SA̱ JAÁ ni̱ si̱síni̱ va Jeová Ndio̱s ña̱ saa̱ iin kivi̱ ña̱ kivi de̱ʼe mani̱ sí. Tu̱ʼun ña̱ va̱si nuu̱ tutu Genesis 3:15 jánaʼa̱ ña̱ sa̱ʼá ña̱yóʼo, va̱árá ko̱ káʼa̱n kásíán ña̱ jaá koo. Ni̱ kee Ndio̱s ña̱ ni̱ taa na nu̱ú Tu̱ʼun si sa̱ʼá ña̱ ni̱ si̱io tá ni̱ kaʼa̱n si xíʼín Abraham ña̱ ná joko̱ rá de̱ʼe mani̱ rá Isaac, já ná kundaa̱ ini na̱yivi ndixi ví taiʼvi̱ ini Ndio̱s tá ná kivi de̱ʼe mani̱ sí.

Ni̱ si̱ka̱ndeé ndiva̱ʼo ini Abraham ña̱ saa̱ va ña̱ ni̱ kaʼa̱n Ndio̱s koan, Jáchi̱ ni̱ kachi si xíʼín rá ña̱ tein na̱ veʼe Isaac kisi Ta jáka̱ku na̱yivi. Ta ni̱ ka̱ndeé ini ra ña̱ jánátaku va Ndio̱s de̱ʼe ra Isaac tá ná kivi ra. Sa̱ʼá ña̱yóʼo ni̱ sinajo̱ʼo ra ña̱ ni̱ kaʼa̱n Ndio̱s xíʼín rá ta ni̱ kiʼin ra kuaʼa̱n ra̱ joko̱ rá de̱ʼe ra nuu̱ Ndio̱s. Jo tá sa̱ míí kuaʼa̱n ra̱ joko̱ ñaʼá rá, ni̱ ta̱ndaʼá Ndio̱s iin ángel si já ko̱ ní si̱ʼa si íchi̱ ña̱ joko̱ rá de̱ʼe ra. Sa̱ʼá ña̱yóʼo ni̱ kaʼa̱n va̱ʼa Ndio̱s saʼa̱ Abraham ña̱ ni̱ ka̱ndeé káʼno ini ra si, ta ni̱ na̱ndióko̱o tuku si ni̱ kaʼa̱n si xíʼín rá ña̱ ni̱ ka̱ndo̱o si kee si.

Tá ni̱ ndiʼi já ni̱ si̱io uvi̱ de̱ʼe Isaac ta̱ ni̱ si̱naní Esaú xíʼín Jacob. Jo si̱va̱ʼa Jacob yóʼo va ni̱ si̱kuu ta̱ ni̱ sika̱nuu íchi̱ Ndio̱s, ta sa̱ʼá ña̱yóʼo ni̱ niʼi̱ rá ña̱ va̱ʼa. Ni̱ nda̱jama Ndio̱s kivi̱ Jacob ta ni̱ chi̱naní sí ra̱ Israel, ta ndin 12 de̱ʼe ta̱ yóʼo ni̱ si̱kuu ta̱ xinañúʼú ni̱ ja̱kusáʼá nu̱ú na̱ ñuu Israel. Jo ¿ndixi ni̱ kuu já ni̱ saa̱ na̱yóʼo ni̱ nduu kuaʼa̱ ná?

Ta ndiʼi ña̱yóʼo ni̱ ka̱sáʼá kúu ña tá ni̱ ka̱sáʼá java ka̱ ñani si̱va̱ʼa José yóʼo kandají ná ra̱. Sa̱ʼá ña̱yóʼo ni̱ xi̱kó ná ra̱ já ná kukuu ra iin mozó. Ta ni̱ xiin na ra̱ néʼe na kuaʼa̱n na̱ ñuu Egipto, nu̱ú ni̱ ndoʼo ra kuaʼa̱ tu̱ndóʼó. Jo ni̱ chi̱ndeé vá Ndio̱s ta̱ yóʼo jáchi̱ ni̱ si̱kuu ra iin ta̱yiví ndaa̱ nuu̱ sí ta ni̱ si̱io ndeé ini ra, ta iin kivi̱ ni̱ si̱ʼa ta̱ faraón iin chuun káʼno kaneʼe ra. Sa̱ʼá ña̱yóʼo ni̱ kuu ni̱ chi̱ndeé rá na̱ veʼe ra tá ni̱ si̱io tama̱, jáchi̱ ni̱ ta̱ndaʼá tatá ra̱ Jacob java ka̱ de̱ʼe ra ña̱ ná kuʼu̱n ra̱ ñuu Egipto kuiin ra ña̱ kusáʼan ndijaá na̱ veʼe ra. Jo ¿yoo nu̱ú saa̱ na̱ kuiin na ña̱yóʼo? ¡Nuu̱ mií José va! Ta tá ni̱ xini táʼan José yóʼo xíʼín ñani ra̱, sa̱ ni̱ na̱ndióko̱o ndiva̱ʼo ini na̱yóʼo sa̱ʼá ña̱ ni̱ kee na xíʼín rá, ni̱ si̱io káʼno ini José saʼa̱ ná, ta ni̱ kaʼa̱n José xíʼín ñani ra ña̱ ná kuʼu̱n na̱ kuaka na ndiʼi na̱ veʼe ra kisi na ñuu Egipto. Ta ñúʼu̱ va̱ʼa chááka̱ ni̱ si̱ʼa ta̱ faraón nu̱ú na̱ veʼe ra, já ni̱ ka̱sáʼá kée va̱ʼa na ta ni̱ nduu kuaʼa̱ ná. Yóʼo kúú nu̱ú ni̱ ka̱ndaa̱ ini José ña̱ mií Jeová Ndio̱s ni̱ chi̱ndeé sí ra̱ sa̱ʼá ña̱ ni̱ ka̱ndo̱o si kee si xíʼín Abraham.

Ñuu Egipto ni̱ si̱io Jacob xíʼín na̱ veʼe ra nda̱ kivi̱ ni̱ siʼi̱ ra̱. Tá kánduʼu̱ rá ña̱ si̱ yati kivi ra, ni̱ kachi ra ña̱ Ta ni̱ kachi Ndio̱s kisi jáka̱ku na̱yivi kukuu si iin ta̱ kaneʼe chuun nuu̱ ndikuií va ña̱ʼa, ta kisi si tein na̱ veʼe de̱ʼe ra ta̱ ni̱ si̱naní Judá. Tá ni̱ ya̱ʼa kuia̱ já ni̱ kachi José ña̱ saa̱ iin kivi̱ ña̱ tavá Ndio̱s na̱ veʼe Jacob nu̱ú ni̱ si̱ndoyi na ñuu Egipto.

(Ña̱yóʼo va̱sian nuu̱ tutu Génesis capítulo 20 nda̱ 50 xíʼín Hebreos 11:17-22.)