အဆၢဒိၣ် ၇
ကစၢ်ယွၤ မၤပူၤဖျဲး ပှၤအံၣ်စရ့လးဖိတဖၣ်
ယဟိဝၤယွၤ ဒုးလီၤတၢ်နးတၢ်ဖှီၣ်တဖၣ်လၢ ကီၢ်အဲၤကူပတူးအပူၤဝံၤဒီး, စီၤမိၤၡ့ ကဲခိၣ်ကဲနၢ်လၢ ပှၤအံၣ်စရ့လးဖိတဖၣ်အဖီခိၣ် ဒီးထုးထီၣ်ကွံာ်အဝဲသ့ၣ်လၢ ကီၢ်အဲၤကူပတူးအပူၤန့ၣ်လီၤ. ယွၤဟ့ၣ်လီၤဝဲပှၤအံၣ်စရ့လးဖိတဖၣ် တၢ်မၤလိာ်ခီဖျိလၢ စီၤမိၤၡ့လီၤ.
ပှၤအံၣ်စရ့လးဖိတဖၣ် အိၣ်ဝဲဖဲကီၢ်အဲၤကူပတူးအပူၤ အါနံၣ်အါလါအဆၢကတီၢ် အဝဲသ့ၣ်ထူးထီၣ်တီၤထီၣ်ဒီး အနီၣ်ဂံၢ်ဟဲအါထီၣ်ဂီၢ်ထီၣ်လီၤ. ဘၣ်ဆၣ်လၢခံန့ၣ်, စီၤပၤဖၤရိၤအသီတဂၤ စးထီၣ်ပၢတၢ်ဒီး အဝဲတသ့ၣ်ညါ စီၤယိၤသးအဂ့ၢ်ဘၣ်. စီၤပၤလၢအသူၣ်အၢသးသီတဂၤအံၤန့ၣ် ထံၣ်ဝဲလၢပှၤအံၣ်စရ့လးဖိတဖၣ် အါထီၣ်ဂီၢ်ထီၣ်ဒီး ပျံၤဝဲအဃိ ဒုးကဲထီၣ်အဝဲသ့ၣ်လၢကုၢ်န့ၣ်လီၤ. အါန့ၢ်အန့ၣ်, စီၤပၤဟ့ၣ်လီၤအကလုၢ်လၢ ကယဲၢ်အံၣ်စရ့လးအဖိပိာ်ခွါလၢ ကဟဲအိၣ်ဖျဲၣ်ထီၣ်တဖၣ်န့ၣ် ကဘၣ်တၢ်တ့ၢ်လီၤကွံာ်အီၤဆူ ထံကျိနံၤလါအပူၤလီၤ. ဘၣ်ဆၣ်မိၢ်လၢအိၣ်ဒီးတၢ်သးဒူတဂၤန့ၣ် ဒီသဒၢဝဲအဖိဆံးတဂၤဒီး ဒၢနုာ်အီၤလၢ ချံဖိအပူၤဝံၤ ပာ်ခူသူၣ်ဝဲလၢတပိၢ်အကျါန့ၣ်လီၤ. စီၤပၤဖၤရိၤအဖိမုၣ် ထံၣ်န့ၢ်ဖိသၣ်ဒီး ယုၢ်ဝဲအမံၤလၢစီၤမိၤၡ့ဒီး လုၢ်ဒိၣ်ထီၣ်အီၤ ဒ်ကီၢ်အဲၤကူပတူး အစီၤပၤအဖိခွါတဂၤအသိးန့ၣ်လီၤ.
ဖဲစီၤမိၤၡ့အသးအိၣ် အနံၣ် ၄၀ အဆၢကတီၢ်န့ၣ် ဒီသဒၢဝဲ ပှၤအံၣ်စရ့လးဖိလၢ အကဲကုၢ်တဂၤလၢ အဲၤကူပတူးပှၤမၤတၢ်ဖိအခိၣ် တဂၤအစုပူၤအဃိ အဝဲကွၢ်ဆၢၣ်မဲာ်ဘၣ်တၢ်ကီတၢ်ခဲလီၤ. စီၤမိၤၡ့ဃ့ၢ်ကွံာ်ဆူတၢ်လီၢ်လၢအယံၤဒီး ဘၣ်အိၣ်ဝဲဆိးဝဲဖဲန့ၣ် ဒ်ပှၤလၢအဘၣ် တၢ်ဟီထီၣ်ကွံာ်အီၤလၢ အထံအကီၢ်အသိးန့ၣ်လီၤ. ဖဲစီၤမိၤၡ့အသးအိၣ် အနံၣ် ၈၀ အဆၢကတီၢ်န့ၣ် ယဟိဝၤယွၤဆှၢကဒါက့ၤအီၤဆူ ကီၢ်အဲၤကူပတူး ဒ်သိးအကမၢဝဲစီၤပၤဖၤရိၤလၢ ကပျၢ်ကွံာ်ဝဲ ယွၤအပှၤဂီၢ်မုၢ်အဂီၢ်န့ၣ်လီၤ.
