ЩЬМӘʹТА Исраеле гәләк сала Мьсьреда дьжит у ль һәв зедә дьбун. Паше Фьрәԝьнәки тʹәзә ԝәлатда сәрԝерти дькьр, йе кӧ Усьв нас нәдькьр. Фьрәԝьне зӧлмкʹар гава дит кӧ щьмәʹта Исраеле ль һәв зедә дьбә, жь тьрса әԝана кьрьнә дил у фәрман да, ԝәки һʹәму зарʹед ԝанә тʹәзәбуйи бавежьнә чʹәме Нил, ԝәки бьхәньԛьн. Ле жьнәкә мерхас, кӧрʹе хԝәйи се мәһи һьлда кьрә сәвәте у нав ԛамишада вәшарт. Ԛиза Фьрәԝьн әв зарʹ дит, наве ԝи дани Муса у мала пʹадшеда мәзьн кьр.

Чахе Муса 40 сали бу, әԝи хӧламәки Ибрани жь дәсте нобәдаре Мьсьре хьлаз кьр. Паше жь бо ве йәке әԝ мәщбур бу бьрʹәвә әʹрдәки дур, у ԝедәре ча мәрийе сьргункьри жит. Чахе Муса 80 сали бу, Йаһоԝа ԝи пашда шандә Мьсьре. Ль ԝьр әԝ гәрәке рʹасти Фьрәԝьн бьһата, у жь ԝи дәʹԝа кьра, ԝәки әԝ щьмәʹта Хԝәде бәрʹдә.

Фьрәԝьн перʹа-перʹа әв дәʹԝакьрьн инкʹар кьр, ләма жи Хԝәде 10 бәла ани ль сәр Мьсьре. Пешийа һәр бәлаки, Муса дьчу щәм Фьрәԝьн у дьгот ԝәки әԝ щьмәʹта Хԝәде аза кә, у ԝе жь бәла хьлаз бә. Ле Фьрәԝьн, Муса пʹехәмбәр у Хԝәде бәр тьштәки һʹәсаб нәдькьр, у нәдьхԝәст әве йәке бькә. Ԝәʹде бәла 10 һʹәму ньхӧрийед Мьсьрийа мьрьн. Ле әԝ малбәтед кӧ гӧрʹа Хԝәде кьрьн, хуна бәрхе дәред хԝә хьстьн, у бь ве йәке хьлаз бун. Мәләке кӧ гәрәке ньхӧри бькӧштана, кʹеләка малед ԝанрʹа дәрбаз дьбу. Паши ве йәке ԝәʹдә дәрбаз бу, у щьмәʹта Исраел һәр сал дькьрә бира хԝә, кӧ чаԝа Хԝәде бь кʹәрәмәти, әԝана хьлаз кьрьн. Сәва ве йәке ԝана щәжьн хԝәрʹа кʹьфш кьр у наве ве данин, Щәжьна Дәрбазбуне.

Паши мьрьна ньхӧрийе хԝә, Фьрәԝьн фәрман да Муса, ԝәки әԝ у щьмәʹта Исраел жь Мьсьре дәркʹәвьн. Ԝана жи һәма ве рʹоже дәстпекьр кʹаре хԝә бькьн у дәркʹәвьн. Ле һьнә ԝәʹдә шунда, Фьрәԝьн пʹошман бу кӧ әԝана бәрʹдан. Әԝи гәләк әскәр у әʹрәбә һьлдан, у да пәй ԝан. Чахе Исраели гьһиштьнә бәʹра Сор, ԝана тʹьре Исраели кʹәтьнә тʹәльке. Ле Йаһоԝа Бәʹра Сор ортʹеда кьрә дӧ пʹара у ава бәʹре дӧ алийава мина диԝара сәкьнин, Исраели ида дькарьбун әʹрде зьһарʹа дәрбаз бьн. Чахе Мьсьрийа данә пәй ԝан, Хԝәде ӧса кьр, ԝәки диԝаре аве ль сәр Фьрәԝьн у әскәред ԝи һатә хԝаре, у әԝана гьшк хәньԛин.

Ԝәʹдә шунда, чахе Исраели бәр чʹийайе Синайе щиԝар бун, Йаһоԝа пәйман тʹәви ԝан гьреда. Хԝәде Муса кьрә ча ортʹәчи у бь сайа ԝи ԛанун дан Исраелийа, йед кӧ рʹебәрийа ԝан дькьр у һʹәму дәрәщада әʹмьре ԝан хԝәй дькьр. Щьмәʹта Исраел соз да, ԝәки һәр гав бь амьнийе гӧрʹа сәрԝертийа Хԝәде бькьн, ле Йаһоԝа ԛьрар кьр, кӧ һәр гав ԝе тʹәви ԝан бә у бь сайа ве щьмәʹте, ԝе йед дьнена жи кʹәрәм бькә.

Ле һʹәчʹи зәʹф жь щьмәʹта Исраели баԝәрийа хԝә Хԝәде нәанин, у бь ве йәке дьле ԝи ешандьн. Ләма жи Йаһоԝа ӧса кьр, кӧ әв щьмәʹт 40 сали ль бәрʹийеда бьгәрʹә. Паши ве йәке Муса дәԝса хԝә сәркʹарәки тʹәзә кʹьфш кьр, наве ԝи Йешу бу, әԝ кӧрʹе Нун бу, у мәрьвәки бь итʹбар бу. Ньһа щьмәʹта Исраел ида дькарьбу бькʹәтана ԝи әʹрди, кӧ Хԝәде соз дабу Бьраһим пʹехәмбәр.

​—Сәр һʹиме кʹьтебед Дәркʹәтьн; Ԛануна Кʹаһинтийе; Жьмар; Ԛануна Дӧщари; Зәбур 136:10-15; Кʹаред Шандийа 7:17-36.