যেহোবানা মহাক্না খ্বাইদগী নুংশিজবা অদু অৱাবা নংগনি অমসুং নোংমদি শিগনি হায়বা খংলম্মী। ৱাফম অসি বাইবলগী মৈহৌরোন ৩:১৫ দা ইঙ্গিৎ পীরম্মী। মদুগী অশিবা অদুনা মঙোন্দা কয়ামুক য়াম্না চাওনা অমাংবা পুরকখিবগে হায়বদু ঈশ্বরনা মীওইবদা খংহন্বা ঙমগদ্রা? বাইবলনা অশেংবা থৌদোক অমগী মরমদা খঙহল্লি। ঈশ্বরনা অব্রাহাম্বু মহাক্কী নুংশিজরবা মচানুপা ইসাকপু কত্থোকনবা হায়রম্মী।

অব্রাহাম থাজবদা য়াম্না চেৎলম্মী। নীংশিংঙু, মাঙজৌননা হায়দোকখ্রবা লান্বিবা মীশক নত্রগা ধারা অদু ইসাক্কী খুৎথাংদা লাক্কনি হায়দুনা ঈশ্বরনা মঙোন্দা ৱাশকপিখিবনি। দরকার লৈরবদি ঈশ্বরনা ইসাকপু হিংগৎহন্বীগনি হায়বগী থাজবদুনা অব্রাহাম্না হায়বা ইন্না মহাক্কী মচানুপাবু কত্থোকনবা চৎলম্মী। তোইগুম্বশুং স্বর্গ দুত অমনা অব্রাহাম্বু মতম চানা খাম্লম্মী। মহাক্কী খ্বাইদগী মমল য়াম্লবা মচানুপাবু য়াজনিংনা কৎনবা তৌরুবগীদমক অব্রাহাম্বু থাগৎলদুনা ঈশ্বরনা মহাক্কী ৱাশকশিংদু থাজবা য়াবা শাগৈগী কোকহন লাইহন অদুদা অমুক্কা হন্না হায়রম্মী।

তুংদা ইসাক্কী এসৌ অমদি যাকোব কৌবা মচানুপা অনি পোক্লম্মী। এসৌগুমদদুনা যাকোবতি ঈশ্বরগী ওইবা থবকশিংদা থৱায় য়াওজরম্মী মদুগীদমক মনাসু ফংজরম্মী। ঈশ্বরনা যাকোবকী মমীং অসি ইস্রায়েল হায়না ওন্থোকপিরম্মী অমসুং ইস্রায়েলগী মচানুপা ১২ অদুনা ইস্রায়েল কাংলুপশিংগী মকোকশিং ওইরম্মী। তৌইগুম্বশুং মদুগী ইমুং অদুনা মতৌ করম্না অচৌবা জাতি অমা ওল্লকখিবগে?

থৌদোক কয়া থোকখ্রবগী মতুংদা ইস্রায়েলগী মচা অয়ামবনা মখোয়গী মনাওনুপা যোসেফপু কল্লক্লম্মী। মখোয়না মহাকপু মীনাই ওইনা য়োন্থোকলম্মী অমসুং মহাক অদু ইজিপ্তা পুখিরম্মী। তৌইগুম্বশুং ঈশ্বরনা মদুগী থাজবা য়াবা অমদি থৌনা লৈবা নহা অদুবু থৌজান্বিখি। অৱাবা কয়া থেংনরবসু অকোন্বদদি ইজিপ্তকী লৈঙাকপা ফেরাউনা যোসেফপু খন্দোক্লগা অচৌবা ফম পীখি। মদু য়াম্না মতম চাবা ওইরম্মী। চাকতাংবা থোক্লকপগী মরমনা যাকোবনা মাগী মচাশিং খরা ইজিপ্তা চিঞ্জাক লৈরুনবা থারম্মী। তাঞ্জা অদুদা যোসেফনা চান-থক্নবা পুম্নমক্কী য়েংশিন্বা ওইরম্মী। অঙকপা মওং অমদা থেংনরবা তুংদা যোসেফনা পুক্নিং হোংলবা মাগী মচিন মনাওশিংবু ঙাকপিরম্মী অমসুং ইমুং মনুং লোইনমক ইজিপ্তা হোংনবা শীল্লম্মী। মখোয়না হেন্না হেন্না মশিং য়ামখত্তুনা অমদি নুংঙাই য়াইফনা লৈননবা মখোয়দা খ্বাইদগী ফবা লম পীবিরম্মী। মহাক্না ৱাশকপিখিবশিং থুংননবা হায়দুনা ঈশ্বরনা পুম্নমক শীল্লকপনি হায়দুনা যোসেফনা ভাব তাজখি।

হেন্না হেন্না মশিং য়ামখৎলক্লিবা মহাক্কী ইমুং মনুংগী মরক্তা চহি য়াম্লবা যাকোবনা মহাক্কী পুন্সিগী অরোইবা মতম ফাওবা ইজিপ্তা লৈখিরম্মী। শিরমদাইগী মতমদা অদুগুম্বা ৱাশকপিখিবা ধারা নত্রগা লান্বীবা মীশক অদু যিহূদাগী শাগৈদা পোকপা য়াম্না শক্তি লৈবা লৈঙাকপা অমা ওইগনি হায়দুনা মহাক্না মাংজৌননা ফোংদোক্লম্মী। চহি কয়াগী তুংদা মহাক্না শিরমদাইগী মতমদা নোংমদি ঈশ্বরনা যাকোবকী ইমুংবু ইজিপ্তগী পুথোকপিগনি হায়দুনা যোসেফনা মাংজৌননা হায়রম্মী।

​—মৈহৌরোন পন্দুপ ২০​দগী ৫০; হিব্রু ১১:১৭-২২​দা য়ুম্ফম ওইবা।