma angka anakna tu Mesir manuhor sipanganon ni nasida saleleng haleon i—si Josep do na mangaradoti sipanganon di Mesir. Jumpang ma si Josep dohot angka hahana jala nunga marhamubaon nasida, ala diida si Josep songon i, ditogihon ma nasida asa pinda saluhutna tu Mesir. Dilehon do tano asa boi denggan parngoluon nasida dohot pinomparna. Jala diboto si Josep, Debata do na mandongani nasida asa manggohi bagabagaNa.
Sahat tu na matua, di Mesir do si Jakkob dohot pinomparna. Andorang so mate, dipaboa ibana sada surirang taringot Sipalua naung dijanjihon hian, na gabe panggomgomi ro sian anakna si Juda. Disurirangkon si Josep muse boanon ni Debata do sude pinompar ni si Jakkob ruar sian Mesir.
—Dibuat sian 1 Musa bindu 20 sahat tu 50; Heber 11:17-22.