ဘၣ်ဆၣ် စီၤပၤဖၤရိၤတပျၢ်လီၤ အဝဲသ့ၣ်လ့ၤတက့ၤဘၣ်. လၢတၢ်န့ၣ်အဃိ ကစၢ်ယွၤဒုးလီၤ တၢ်နးတၢ်ဖှီၣ်အခါ ၁၀ လၢကီၢ်အဲၤကူပတူး အပူၤန့ၣ်လီၤ. ဖဲစီၤမိၤၡ့လဲၤထံၣ်လိာ်အသးဒီးဖၤရိၤတဘျီလၢ်လၢ်န့ၣ် အဝဲဒုးသ့ၣ်ညါအီၤကျဲလၢ ကဟးဆှဲးဝဲတၢ်နးတၢ်ဖှီၣ်လၢ အကဟဲပိာ်ထွဲထီၣ်အသး လၢခံတဖၣ်န့ၣ်လီၤ. ဘၣ်ဆၣ် ဖၤရိၤပာ်ထီၣ်ထီအသးဒီး တဒိကနၣ်ဝဲ စီၤမိၤၡ့ ဒီးယဟိဝၤယွၤ အကလုၢ်ဘၣ်. တၢ်နးတၢ်ဖှီၣ်အခါတဆံအကျါ အလီၢ်ခံကတၢၢ်တခါန့ၣ် မၤသံကွံာ်ဖိဝဲၢ်ကိတဖၣ်ခဲလၢာ်လၢ ကီၢ်အဲၤကူပတူးအပူၤလီၤ. ပှၤပူၤဖျဲးထဲဒၣ်ဟံၣ်ဖိဃီဖိတဖၣ်လၢ အဒိကနၣ်ယဟိဝၤယွၤအကလုၢ် ဒီးဖှူအဟံၣ်ပဲတြီအထူၣ်လၢ သိဖိလၢဘၣ်တၢ်လုၢ်ထီၣ်တ့ၢ်အီၤအသွံၣ်န့ၣ်လီၤ. ကစၢ်ယွၤအမူခိၣ်ကလူးလၢ အမၤသံတၢ်တဂၤန့ၣ်လဲၤပူၤကွံာ်ဝဲ ဟံၣ်တဖၣ်အံၤလီၤ. စးထီၣ်လၢ ဆၢကတီၢ်အဝဲန့ၣ်, ပှၤအံၣ်စရ့လးဖိတဖၣ် မၤဝဲမူးပွဲ တနံၣ်တဘျီလၢဘၣ်တၢ်ကိးအီၤလၢ ဘူၣ်လဲၤကပာ်, ဒ်သိးကသ့ၣ်နီၣ်ထီၣ်က့ၤဝဲ တၢ်မၤပူၤဖျဲးအံၤအဂီၢ်န့ၣ်လီၤ.
