য়াম্লবা চহি কয়া ইস্রায়েল মচাশিংনা ইজিপ্তা য়াইফনা অমসুং হেন্না হেন্না মশিং য়ামখৎচদুনা লৈরম্মী। অদুম ওইনমক অনৌবা ফেরাউ অমা থোরক্লম্মী। মসিগী লৈঙাকপা অসিনা যোসেফপু খংলমদে। মহাক্না ইস্রায়েল মচাশিংনা মশিং য়ামখৎলকপা অদুদা অকিবা ফাওরম্মী। মহাক্না মখোয়শিংদু মীনাই ওইহল্লম্মী অমসুং মখোয়গী নৌনা পোক্লকপা অঙাং নুপামচা খুদিংমক নাইল তুরেলদা লংথখিনবা য়াথং পীরম্মী। অদুবু থৌনা ফবা মমা অমনা মহাক্কী নৌরিবা অঙাং নুপামচা অদু থুমোক অমদা হাপচিল্লগা তৌ মরক্তা লোৎলম্মী। ফেরাউগী মচানুপীনা অঙাং অদু থেংনরম্মী অদুগা মহাকপু মৌশি হায়না মীংথোন্বিরগা ইজিপকী লৈমা নিংথৌগী মরক্তা য়োকখিরম্মী।

মৌশিনা চহি ৪০ শুরবা মতমদা ইজিপকী থবক শুহন্বা মীশক অমগী মখুত্তগী ইস্রায়েল মচা মীনাই অমা কন্ননবা হোৎনরুবদা অৱাবা নংখি। মৌশিনা অথাপ্পা লম অমদা চেল্লবা মতুংদা মফম অদুদা মহাক্না লোই থাখ্রবা মীশক অমগুম্না লৈরম্মী। মৌশিনা চহি ৮০ শুরকপা মতমদা যেহোবানা মহাকপু অমুক হন্না ইজিপ্তা থাবিরক্তুনা ফেরাউদা চংলগা ঈশ্বরগী মীশিংবু থাদোকপিনবা হায়হনখি।

ফেরাউনা মদু য়াখিদে। মরম অদুনা ঈশ্বরনা ইজিপ্তা লায়না তরা তাহনখি। মথংগী লায়নাদগী নান্থোকচনবগীদমক মৌশিনা ফেরাউদা খুদোংচাবা পীরিবা খুদিং ফেরাউনা অদুমক শীংনদুনা লৈরম্মী অমসুং মৌশি অমদি যেহোবাবু তুক্কৎচবা উৎলম্মী। ইকোন কোন্বদা তরাশুবা লায়না অদুনা লম অদুগী অহান্বা পোকচবা মচানুপা খুদিংমক শিহনখি। ঈশ্বর যেহোবানা হায়বা ইঞ্জদুনা য়াউ মচাগী ঈনা থোংবাদা তৈজবা ইমুংশিং অদুখক্তমক কন্বিরম্মী। ঈশ্বরগী স্বর্গ দুতনা অদুগুম্বা ইমুংশিং অদু মাংহল্লমদে। মখোয়বু ঈশ্বরনা কন্বিখিবা অদুবু নিংশিংবা ওইনা ইস্রায়েল মচাশিংনা চহি খুদিংগী লান্থোকপিবগী থৌরম পাংথোক্লম্মী।

ফেরাউনা মহাক্কী অহান্বা পোকচবা মচানুপা অদু শিবদগীদি মৌশি অমসুং ইস্রায়েল মচাশিংবু ইজিপ থাদোক্তুনা চৎখিনবা য়াথং পীরম্মী। খুদক্তুদা মখোয়না মফমদু থাদোক্নবা শেম শারম্মী। অদুবু ফেরাউগী ৱাখল হোংলম্মী। মহাক্না মহাক্কী লান্মীশিং অমসুং শগোল গাড়িগী লান্মীশিংগা লোয়ননা মখোয়বু তান্নরম্মী। ইস্রায়েল মচাশিংনা অঙাংবা সমদ্রগী মপান য়ৌরকপা মতমদা মখোয় লাংদা থুরবগুমখি। যেহোবানা অঙাংবা সমদ্রগী ঈশিং অদু খায়দোকপিরম্মী। অদুদগী ইস্রায়েল মচাশিংনা অকংবা সমদ্রগী লম্বীদুদা চৎলম্মী। ইজিপকী মচাশিংনা মখোয়গী মতুংদা তান্নরকপা মতমদা ঈশ্বরনা ফেরাউ অমসুং মহাক্কী লান্মীশিংবু ঈশিংদা লুপহনখি।

তুংদা ইস্রায়েল মচাশিংনা সীনায় চীঙগী মনাক্তা লৈরিঙৈ মতমদা যেহোবানা মখোয়গা ৱারেপ্নবা অমা তৌনখি। মৌশিবু ঈশ্বরনা মরক চেন্বা মী অমা ওইনা শিজিন্নরগা ইস্রায়েল মচাশিংবু লমজিংনবা অমদি ঙাকপি শেন্বিনবা ৱায়েল পথাপ কয়া পীরম্মী। ইস্রায়েল মচাশিংনা ঈশ্বরগী শাসন অদুবু থাজনা ইঞ্জরিবমখৈ যেহোবানা মখোয়গা লোইনবিগনি অদুগা মখোয়গী মপান্দগী অতোপ্পা জাতিশিংনা নুংঙাইজবা ফংগনি।

তৌইগুম্বশুং ইস্রায়েল মচা ময়াম অমদি ঈশ্বরদা থাজবা থম্লমদে। মরম অদুনা যেহোবানা মখোয়বু চহি ৪০ চুপ্না লমহাংদা কোয়চৎ চৎত্তুনা লৈহনখি। অদুগী মতুংদা মৌশিনা মহাক্কী মহুৎ শীন্ননবা হায়দুনা অচুম্বা তৌবা যোশূৱাবু খল্লম্মী। কায়নথংদা ইস্রায়েল মচাশিংনা ঈশ্বরনা অব্রাহামদা পীবিগনি হায়দুনা ৱাশকপিখিবা লম অদুদা চংননবা শেম শারম্মী।

​—খোংশানবা; লেবীশিং; মশীং থীবা; অনীশুবা ৱায়েন; থাগৎ ঈশৈ ১৩৬:১০-১৫; পাখোনচৎপশিংগী থবক ৭:১৭-৩৬​দা য়ুম্ফম ওইবা।