ЕГИПЕТЫН кема дыр ӵоже улыса, израиль калыклэн лыдыз йылӥз. Шаерын выль фараон кивалтӥз, кудӥз Иосифез уг тоды вал. Та лек кивалтӥсь, трос лыдо калыклэсь кышкаса, израиль калыкез ляльчи кариз но соослэсь ваньзэ пи нуныоссэс Нил шуре куяны косӥз. Нош одӥгез кышкасьтэм кышномурт аслэсьтыз пизэ, кутам мушкое поныса, камыш пушкы ватӥз. Пиналэз фараонлэн нылыз шедьтӥз. Со солы Моисей ним понӥз но аслэсьтыз пизэ кадь будэтӥз.

Куке Моисейлы 40 арес вал, со еврей ляльчиез утиз чакланы пуктэм египет пилэсь. Со учыр бере солы кыдёкысь музъемын пегаса улоно луиз. Моисейлы 80 арес дыръя Иегова сое берен Египетэ ыстӥз. Солы фараонэз Инмарлэсь калыксэ лэзьыны косоно вал.

Фараон меӵак пумит луиз. Соин Инмар Египет вылэ дас шугадӟонъёс лэзиз. Фараонлы шугадӟон сярысь азьло ик ивортыса, Моисей солы шугадӟонлэсь палэнскыны луонлык сётъяз. Нош фараон алэмез санэ ӧз поны но Моисеез но солэсь Инмарзэ, Иеговаез, адӟемпотостэм кариз. Дасэтӥез шугадӟон Египет музъемысь вань нырысетӥ вордскем пиналъёслэсь улонзэс нуиз. Нош семьяос, кудъёсыз Иеговалэсь кылзӥськизы но ӧс янакъёссэс курбонэ сётэм ыжпилэн виреныз зыразы, та шугадӟонлэсь палэнскизы. Инмарлэн кулон вайись кылчинэз соослэн коркаоссылэсь палэнтӥ ортчиз. Бератаз израиль калык котькуд ар, паймымон утиськонэз тодаз вайыса, праздникез пусйиз, кудӥз Пасха шуыса нимаськиз.

Фараон, солэн нырысетӥ вордскем пиез кулэм бере, Моисеез но вань израиль калыкез Египетысь кошкыны косӥз. Со нуналэ ик соос потыны кутскизы. Нош фараон кутэм ужпумез сярысь жаляз. Со трос ожгарчиосын но ожмаськон уробоосын соос сьӧры уйиськыса мынӥз. Израиль калык сьӧлтэтэ сюриз кадь — азязы Горд зарезь. Нош Иегова зарезьлэсь вуоссэ люкиз но, соос зарезьлэн кӧс пыдэстӥз потӥзы! Куке египет ожгарчиос бӧрсязы уйиськыны кутскизы, Инмар, ву борддоръёсты лэзьыса, фараонэз но солэсь ожгарчиоссэ выйытӥз.

Берлогес, израиль калык Сӥнай гурезь доры станэн интыяськем бере, Иегова соосын тупанкыл кутӥз. Моисей пыр, сое кусып возись карыса, Инмар израиль пиослы катъёс сётӥз, кудъёсыз соосты утизы но улонзылэн котькуд удысэзлы кивалтэт сётӥзы. Израиль калык кыл сётӥз Инмарлэн кивалтэтэзлэсь кылзӥськыны, нош Иегова — соин луыны но та калык пыр мукетъёссэ бакель карыны.

Озьы ке но, тросэз израиль пиос, Инмарлы оскымтэенызы, солэсь сюлэмзэ вӧсь карылӥзы. Та ёз-выжыез Иегова луоё кыр дуннеетӥ 40 ар ветлытӥз. Собере Моисей ас интыяз азьветлӥсе Иисус Навин нимо оскымон адямиез пуктӥз. Табере калык быгатэ вал пырыны музъеме, кудзэ Инмар Авраамлы сӥзиз.

Пыкиськемын: Потон; Левит; Лыдпусъёс; Кыкетӥ Закон; Псалтирь 135:10—15; Апостолъёслэн ужъёссы 7:17—36.