အဖိဝဲၢ်ကိ သံဝံၤအလီၢ်ခံ, စီၤပၤဖၤရိၤန့ၣ် ဟ့ၣ်လီၤအကလုၢ်လၢ စီၤမိၤၡ့ဒီး ပှၤအံၣ်စရ့လးဖိခဲလၢာ် ကဟးထီၣ်ကွံာ်လၢ ကီၢ်အဲၤကူပတူးအပူၤလီၤ. တဘျီဃီန့ၣ် ပှၤဂီၢ်မုၢ်ဖးဒိၣ်တဖုအံၤ ကတဲာ်ကတီၤအသးလၢ ကဟးထီၣ်ကွံာ်လၢ ကီၢ်အဲၤကူပတူးအပူၤန့ၣ်လီၤ. ဘၣ်ဆၣ်စီၤပၤဖၤရိၤ အသးဆီတလဲဒီးလဲၤလူၤပိာ်ထွဲဝဲ ပှၤအံၣ်စရ့လးဖိတဖၣ် အခံလၢလ့ၣ်ကဟၣ် ဃုာ်ဒီးအသုးမုၢ်ဖးဒိၣ်လီၤ. ဖဲပီၣ်လဲၣ်ဂီၤ အကၢၢ်နံၤန့ၣ် ဖျါလၢပှၤအံၣ်စရ့လးဖိတဖၣ် ဃုဝဲတၢ်ပူၤဖျဲးအလီၢ်တဘၣ်လၢၤဘၣ်. ယဟိဝၤယွၤမၤသ့ၣ်ဖးဝဲ ပီၣ်လဲၣ်ဂီၤခံခီ, ဒ်သိးပှၤအံၣ်စရ့လးဖိတဖၣ် လဲၤခီဂာ်ဝဲကန့ၢ်အဂီၢ်လီၤ. ဖဲပှၤအဲၤကူပတူးဖိတဖၣ် ဟဲလူၤပိာ် အဝဲသ့ၣ်အခံအခါ, ကစၢ်ယွၤပျဲလီၤကဒါက့ၤပီၣ်လဲၣ်အထံအဃိ ဖၤရိၤဒီးအပှၤသုးမုၢ်တဖၣ် လီၤအုးသံကွံာ်လၢ ပီၣ်လဲၣ်ဂီၤအပူၤန့ၣ်လီၤ.
တၢ်န့ၣ်အလီၢ်ခံ, ဖဲပှၤအံၣ်စရ့လးဖိတဖၣ် သူၣ်ဒဲလၢ ကစၢၢ်စံၤနါအကပၤအခါ ယဟိဝၤယွၤမၤ တၢ်အၢၣ်လီၤအီလီၤဒီး အဝဲသ့ၣ်န့ၣ်လီၤ. ကစၢ်ယွၤသူစီၤမိၤၡ့ ဒ်ပှၤအိၣ်လၢခံခီအဘၢၣ်စၢၤတဂၤအသိး ဒီးဟ့ၣ်လီၤဝဲပှၤအံၣ်စရ့လးဖိတဖၣ် တၢ်မၤလိာ် လၢကနဲၣ်လိအီၤဒီး ကဒီသဒၢအီၤလၢ အတၢ်အိၣ်မူကိးသနၢၣ်ဒဲးအဂီၢ်န့ၣ်လီၤ. ပှၤအံၣ်စရ့လးဖိတဖၣ် မ့ၢ်တီလၢယဟိဝၤယွၤအဖီခိၣ် ဒီးတူၢ်လိာ်အတၢ်ပၢန့ၣ် ယွၤကအိၣ်ဒီးအီၤ ဒီးကဆိၣ်ဂ့ၤပှၤကလုာ်အဂၤတဖၣ် ခီဖျိလၢအဝဲသ့ၣ်န့ၣ်လီၤ.
ဘၣ်ဆၣ် ပှၤအံၣ်စရ့လးဖိတဖၣ်မၤဆါယွၤအသး ခီဖျိလၢအဝဲသ့ၣ် အါတက့ၢ်န့ၣ်အတၢ်စူၢ်တၢ်နာ် တဂၢၢ်ကျၢၤဝဲအဃိလီၤ. လၢတၢ်န့ၣ်အဃိ, ယဟိဝၤယွၤဒုးဟးဝ့ၤဝီၤ ပှၤအံၣ်စရ့လးဖိတစိၤအံၤလၢ ပှၢ်မုၢ်ကနၢအပူၤ အနံၣ် ၄၀ န့ၣ်လီၤ. စီၤမိၤၡ့ဃုထၢထီၣ် ပှၤတီပှၤလိၤစီၤယိၤၡူ လၢကမၤတၢ်လၢအလီၢ်ဒီး ဟ့ၣ်အီၤမူဒါတဖၣ်န့ၣ်လီၤ. လၢခံကတၢၢ်န့ၣ် ပှၤအံၣ်စရ့လးဖိတဖၣ် အိၣ်ကတဲာ်ကတီၤအသးလၢ ကနုာ်လီၤဆူကီၢ်လၢ ယွၤစံးပာ်စီၤအၤဘြၤဟၣ်န့ၣ်လီၤ.
—ဘၣ်တၢ်ဒိးသန့ၤထီၣ်အီၤလၢ ၂ မိၤၡ့; ၃ မိၤၡ့; ၄ မိၤၡ့; ၅ မိၤၡ့; စံးထီၣ်ပတြၢၤ ၁၃၆:၁၀-၁၅; မၤတၢ် ၇:၁၇-၃၆ န့ၣ်လီၤ.
