ယဟိဝၤယွၤ သ့ၣ်ညါဝဲလၢ မုၢ်ကအိၣ်ဝဲတနံၤလၢအဖိခွါလၢ အအဲၣ်ဝဲဒိၣ်ကတၢၢ်တဂၤန့ၣ်, ကတူၢ်ဘၣ်တၢ်နးတၢ်ဖှီၣ် ဒီးကဘၣ်သံဝဲလီၤ. ဝံအတၢ်စံးပာ်လၢ ၁ မိၤၡ့ ၃:၁၅ အပူၤန့ၣ် ပာ်ဖျါဆိဝဲ တၢ်မ့ၢ်တၢ်တီအံၤအဂ့ၢ်န့ၣ်လီၤ. ဖဲကစၢ်ယွၤ ကဟ့ၣ်လီၤကွံာ်အဖိခွါအခါ အဝဲဘၣ်တူၢ်ဆါအသးထဲလဲၣ်န့ၣ် ဒ်သိးပှၤဟီၣ်ခိၣ်ဖိတဖၣ် ကနၢ်ပၢၢ်အဂီၢ် ကစၢ်ကပာ်ဖျါထီၣ်န့ၢ်အဝဲသ့ၣ်ကသ့လၢကျဲဒ်လဲၣ်. လံာ်စီဆှံပာ်ဖျါထီၣ်ဝဲ တၢ်ဂ့ၢ်နီၢ်ကီၢ်လၢ ကစၢ်ယွၤမၢစီၤအၤဘြၤဟၣ်လုၢ်ထီၣ်အဖိခွါစီၤအံၤစဲး လၢအအဲၣ်ဘၣ်ဝဲတဂၤန့ၣ်လီၤ.

စီၤအၤဘြၤဟၣ် အိၣ်ဒီးတၢ်စူၢ်တၢ်နာ်လၢ အဒိၣ်အယိာ်လီၤ. သ့ၣ်နီၣ်ထီၣ်က့ၤလၢ ကစၢ်ယွၤစံးပာ်အီၤလၢ တၢ်အချံအသၣ် လၢကမ့ၢ်ဝဲတၢ်အုၣ်က့ၤခီၣ်က့ၤကစၢ်န့ၣ် ကဟဲလီၤစၢၤလီၤသွဲၣ်လၢ စီၤအံၤစဲးလီၤ. စီၤအၤဘြၤဟၣ်နာ်ဝဲလၢ ကစၢ်ယွၤ မၤမူထီၣ်က့ၤစီၤအံၤစဲးလၢ တၢ်သံသ့ဒီး, လၢတၢ်ဒိကနၣ်အပူၤ ပာ်လီၤအသးလၢ ကလုၢ်ထီၣ်အဖိခွါန့ၣ်လီၤ. ဘၣ်ဆၣ် တချုးလၢအဝဲမၤသံအဖိခွါအခါ ယွၤအမူခိၣ်ကလူး တြီအီၤန့ၣ်လီၤ. မ့ၢ်လၢ စီၤအၤဘြၤဟၣ် အသးအိၣ်လုၢ်ထီၣ်အဖိခွါလၢ အပာ်လုၢ်ပာ်ပှ့ၤဝဲ ဒိၣ်ကတၢၢ်အံၤအဃိ, ကစၢ်ယွၤစံးပတြၢၤအီၤဒီး အၢၣ်လီၤကဒီးဝဲ ပှၤတီပှၤလိၤတဂၤအံၤ ဒ်လၢညါအသိးန့ၣ်လီၤ.

လၢခံန့ၣ်, စီၤအံၤစဲးအဖိအိၣ်ဝဲခံဂၤ လၢအမ့ၢ်စီၤဧ့ၡီၤဒီး စီၤယၤကိာ်လီၤ. စီၤယၤကိာ်န့ၣ်တလီၤဂာ်ဒီး စီၤဧ့ၡီၤဘၣ်. အဝဲပာ်လုၢ်ပာ်ပှ့ၤဝဲတၢ်လၢနီၢ်သးတခီအဃိဒိးန့ၢ်ဘၣ်ဝဲ တၢ်ဆိၣ်ဂ့ၤလီၤ. ကစၢ်ယွၤဆီတလဲဝဲ စီၤယၤကိာ်အမံၤလၢ အံၣ်စရ့လး, ဒီးအဖိခွါ ၁၂ ဂၤန့ၣ်ကဲထီၣ်ဝဲ ပှၤအံၣ်စရ့လးဖိ အကလုာ်ဒူၣ်အခိၣ်တဖၣ်န့ၣ်လီၤ. ဘၣ်ဆၣ် ဟံၣ်ဖိဃီဖိတဒူၣ်အံၤန့ၣ် ကကဲထီၣ်ပှၤကလုာ်ဖးဒိၣ် တကလုာ်ဒ်လဲၣ်.

