BON ba Israél ba bi yén ngandak ñwii i Égiptô, ba bana ngandak lingwañ, ba bôl ki. Ndi Faraô i yondo i telep kiñe Égiptô. Ñane nunu a bi yi bé Yôsef. Kiki bon ba Israél ba bé ngandak, ba bak ki mimpémba, i béba ñane ini i kon woñi. Inyu hala nyen a yilha bo minkol. A ti ki oda le hiki man munlôm a ngwéé, ba leñ nye i lom Égiptô. Ndi mudaa maként wada a sôñ man wé nu munlôm, a sôô nye ikété nkuu makai. A bii ki nye ikété biloloo mbaa lom. Ndi ngont Faraô a léba nu man, a sébél nye le Môsé. A kena nye ikété ndap i kiñe Égiptô.

Ngéda Môsé a bana 40 ma ñwii, a kôhna mandutu inyule a bi ke i sôñ man Israél i moo ma man Égiptô nu a ba bép nye, a bandak ki nye i bôlô. Ni Môsé a ke haa i loñ ipe, i niñ nyoo kiki nkén mut. Ngéda a bi pam 80 ma ñwii, Djob a pohol nye le a pémés Lôk Israél i loñ minkol. Yéhôva a ep Môsé, le a ke ki Égiptô i telep i bisu bi Faraô i kal nye le a nwas litén jé.

Ndi Faraô a tjél. Ha nyen Djob a bôdôl éplene Égiptô jôm di dimala. Hiki ngéda Môsé a bé a ntelep i bisu bi Faraô inyu boñ le himala hipe hi lo bañ, Faraô a bé a ndogop. A tjél ki ti Môsé ni Djob jé le Yéhôva bigégés. Himala hi nyônôs jôm hi bi sôk lona nyemb babôkgwéé ba loñ yosô.Yéhôva a ti mbén le Lôk Israél ba hoo matjél ma man ntômba i bitembee bi makôga. Añgel i Djob i i loo inyu tjé babôkgwéé i tihba bé mandap ma mahaa ma ma nôgôl mbén i. Lôk Israél ba tééda hini hilo hi tohi yap. Ba nhoñlene hio hiki ñwii ni njel ngant ba nsébél le Pasa.

Kiki Faraô a tehe le yak mbôkgwéé wé a nwo, ni nye a ti oda le Môsé ni bon ba Israél bobasôna ba pam mu Égiptô. Ni bo ba pala kooba manyodi. Ndi ilole Lôk Israél ba ke haa, Faraô a heñel mahoñol. A kahal noñ bo ni njéé bôt ni bikak bi gwét. Lôk Israél ba ba we ba ngwéya i pañ Tuye ­Nkôibaga. Ndi Yéhôva a tohol bo. A bagal Tuye Nkôibaga le bon ba Israél ba tagbe i hisi hinumga ñemkété tuye. Malép ma yila we mabap mandap i bipes gwo biba! Ngéda bôt ba Égiptô ba bôdôl noñ bo ngwé ikété tuye, ni Djob a nwas malép le ma hô Faraô ni mintôñ nwé mi gwét le ba wo.

Mbus hala, Lôk Israél ba oñ libôga i Hikôa hi Sinai. Ha nyen Yéhôva a boñ malômbla ni bo. Djob a gwélél Môsé kiki ñat i ti Lôk Israél mambén ma ma bé lama éga ni tat bo i niñ yap yosô. Ntel Lôk Israél ba neebe énél i Djob, Yéhôva a ba ni bo, a saibak ki biloñ bipe ni njel lini litén.

Tolaki Yéhôva a bôñôl bo mana mam momasô, ngandak bon ba Israél ba bi yahal Djob ni ngi hémle yap. Jon Yéhôva a boñ le hiai hap hi leñel ikété ñoñ 40 ma ñwii. Ilole Môsé a nwo, a pohol Yôsua, mut maliga, le a yig éga bon ba Israél. Mbus hala, Lôk Israél i bé mbôñhaga i jôp i hisi Djop a bôg bôn Abraham ntandaa ngéda.

​—Biniigana bini bi nyôñna i bikaat bi Manyodi; Lôk Lévi; Ñanga Bôt; Ndiimba Mbén; Tjémbi 136:10-15; Minson mi Baôma 7:17-36.