IDSIP kuntrika ra Israel uplika nani ba kau ailal takan. Sakuna king Fero raya kum aimakan. Naha waitnika ba uba saura bara Josep ra kakaira takras kan. Israel uplika nani ba kau ailal taki kan. Fero baha kaikan taim adar yaban witin nani ba alba kabia bara tuktan lupia nani ba Nilo awalka ra lulkbia. Israel mairka kum ai bibika ba baks kum bilara dingkan bara awala un ra dus nani tilara yukukan. Fero luhpia mairin ba tuktika ba sakan. Ningkara tuktika ra Moses nina mâkan. Baha mita Moses ba Fero watla ra pâwan.

Moses 40 mani bri kan piua ra, Israel waitnika kum ra hilp munaia dukiara pât ra diman. Idsip waitnika kum mihta wina swaki sakan. Baha mita, Moses plis laihura plapan. Witin 80 mani bri kan piua ra Gâd mita win kli Idsip ra wabia bara Fero ra makabia Israel uplika nani ra swika wabia.

Fero win Gâd dîa makaban ba daukbia apia. Baha mita Gâd klala 10 ba Idsip ra blikan. Klala kumi bani kau blikras kainara, Moses Fero ra sanska yabi kan ai kupia lakbia. Sakuna Fero uba tara puli kan. Baha mita Gâd bara Moses mapara buan. Klala 10 ba Gâd blikan piua ra Witin win insal kum Idsip luhpia tawahkia nani sut iki tikbia. Israel uplika watla nani ra baman insal ba dimras kan. Witin nani ba ai watla durka tnaya nani sîp luhpia talia wal yukan. Baha yua kulkaia dukiara Israel uplika nani ba insal luan yua ba (Pascua) kulki kan.

Fero ai luhpia tawahkia pruan ningkara, Moses ra win Israel uplika nani Idsip wina brih wabia. Isti pali Israel uplika nani asla taki Idsip wina plapan. Sakuna Fero ai lukanka chens munan bara ai suldawika bara ai waginka nani wal witin nani ra nina blikan. Israel uplika nani kabu Pauni un ra wan taim sip anira waras kan. Jehova kabu ba baiki yabal kum paskan bara Israel uplika nani bâk wapan. Idsip uplika nani nina blikan taim Gâd daukan kabu laya nani ba kli prawbia bara Fero ai uplika nani aikuki lî dih pruan.

Piu luan ba ra, Israel uplika nani ba Sainai ilka ra wan bara Jehova witin nani ra pramis kum bahara daukan. Moses bâk Jehova witin nani ra ai lâka nani yaban. Baku natka ra witin nani ra tâ bribia bara main kaikbia. Gâd bîla walbia kaka, witin nani wal kabia bara nisan wala nani ra blisin munbia.

Israel uplika aihkika ba Gâd ra kasak lukras kan. Baha mita, Jehova daukan witin nani ba 40 mani upla iwras tasbaya ra tauki kabia. Ningkara, Moses Jasua ra wahbi sakan Israel uplika nani tâ bribia dukiara. Piu luan ba ra, Jehova Ebraham ra tasba kum yabaia pramis munan ba ra Israel uplika nani ba bâra wan.

(Impakan Sturka, Libait Lâka, Kulki Kaikanka, Kli Smalkanka, Lawana 136:10-15 bara Apastil Nani Sturka 7:17-36 wina sakan sa.)