စီၤယၤကိာ်အဖိခွါ ၁၂ ဂၤအကျါအါတက့ၢ်န့ၣ် သူၣ်က့ၣ်သးကါဝဲ အပုၢ်စီၤယိၤသးလီၤ. အဝဲသ့ၣ်ဆါလီၤကွံာ်အပုၢ်ဒ် ကုၢ်တဂၤအသိး, ဒီးဘၣ်တၢ်က့ၤကိးအီၤဆူ ကီၢ်အဲၤကူပတူးန့ၣ်လီၤ. ဘၣ်ဆၣ်ယွၤဆိၣ်ဂ့ၤ ပှၤသးစၢ်တဂၤအံၤလၢအအိၣ်ဒီး တၢ်တီတၢ်လိၤဒီး တၢ်သးဒူန့ၣ်လီၤ. စီၤယိၤသး ဘၣ်ကွၢ်ဆၢၣ်မဲာ်ဒီးတၢ်ကီတၢ်ခဲနးနးကလဲာ်လီၤ. ဘၣ်ဆၣ်သနာ်က့ လၢခံန့ၣ်ကီၢ်အဲၤကူပတူး အစီၤပၤဖၤရိၤ ဃုထၢထီၣ်အီၤဒီး ဟ့ၣ်အီၤတၢ်စိတၢ်ကမီၤအါမးလီၤ. ဖဲန့ၣ်အဆၢကတီၢ် တၢ်သၣ်ဝံၤလီၤဒိအိၣ်ထီၣ်ဝဲအဃိ စီၤယၤကိာ်ပျဲလီၤ အဖိခွါတနီၤလၢကလဲၤပှ့ၤ တၢ်အီၣ်တၢ်အီလၢ ကီၢ်အဲၤကူပတူးလီၤ. ဖဲန့ၣ်အခါ စီၤယိၤသးမ့ၢ်ပှၤလၢ ဘၣ်ပၢဆှၢသုးကျဲၤတၢ်အီၣ်တၢ်အီတဖၣ်န့ၣ်လီၤ. လၢတၢ်တဆိကမိၣ်အပူၤ, စီၤယိၤသးထံၣ်ဘၣ်က့ၤ အဒီပုၢ်ဝဲၢ်ခွါတဖၣ်လီၤ. အဝဲသ့ၣ်ပီၢ်ယၢ်လီၤက့ၤအသးအဃိ စီၤယိၤသးပျၢ်ကွံာ်အဝဲသ့ၣ်အတၢ်ကမၣ်ဒီး စံးဘၣ်အဝဲသ့ၣ်လၢ အဒူၣ်ဖိထၢဖိခဲလၢာ် ကဟဲသုးဃီၤအသးဆူ ကီၢ်အဲၤကူပတူးအပူၤန့ၣ်လီၤ. အဝဲသ့ၣ်ဒိးန့ၢ်ဘၣ်ဝဲ တၢ်လီၢ်လၢအဂ့ၤလၢ ကီၢ်အဲၤကူပတူးအပူၤလီၤ. ဖဲန့ၣ်န့ၣ် အဝဲသ့ၣ်အါထီၣ်ဂီၢ်ထီၣ်ဒီး အတၢ်အိၣ်မူဘီၣ်ထီၣ်ညီထီၣ်ဝဲလီၤ. စီၤယိၤသးနၢ်ပၢၢ်ဝဲလၢ ကစၢ်ယွၤသုးကျဲၤဝဲ တၢ်ဂ့ၢ်သ့ၣ်တဖၣ်အံၤ ဒ်သိး ကမၤလၢပှဲၤထီၣ်အတၢ်အၢၣ်လီၤအီၤလီၤတဖၣ်အဂီၢ်န့ၣ်လီၤ.

စီၤယၤကိာ်အိၣ်မူဘၣ်ဒီးအဟံၣ်ဖိဃီဖိလၢကီၢ်အဲၤကူပတူးအပူၤ တုၤလၢအသံဝဲတစုလီၤ. စီၤယၤကိာ်တချုးသံဒံးအခါ တဲဆိပာ်ဝဲလၢ တၢ်စံးပာ်အချံအသၣ်လၢအမ့ၢ် တၢ်အုၣ်က့ၤခီၣ်က့ၤကစၢ်န့ၣ် ကမ့ၢ်စီၤပၤလၢအိၣ်ဒီး တၢ်စိတၢ်ကမီၤဖးဒိၣ်, ဒီးကဟဲအိၣ်ဖျဲၣ်ထီၣ်လၢ အဖိခွါယူဒၤ အစၢၤအသွဲၣ်န့ၣ်လီၤ. နံၣ်တဖၣ်လဲၤပူၤကွံာ်ဝဲဒီး တချုးစီၤယိၤသးသံဝဲအခါ တဲဆိပာ်ဝဲလၢ မုၢ်ကအိၣ်ဝဲတနံၤလၢ ကစၢ်ယွၤကထုးထီၣ်ကွံာ် စီၤယၤကိာ်အဒူၣ်ဖိထၢဖိတဖၣ်လၢ ကီၢ်အဲၤကူပတူးအပူၤန့ၣ်လီၤ.

​—ဘၣ်တၢ်ဒိးသန့ၤထီၣ်အီၤလၢ ၁ မိၤၡ့ အဆၢဒိၣ် ၂၀ တုၤလၢ ၅၀; ဧ့ၤဘြံၤ ၁၁:၁၇-၂၂ န့ၣ်လီၤ.